SIRAKA 26

₁Go sego monna yo o nang le mosadi yo o molemo tota; palo ya malatsi a gagwe e tlaa ntsifadiwa gabedi.

₂Mosadi yo o siameng o itumedisa monna wa gagwe. Monna yoo o tlaa tshela dingwaga tsa botshelo jwa gagwe ka kagiso.

₃Mosadi yo o molemo ke seabe se se gaisang tse dingwe, se se tlhaoletšweng botlhe ba ba boifang Morena.

₄A ba humile kgotsa ba humanegile, dipelo tsa bone di ntse di itumetse fela. Nako yotlhe difatlhogo tsa bone di ntse di thamile fela.

₅Go na le dilo di le tharo tse pelo ya me e di tshabang, mme sa bone se a ntshosa; ke tse:

₆Mme se se utlwisang pelo botlhoko go feta, e bile se hutsafatsa, ke mosadi yo o fufegelang mosadi yo mongwe; mašula ao otlhe a tsisiwa ke loleme lo lo kgwathisang lo lo mo go bone.

₇Mosadi yo o bosula o tšhwana le jokwe ya dipholo e e sa golegeng sentle, go leka go mo kgona go tšhwana le go tlamparela phepheng.

₈Mosadi yo o tlhapetšweng o galefisa mongwe le mongwe, ga a leke le go leka go fitlha go tlhabisa ditlhong ga gagwe.

₉Bofafalele jo bo mašwe jwa gagwe bo itšhupa fela mo matlhong a gagwe a a se nang boikgapo, mme bo ka nna jwa lemogiwa ka medilonyana ya gagwe.

₁₀O laole ngwana wa mosetsana yo o tlhogo e thata ka taolo e e gagametseng, e seng jalo o tlaa tsaya bomolemo bongwe le bongwe jo a bo direlwang, mašwe.

₁₁O tlhokomele thata matlho a gagwe a a se nang ditlhong. O se ka wa gakgamala fa a ka go tlhabisa ditlhong.

₁₂O tla atlhama jaaka motsamai yo o tšhwerweng ke lenyora, a nwe metsi mangwe le mangwe a o kgatlhanang nao. O tla nna fa pele ga pale nngwe le nngwe, a bulele motsu mongwe le mongwe mokotlopo wa gagwe.

₁₃Bontle jwa mosadi bo kgatlha monna wa gagwe, mme ditiro tsa gagwe tsa botšwerere di mo dira moko-o-thata.

₁₄Mosadi yo o itidimaletseng ke mpho e e tšwang mo Moreneng, ga go na tlhwatlhwa e e ka beelwang moya o o itšhwereng ka maitseo.

₁₅Mosadi yo o boikgapo ke lesego le le tlhatlaganyeng, moya o o itshekileng ga o kake wa lekanngwa ka dikale.

₁₆Bontle jwa mosadi yo o molemo yo o mo tlung e e phepa bo tšhwana le letsatsi le le tlhatlogang mo dithabeng tsa Morena.

₁₇Sefatlhogo se sentle se se mo mmeleng o o bopegileng sentle se tšhwana le lobone lo lo phatsimang lo le mo godimo ga setlhomo sa lobone se se boitshepo.

₁₈Maoto a mantle a a mo diretheng tse di kwenneng a tšhwana le maotwana a gouta a a mo sennong sa selefera.

₁₉Ngwanaka, O boloke bontle jwa boša jwa gago, mme O se ka wa senyetsa thata ya gago mo bathong ba e leng baeng.

₂₀O batle tshimo e e ungwisang mo leboeng lotlhe, mme O jale peo ya gago gone, O ikantse leruo la gago le le molemo.

₂₁Ke gone bana ba gago ba tla tshelang nako e telele, ba nne bagolo ba ntse ba ikantse lotso lwa bone.

₂₂Mosadi yo o ithekisang o ronwa le ke go kgwelwa mathe tota, fela mosadi wa boammaaruri o thata jaaka setlhoa.

₂₃Mosadi yo o boikepo o newa monna yo o tlolang molao e le seabe sa gagwe, fela mosadi yo o siameng o newa monna yo o boifang Morena.

₂₄Mosadi yo o se nang ditlhong o itumelela go tlhola a itlontlolotse, fela mosadi yo o boikgapo o ditlhongnyana le mo monneng wa gagwe tota.

₂₅Mosadi yo o tlhogo e thata ga a tlotlwe fela jaaka ntša, fela mosadi yo o nang le ditlhong o boifa Morena.

₂₆Mosadi yo o tlotlang monna wa gagwe o tlaa bonwa a le botlhale ke batho botlhe, fela yo o nyatsang monna wa gagwe ka boikgogomoso o tla itsiwe ke botlhe fa a le bosula. Go sego monna wa mosadi yo o molemo, gonne palo ya malatsi a gagwe e tla ntsifadiwa gabedi.

₂₇Mosadi yo o buelang godimo, a rata go seba, o tšhwana le phala e e lelediwang tlhaselo, mme monna mongwe le mongwe yo o mo ikimeditseng o tshela botshelo jwa gagwe a le mo mokubukubung wa ntwa.

₂₈Go na le dilo di le pedi tse di utlwisang pelo ya me botlhoko, sa boraro sone se a nkgalefisa: motlhabani yo o nnetseng go bopamela pele fela ka ntlha ya lehuma; batho ba ba tlhalefileng ba ba tšhwerweng ka lonyatso; motho yo o tlogelang tshiamo a itsenya mo sebeng; Morena o baakanyetsa motho yo loso lo lo setlhogo lwa tshoganyetso.

₂₉Go thata gore mmapatsi a se ka a dira phoso, le morekisi gore a se ka a leofa.