SIRAKA 50

₁Simone Moprista yo mogolo morwa Oniase ke ene yo o neng a baakanya Tempele fa a sa ntse a tshela, mme a tiisa felo ga boitshepo mo malatsing a gagwe.

₂O ne a dira metheo ya dipota tse di goletseng godimo tse di tlhatlaganyeng, ditiisi tse di goletseng godimo tsa patlelo ya Tempele.

₃Mo malatsing a gagwe ledibela le ne la epiwa, ledibela le legolo jaaka lewatle.

₄Ka a ne a tlhwaafaletse go boloka batho gore ba se ka ba nyelediwa o ne a thekeletsa motse go o sireletsa ka nako ya tikologo ya ntwa.

₅Kana o ne a le montle jang fa batho ba mo phuthaganetse a tšwa mo felong ga boitshepo mo go neng go sirilwe.

₆A tšhwana le naledi ya masa e faraferwe ke maru, kgotsa ngwedi e tletse.

₇A tšhwana le letsatsi le le phatsimelang mo godimo ga Tempele ya Mogodimodimo, kgotsa mola wa godimo o o galalelang go bapa le maru a mašwaana.

₈A tšhwana le dithunya mo malatsing a dikgakologo kgotsa ditšheše go bapa le molatšwana wa metsi, e kete kalanyana ya setlhatsana sa boroku jwa insense ka nako ya selemo.

₉O ka re molelo le insense mo sebesetsong, O ka re sejana sa gouta e e phutolotšweng sentle se kgabisitšwe ka mefuta le mefuta ya majana a botlhokwa a mantlentle.

₁₀A tšhwana le setlhare sa motlhware se se gomilweng ke maungo, O ka re morukuru o o goletseng kwa godimo.

₁₁E ne ya re a kgabile ka diaparo tsa gagwe tse di galalelang, a ikapesa bontle jo bo feteletseng, e re a tlhatlogela kwa aletareng e e boitshepo, a ntlafatse lolapa lwa felo ga boitshepo a phatshima; ₁₂e re a amogela diabe mo bapristeng, a eme go bapa le leiso la aletara, a dikologilwe ke bontsi jwa bomorwarraagwe: O fitlhele a tšhwana le mosetare wa Lebanone, e ne e kete o dikologilwe ke dikutu tsa ditlhare tsa dipalema.

₁₃E ne e tle e re bomorwa Arone botlhe ba eme ka kgalalelo ya bone fa pele ga phuthego yotlhe ya Iseraele, ba tshotse dineelo tsa Morena ka mabogo, ₁₄fa ene a feleletsa ditirelo kwa dialetareng, ka thulaganyo e e tšhwanetseng a baya neelo fa pele ga Mogodimodimo, Mothatiyotlhe, ₁₅a tsaya senwelo, mme a tsholola matute a moretlwa go a fa Modimo, a a tshololela fa tlase ga aletara, e le monkgo wa go agisanya Mogodimodimo, kgosi ya dilo tsotlhe: ₁₆bone bomorwa Arone ba goe, ba letse diphala tsa ditshipi tse di otlolotšweng sentle, ba dire modumo o mogolo, e le segakolodi fa pele ga Mogodimodimo.

₁₇Mme ka bonakonako batho ba ribame mmogo fa fatshe ka mpa ya sebete ba obamele Morena wa bone, Modimo Mothatiyotlhe, Mogodimodimo.

₁₈E re baopedi ba tlhabeletsa difela tsa pako, modumo wa mantšwe otlhe o nne monate, ₁₉batho ba ne ba kopa Morena Mothatiyotlhe, ba rapela fa pele ga yo o Boutlwelo-botlhoko go fitlhelela tirelo ya Morena e fediwa, mme kobamelo e khutla.

₂₀O ne a tle a ne a fologa a tla go otlolola mabogo fa godimo ga phuthego yotlhe ya bomorwa Iseraele, a ba naya tshegofatso ya Morena ka molomo wa gagwe, e le gore ke ene yo o nang le tlotla e ya go bitsa leina la gagwe.

₂₁Mme batho ba iname gangwe le gape go amogela tshegofatso e e tšwang mo go Mogodimodimo.

₂₂Jaanong bakang Modimo wa dilo tsotlhe, modiri wa tse dikgolo gongwe le gongwe yo o tlotlileng malatsi a rona thata go tšwa popelong mme a dira le rona ka boutlwelo-botlhoko.

₂₃A a ke a re itumedise, mme a re neye kagiso mo malatsing a rona mo Iseraele ka metlha yotlhe.

₂₄A boutlwelo-botlhoko jwa gagwe bo nnele le rona, a re namole mo malatsing a rona.

₂₅Go na le ditšhaba di le pedi tse ke di ilang sa boraro setšhaba ga se setšhaba tota, ₂₆ke tse: baagi ba Thaba ya Samaria le Mafilisitia, le batho ba ba se nang tlhaloganyo ba ba nnang kwa Shekema.

₂₇Tse di rutang botlhale le kitso di kwadilwe mo lokwalong lo ke Jesuse, morwa Sira, morwa Eleasare, wa Jerusalema yo o ntshitseng botlhale jo bontsi mo pelong ya gagwe, ₂₈go sego motho yo o inayang matsapa kaga dilo tse, mme e re ka go di rata a tlhalefa.

₂₉Gonne fa a di dirisa o tlaa nna thata mo dilong tse dingwe tsotlhe, ka tsela ya gagwe e tlaa bo e le leseding la Morena.