SIRAKA 44

₁Jaanong a re keng re boke banna ba ba tumileng, bagologolo ba rona ka dikokomane tsa bone.

₂Morena o bopile tlotlo e kgolo, a supa bogolo jwa gagwe go simologa bogologolo.

₃Bangwe ba bone ba ne ba busa e le dikgosi, ba tumile ka ntlha ya thata ya bone. Ba bangwe e ne e le bagakolodi ba ba botlhale, ba fa dikgakololo tse di botlhale, tse di bolelelang-pele.

₄Ba bangwe ba ne ba tsamaisa setšhaba ka dikgakololo, ka go tlhaloganya mogopolo wa batho le ka mafoko a a botlhale a thuto ya bone.

₅Ba bangwe ba ne ba dira medumo ya dipina ka botšwerere, mme ba kwala dipina ka mokgwa wa loboko.

₆Ba bangwe bone e ne e le bahumi le dinatla, ba tshela ka kagiso mo magaeng a bone.

₇Botlhe ba ba ne ba tlotliwa ke batho ba metlha ya bone mme ba bakega ka nako ya bone.

₈Bangwe ba itlogeletse leina le le tumileng, mo e leng gore maboko a bone a sa ntse a opelwa.

₉Fela ba bangwe bone ga ba gakologelwe ka mokgwa ope fela, mme ba nyeletse fela jaaka ekete ga ba ise ba ke ba tshele. Ba ntse fela jaaka e kete ga ba ise ba ke ba nne gone, mme bana ba bone ba ba tsileng morago ga bone le bone ba ntse fela jalo.

₁₀Fela go palo ya banna ba ba pelo, ba ditiro tsa bone tse di molemo di sa lebalweng.

₁₁Mo lotsong lwa bone go setse bošwa jo bogolo jo bo tsetšweng ke bone.

₁₂Ditlogolo tsa bone di tlotla dikgolagano mme ka ntlha ya bone, ditlogolwana tsa bone le tsone di dira jalo.

₁₃Lotso lwa bone lo tla nnela ruri, tlotla ya bone ga e kitla e nyelela.

₁₄Mebele ya bone e fitlhilwe ka kagiso. mme leina la bone le tshela ka metlha yotlhe.

₁₅Ditšhaba di tlaa anamisa botlhale jwa bone mme phuthego e ba boke.

₁₆Enoko ene o ne a itumedisa Morena, mme a tlhatlosiwa, sekao sa go tlhabologa mo dikokomaneng tsotlhe.

₁₇Noa o ne fitlhelwa a siame, mme ya re ka nako ya bogale a nna motsereganyi; ka ntlha ya gagwe bangwenyana ba ne ba sala ka nako ya Morwalela.

₁₈Dikgolagano tse di sa khutleng di ne tsa dirwa nae, gore dibopiwa tsotlhe tse di tshelang ga di kitla di bo di tlhola di nyelediwa ka morwalela.

₁₉Aborahame, rraetsho mogolo wa bontsintsi jwa ditšhaba ga go na ope yo o kileng a ka a lekana nae ka kgalalelo.

₂₀O ne a tshegetsa Molao wa Mogodimodimo, mme a dira kgolagano nae. O ne a tlhomamisa kgolagano mo nameng ya gagwe, mme mo pitlaganong a bonala a ikanyega.

₂₁Ke gone ka moo, Morena a neng a mo solofetsa, a ikana gore o tlaa tshegofatsa ditšhaba ka lotso lwa gagwe, a mo ntsifatse jaaka lerole fa fatshe, a bo a godisa ditlogolwana tsa gagwe jaaka dinaledi, a bo a di naya bošwa jwa lefatshe go tšwa lewatleng le lengwe go ya kwa go le lengwe, go tšwa kwa Nokeng go ya kwa mafelelong a lefatshe.

₂₂Isaka le ene o ne a mo solofetsa, a ikana, ka ntlha ya ga Aborahame rraagwe, ₂₃gore o tlaa tshegofatsa batho botlhe ka ene. O ne a fetisetsa kgolagano mo go Jakobe. A mo dira mojabošwa jwa tshegofatso, a mo naya lefatshe go nna la gagwe; A le kgaoganya ka diabe tse a neng a di neela merafe e 12.