SIRAKA 7

₁O se ka wa dira bosula, mme bosula ga bo kitla bo go tlhagela,

₂Tshaba phoso mme le yone e tlaa go tila.

₃Ngwanaka, O se ka wa jala mo bolemeng jwa tshiamololo, e se re kgotsa wa e roba go menaganye ga supa.

₄O se ka wa kopa Morena maemo a a kwa godimo, kgotsa kgosi wa e kopa setilo sa tlotlo.

₅O se ka wa bolela tshiamo ya gago fa pele ga Morena, kgotsa wa supa botlhale jwa gago fa pele ga kgosi.

₆O se ka wa ipatlela go beiwa moatlhodi, e se re kgotsa wa palelwa ke go fedisa tshiamololo, wa bo wa tloga wa emela motho wa maemo ka kgobelelo, mme ka mokgwa oo wa itshenya leina.

₇O se ka wa kgopisa beng-gae ka kakaretso, mme ka mokgwa oo, wa dira gore ba go lebele kwa tlase.

₈O se ka wa dira sebe gabedi, gonne le gangwe fela tota O tlaa nna O go otlhaelwa.

₉O se ka wa re, “Modimo o tlaa akanya dineo tsa me tse dintsi, mme e tlaa re ke ntshetsa Modimo, Mogodimodimo setlhabelo o se amogele.”

₁₀O se ka wa šwagašwaga pelo mo thapelong, O se ka wa lebala go ntsha dikatso.

₁₁O se ka wa tshega motho yo o hutsafetseng, gonne yo o mo kokobeditseng o ka nna a mo tlhatlosa gape.

₁₂O se ka wa kwalela morwarrago tshupo ya maaka, kgotsa wa e direla tsala ya gago.

₁₃O tlhokomele O se ka wa bua maaka, gonne ga go na bomolemo bope jo bo tšwang moo.

₁₄O se ka wa taolosa dipuo tsa gago mo phuthegong ya bagolwane, le gone O se ka wa ipoeletsa mo dithapelong tsa gago.

₁₅O se ka wa tila tiro e e lapisang kgotsa tiro ya polasi, e Mogodimodimo o e tlhodileng.

₁₆O se ka wa oketsa palo ya baleofi, O gakologelwe gore kgalefo ga e na go diega.

₁₇O nne le boikokobetso jo bogolo, gonne kotlhao ya baikepi ke molelo le diboko.

₁₈O se ka wa ananya tsala ka papadi, kgotsa morwarrago wa nnete, ka gouta ya Ofiri.

₁₉O se ka wa tlhanogela mosadi yo o botlhale le yo o molemo, gonne tlhwatlhwa ya boitumediso jwa gagwe e feta gouta, ₂₀O se ka wa tšhwara motlhanka yo o ikanyegang mašwe, kgotsa mothapiwa yo o itekang ka moya wa gagwe otlhe go go direla sentle.

₂₁O rate lekgoba le le botlhale jaaka o ithata, mme o se ka wa le itsa kgololesego.

₂₂A O na le dikgomo? di dise: fa e le gore di go busetsa sengwe, di boloke.

₂₃A O na le bana? Ba rute, O dire gore ba utlwe ba sa le bannye.

₂₄A O na le barwadi? Tlhokomela mebele ya bone, mme O se ka wa nna molemo go feta selekanyo mo go bone.

₂₅Nyadisa morwadio; O tlaa bo O dirile tiro e kgolo, fela o mo nyadise monna yo o nang le tlhaloganyo.

₂₆A O na le mosadi yo o go itumedisang? O se ka wa mo koba; fela fa O sa mo rate, O se ka wa mo ikanya.

₂₇Tlotla rrago ka pelo ya gago yotlhe. O se ka wa bo wa lebala matlhoko a ga mmago a pelegi.

₂₈O gakologelwe gore ke bone ba go belegileng; o ka ba duelela se ba se go diretseng jang?

₂₉Tshaba Morena ka moya wa gago otlhe, Tlotla baprista ba gagwe.

₃₀Rata Modiri wa gago ka thata ya gago yotlhe, O se ka wa tlhokomologa badiredi ba gagwe.

₃₁Boifa Morena mme O tlotle moprista wa gagwe, mme O mo neye kabelo e O e laoletšweng, e bong mabutšwapele, ditlhabelo tsa tefelo le mpho ya legetla, neelo ya dijo, le mabutšwa-pele a dilo tse di boitshepo.

₃₂O otlololele mohumanegi seatla sa gago gore tshegofatso ya gago e tle e itekanele.

₃₃O fe batshedi botlhe ka pelo e tšhweu, mme O se ka wa tima bašwi bomolemo jwa gago, ₃₄O se ka wa tlhoka go gomotsa yo o lelang, mme O tlhakanele kutlo-botlhoko le ba ba hutsafetseng.

₃₅O se ka wa ikgoga mo go eteleng molwetsi, gonne O tlaa ratelwa ditiro tse di ntseng jalo.

₃₆Mo go sengwe le sengwe se O se dirang gakologelwa bokhutlo jwa gago mme ga O kitla O bo O leofa.