SIRAKA 34

₁Motho yo o se nang tlhaloganyo o na le ditsholofelo tse di sa thuseng sepe le tse di se nang boammaaruri bope, mme ditoro di phaphasedisa dieleele.

₂Motho yo o ikanyang ditoro o tšhwana le motho yo o tšhwarang meriti le yo o kobakobanang le phefo.

₃Seipone le toro ke dilo tse di tšhwanang, sefatlhogo se lebagana le setšhwantsho sa sone.

₄Ke eng se se ka tlhatswiwang ke lešwe? Maaka a ka netefatsa eng?

₅Dika-tshenolo tsa tse di sa tlang, dika-polelo tsa tse di sa diragalang le ditoro ke dilo fela tse di se nang tlhaloganyo, di tšhwana le dikakanyo tsa maduopo a mosadi yo o mo dikgweding.

₆O se ka wa bo wa di akanya, fa e se fela di rometšwe ke Mogodimodimo; ₇gonne ditoro di timeditse batho ba bantsi, mme botlhe ba ba nnileng ba solofela sengwe mo go tsone ba ne ba šwaba.

₈Go tshegetsa Molao ga go tlhoke ditsietso tse di ntseng jalo, mme botlhale bo buiwa sentle ke molomo o o nang le boammaaruri.

₉Motho yo o tsamaileng thata o itse dilo di le dintsi, mme motho wa bomaitseanape o a tle a bue sengwe se se utlwalang.

₁₀Motho yo o iseng a ke a lekiwe o itse go le gonnye fela, fela motho yo o tsamaileng thata ke moitseanape wa maemo mangwe le mangwe.

₁₁Ke bonye dilo di le dintsi mo maetong a me, ka tlhaloganya di le dintsi go feta jaaka nka bua ka tsone.

₁₂Gantsi ka batla ke šwa, mme ka rekegelwa, ke gone ka moo: ₁₃moya wa botlhe ba ba boifang Morena o ka nna wa tshelela pele. gonne ba solofetse thuso mo go mongwe yo o ka ba bolokang.

₁₄Motho yo o boifang Morena ga a kitla a nna boi, ga a kitla a tshaba sepe gonne o solofetse gore Morena o tlaa mo thusa.

₁₅Go sego moya wa motho yo o boifang Morena. O ikantse mang? Ke mang yo o mo tshegeditseng?

₁₆Matlho a Morena a lebeletse botlhe ba ba mo ratang; ke ene yo o ba sireletsang ka natla, le yo o ba tshegetsang ka thata; ke ene a ba khurumetsang fa phefo ya sekaka e foka, ke ene leobo la bone la moriti fa letsatsi le lela motshegare wa sethoboloko, ke ene a ba lebelelang gore ba se ka ba kgopiwa ke sepe, a ba thibela gore ba se ka ba wa.

₁₇O tsosa mewa, a bo a phatsimisa matlho; o a alafa, o a tshedisa, a bo a tshegofatse.

₁₈Tshupelo ya neelo e e bonyweng ka mokgwa o o sa siamang ke tshotlo; dimpho tsa batho ba ba bosula ga di nke di amogelwa.

₁₉Mogodimodimo ga a itumelele dineelo tsa baikepi, go ntsifatsa ditshupelo ga go kitla go dira gore a itšhwarele sebe.

₂₀Go ntsha tshupelo ka dilo tsa bahumanegi go tšhwana le go bolaya ngwana wa mosimane rraagwe a ntse a go lebile.

₂₁Dijo tse dinnye ke jone botshelo jwa bahumanegi, motho yo o di timang ke mmolai.

₂₂Motho o a bo a bolaya mokaulengwe wa gagwe fa a mo tseela se a tshelang ka sone ka bolotsana, o a bo a bolaya fa a gana ka tuelo ya motho yo o mo direlang.

₂₃Fa motho mongwe a aga mme yo mongwe a rutlologa ga ba boelwe ke sepe fa ese matshwenyego fela.

₂₄Fa motho mongwe a rapela mme yo mongwe a hutsa, Morena o tla reetsa lentšwe la ofe?

₂₅Fa motho e re a sena go ama setoto a bo a tlhapa, mme a tloga a se tšhwara gape, go tlhapa ga gagwe go mo thusa eng?

₂₆Go ntse fela jalo ka motho yo o itimang dijo, a di itimela dibe tsa gagwe; mme e re a tloga foo, a bo a ya go di dira gape. Ke mang yo o tlaa reetsang dithapelo tsa gagwe? Boingotlo jwa gagwe bo mo thusa eng?