SIRAKA 18

₁Ene yo o tshelelang ruri, o bopile lefatshe lotlhe.

₂Morena ke ene fela yo o tlaa fitlhelwang a siame, mme ga go na ope kwa ntle ga gagwe.

₃O tsamaisa lefatshe ka tshokololo ya seatla sa gagwe, dilo tsotlhe di utlwa thato ya gagwe, gonne ke kgosi ya dilo tsotlhe; mme ka thata ya gagwe o kgaoganya dilo tse di boitshepo go tse di sa itshepang.

₄Ga a fa ope thata ya go bolela ditiro tsa gagwe ka tšhwanelo, le gone ke mang yo o ka lekanyang ditiro tsa gagwe tse dintlentle?

₅Ke mang yo o ka kelekang thata ya gagwe e e maatlametlo, mme ke mang yo o ka tšwelelang pele a bolela mautlwelo-botlhoko a gagwe?

₆Ga go na sepe se se ka a oketsang, ga go na se se ka a fokotsang, ditiro tse di gakgamatsang tsa Morena ga di kake tsa lekanngwa.

₇Fa motho a fetsa ke gone o a bong a simolola, mme fa a ema o tlhakanye tlhogo fela jaaka gale.

₈Motho ke eng, mosola wa gagwe ke eng tota? ke eng se se molemo mo go ene, le se se bosula?

₉A ko O tseye malatsi a motho fela; dingwaga tse lekgolo di dintsi thata.

₁₀Dingwaganyana tse di itšhwanela le lerothodinyana la metsi mo lewatleng kgotsa le tlhakanyana ya motlhaba fa di tšhwantshiwa le bosakhutleng.

₁₁Ke ka ntlha ya se Morena a ba itshokelang, mme a ba goromeletsang boutlwelo-botlhoko jwa gagwe,

₁₂O a bona e bile o lemoga ka mo bofelo jwa bone bo tlhomolang pelo ka teng, ke gone ka moo a oketsang boitšhwarelo jwa gagwe.

₁₃Bopelotlhomogi jwa motho bo ikemela fela mo mokaulengweng wa gagwe, fela bopelotlhomogi jwa Morena bo ama dilo tsotlhe tse di tshelang. bo di omanya, bo di tšhwaya phoso, bo di ruta, bo di busa jaaka modisa a tle a tle go gorosa motlhape wa gagwe.

₁₄O tlhomogela pelo botlhe ba ba dumelang go tšhwaiwa phoso, le ba ba batlang dikatlholo tsa gagwe.

₁₅Morwaaka, O se ka wa loka dithuso tsa gago ka lonyatso, kgotsa dimpho dipe tsa gago ka mafoko a a botlhoko.

₁₆A monyo ga o kokobetse mogote? Ka mokgwa o o tšhwanang, lefoko le botlhokwa go feta mpho.

₁₇Ee ke boammaaruri, lefoko le botoka go na le mpho e ntle, fela motho yo o pelo o a bo a ntse a ipaakanyeditse go di fa tsoopedi.

₁₈Seeleele ga se fe sepe fa e se matlhapa fela, mme mpho ya motho yo o pelotshetlha e bobalatsa matlho.

₁₉O ithute pele ga O bua, O itlhokomele pele e se re kgotsa wa lwala.

₂₀Pele ga go atlhola, O itlhatlhobe, mme ka letsatsi la ketelo O tlaa iphitlhela O itshwaretswe.

₂₁Pele ga O lwala, O ikokobetse. Mme fa O ka dira sebe, O ikotlhaye.

₂₂A go se nne sepe se se go itsang go diragatsa maikano a gago ka nako e e siameng. O se ka wa leta go fitlhelela loso lwa gago pele o iphutha metlhala.

₂₃O ipaakanye pele ga O dira maikano, mme O se ka wa nna jaaka motho yo o lekang Morena.

₂₄O nne O gakologelwe kgalefo ya malatsi a bofelo, nako ya pusoloso fa Modimo o lebela go sele.

₂₅Ka nako ya kgora O gakologelwe dinako tsa leuba, mo malatsing a khumo O nne O akanye lehuma le go tlhoka.

₂₆Fa gareng ga moso le maitsiboa nako e relela fela dilo tsotlhe di feta ka bonako fa pele ga Morena.

₂₇Motho yo o botlhale o nna tlhoko mo dilong tsotlhe mme mo malatsing a teofo o a itlhokomela gore a se ka a bo a kgopisa.

₂₈Mongwe le mongwe yo o nang le tlhaloganyo o lemoga botlhale, mme o tlotla mongwe le mongwe yo o nang najo.

₂₉Botlhe ba ba tlhaloganyang mebolelo, ba nna botlhale le bone, mme ba bua diane tse di tšhwanelang di le dintsi.

₃₀O se ka wa latela ditshekamelo tsa gago tse di bosula, O laole dikeletso tsa gago.

₃₁Fa o dumelela go nna O itumedisa dikeletso tsa gago, O tla itshegisa baba ba gago.

₃₂O se ka wa tshelela mo letlepung, kgotsa wa itlhakatlhakanya le lekoko la mofuta o o ntseng jalo.

₃₃O se ka wa ikhumanegisa ka go dira meletlo ka go tsaya melato, go se na sepe mo kgwatlheng ya gago.