SIRAKA 4

₁Ngwanaka, O se ka wa tima bahumanegi, O se ka wa konkometsa batlhoki.

₂O se ka wa oketsa dipogo tsa ba ba bolawang ke tlala, O se ka wa galefisa motho yo o setseng a ntse a le mo bohutsaneng.

₃O se ka wa gakatsa pelo e e setseng e ntse e galefile, kgotsa wa diega go fa mokopi.

₄O se ka wa koba mokopi yo o mo mathateng, kgotsa wa hularela mohumanegi.

₅O se ka wa tlhokomologa modidi, O se ka wa dira gore mongwe a go hutse, ₆gonne fa mongwe a ka go hutsa ka moya o o botlhoko, mmopi wa gagwe o tlaa utlwa khutso ya gagwe.

₇O dire gore morafe o go rate, O obele motho yo o laolang tlhogo,

₈O reetse mohumanegi, e re a go dumedisa O dumele ka maitseo.

₉O namole motho yo o gateletšweng mo mogateleding, mme O se ka wa atlhola ka bopelompe.

₁₀O nne ramasiela, O bo O nne monna yo o thusang batlholagadi mme O tlaa tšhwana le ngwana wa Mogodimodimo yo o tlaa go ratang go feta mmago.

₁₁Botlhale bo godisa bana ba jone, mme bo tlamela botlhe ba ba bo senkang.

₁₂Mongwe le mongwe yo o bo ratang, o rata botshelo, botlhe ba ba bo phakelelang ba tlaa tladiwa boitumelo.

₁₃Mongwe le mongwe yo o bo huparelang tlotlo e tlaa nna bošwa jwa gagwe, mme gongwe le gongwe fa a tsamayang teng o tlaa tshegofadiwa ke Morena.

₁₄Botlhe ba ba bo direlang ba tlaa bo ba direla Moitshepi yo Mogolo, mme Morena o rata ba ba bo ratang.

₁₅Mongwe le mongwe yo o bo utlwang o na le katlholo e e siameng mme mongwe le mongwe yo o bo tlhokomelang o tlaa aga a bolokesegile.

₁₆Fa a bo ikanya, bo tlaa nna bošwa jwa gagwe, mme lotso lwa gagwe lo nne lo bo ruile, ₁₇gonne le mororo bo tlaa mo tsamaisa mo ditseleng tse di motsopodia, bo mo digela poifo le bogatlapa, bo mo utlwisa botlhoko ka thuto ya jone go fitlhelela bo mo ikanya, bo bo bo mo leka ka dipogiso tsa jone.

₁₈E tlaa re kwa bofelong bo mmusetse mo tseleng e e tlhamaletseng, bo mo senolele diphiri tsa jone.

₁₉Fa a ka lelerela kgakala bo tla mo lesa, mme bo mo tlogelele bomadimabe jwa gagwe.

₂₀Ngwanaka, emela nako e e siameng, mme o tshabe bosula, le gone O se ka wa itlhabisa ditlhong, ₂₁gonne go na le ditlhong tse di gogelang motho mo sebeng, le ditlhong tse di tlotlegang, tse di pelotšhweu.

₂₂O se ka wa nna letlhotlho, e se re kgotsa wa ikutlwisa botlhoko, kgotsa wa ineelaneela fela, wa tloga wa wa.

₂₃Fa nako e go siametse gore O bue O se ka wa itidimalela fela, mme wa fitlha botlhale jwa gago, ₂₄gonne botlhale bo lemogiwa mo puong, mme thutego e lemogiwa ka se loleme lo se buang.

₂₅O se ka wa ganetsa boammaaruri, O mpe O tlhabisiwe ke go tlhoka kitso ga gago ditlhong.

₂₆O se ka wa tlhabiwa ke ditlhong go ipolela dibe, O se ka wa leka go sokasokana le go elela ga noka.

₂₇O se ka wa ikgwaphalatsa fa pele ga lesilo, O se ka wa direla motho wa maemo go feta ba bangwe.

₂₈O lwele boammaaruri go fitlhelela O bo O šwa, mme Morena Modimo o tlaa go tlhabanela.

₂₉O se ka wa nna senatla mo puong, mme mo ditirong O itsemeletsa e bile O le setšhwakga.

₃₀O se ka wa tshwana le tau mo lwapeng, kgotsa wa nna wa gopolela batlhanka ba gago bosula.

₃₁O se ka wa ne O sale O atlaretse gore O amogele, mme O huparela fa nako ya gore O fe e fitlha.