TOBITE 14

₁Tobite o ne a tlhokafala ka kagiso a na le dingwaga di le lekgolo le lesome le le metso e mebedi mme a nna le phitlho e e tlotlegang mo Ninefe. ₂E rile fa a foufala a bo a na le dingwaga di le 62, mme e rile a sena go alafiwa a simolola go tshela monate, a ntsha dikatso mme nako yotlhe a baka Modimo, a goletsa bogolo jwa one.

₃E rile a le gaufi le go tlhokafala a bitsa morwawe Tobiase mme a mo naya ditaelo tse, “Ngwanaka, tsaya bana ba gago ₄mme lo itlhaganelele kwa Media, gonne ke dumela lentšwe la Modimo le le boletšweng ka Ninefe ke Nahume. Sengwe le sengwe se tlaa diragala, sengwe le sengwe se a diragala se barongwa ba Modimo, baprofeta ba Iseraele, ba se boleletseng pele kgatlhanong le Asiria le Ninefe; ga go na lepe la mofoko a bone le le tlaa bonalang le le lolea fela. Se tlaa diragala ka nako ya sone. O tlaa bo O bolekesegile mo Media go na le mo Asiria kgotsa mo Babilone. Gonne fa e le nna, ke a itse e bile ke dumela gore sengwe le sengwe se Modimo o se buileng se tlaa diragala; jalo he, go tlaa diragala, mme ga go na lepe la mafoko a boprofeta le le tlaa se kang le diragala. Bakaulengwe ba rona ba ba tshelang mo lefatsheng la Iseraele ba tlaa balwa, mme ba tlaa lelekelwa kgakala le lefatshe la bone le lentle. Kgaolo yotlhe ya Iseraele e tlaa nna sekaka, mme Samaria le Jerusalema ba tlaa fetoga sekaka, le ntlo ya Modimo, ka lobakanyana, e tlaa tlhatlhamololwa, e tshujwe. ₅Mme e tlaa re morago ga moo Modimo o ba tlhomogele pelo gape, o ba busetse kwa lefatsheng la Iseraele. Ba tlaa aga ntlo ya one gape, le mororo e tlaa se ka e nna ntle jaaka ya ntlha, go fitlhelela nako e nna teng sentle. Fela morago ga mo, botlhe ba tlaa boela gae, ba tšwa mo kgolegong, mme ba tlaa aga Jerusalema ka kgalalelo yotlhe ya gagwe, le ntlo ya Modimo e tlaa agiwa mo teng ga gagwe jaaka baprofeta ba Iseraele ba boleletse pele. ₆Mme batho botlhe ba lefatshe lotlhe ba tlaa tlhabologa, ba boife Modimo ba se na bolotsana bope. Botlhe ba tlaa latlha medimo ya bone e e seng yone, e e ba timeleditseng mo phosong, ₇mme ba tlaa baka Modimo wa dingwagangwaga ka boitshwaro jo bontle. Baiseraele botlhe ba ba tlaa bong ba bolokesegile mo malatsing ao, ba tlaa gakologelwa Modimo ka moya o o se nang bolotsana. Ba tlaa tla ba kgobokanele mo Jerusalema mme morago ga moo ba age kwa ntle ga matšhwenyego mo lefatsheng la ga Abrahama, le e tlaa nnang la bone. Mme ba ba ratang Modimo tota ba tlaa itumela. Ba ba dirang sebe le bosula bone ba tlaa nyelela mo lefatsheng. ₈Jaanong he, bongwanaka, ke batla gore lo dire jaana: direlang Modimo lo se na bolotsana, lo bo lo dire se se o itumedisang fela. Mme lo laeleng bana ba lona gore ba tšhwanetse go itšhwara sentle ka mokgwa o o tlhamaletseng, go ntsha dikatso, go nna ba gakologetšwe Modimo le go baka leina la one ka metlha yotlhe, ka moya o o se nang bolotsana le ka thata ya bone yotlhe. ₉Jalo he, ngwanaka, tloga mo Ninefe, se nne mono.

₁₀“E re fela jaaka O sena go fitlha mmago go bapa le nna, O bo O tsamaya ka lone letsatsi leo, le fa e ka ne e le ka nako efe, le gone O se ka wa bo wa nna wa diega mo lefatsheng le, le ke bonang go dira bosula le go latlha tumelo go tlotlega jaana go sa tlhabise ditlhong. A ko O akanye fela, ngwanaka, gore Nadabe o a bo a ne a dirang Ahikare rraagwe-motlamedi. A ga aa ka a patelesega go fitlhega fela, le mororo a ntse a tshela?

“Fela Modimo o ne wa dira gore molotsana a duelele bolalome jwa gagwe mmogisiwa wa gagwe a mmona, ka Ahikare a ne a senoga, fa Nadabe ene a ne a tsena mo lefifing le le sa feleng a otlhaelwa maano a a bosula a o neng a a logile kgatlhanong le botshelo jwa ga Ahikare. Ka ntlha ya ditiro tse di molemo tse ene Ahikare a neng a di dira, o ne a falola mmutlwane wa bolotsana o o bolayang o Nadabe a neng a mo thaisitse ka one, ya nna Nadabe a welang mo go one a bo a nyelela. ₁₁Jalo he, bongwanaka, lo bona gore dikatso di ka dirang, le gore bosula bo isa motho kae, bo a mmolaya. Fela jaanong ke hupela moya.”

Ba mo latsa mo bolaong jwa gagwe; a tlhokafala mme a fitlhwa ka tlotlo.

₁₂E rile mmaagwe Tobiase a tlhokafala, Tobiase a mo fitlha go bapa le rraagwe. Ke fa a ya Media a na le mosadi wa gagwe le bana. A nna kwa Ekebatana le Raguele, mogwagwadiagwe. ₁₃O ne a tlhokometse batsadi ba mosadi wa gagwe sentle, ba ba neng ba setse ba tsofala, a ba tlotlile thata, mme ya re morago a ba fitlha mo Ekebatana kwa Media. Tobiase a ja bošwa jwa ga Raguele le jwa ga Tobite rraagwe.

₁₄O ne a tshela dingwaga tse di lekgolo le lesome je le metso e e supileng, a tlotlilwe thata. ₁₅Pele ga a tlhokafala o ne a bona Ninefe a senyega. O ne a bona Baninefe ba dirwa magolegwa ba bo ba patelediwa go ya Media ke Siakare kgosi ya Media. A baka Modimo, a o bakela tsotlhe tse o neng wa utlwisa Baninefe le Masiria botlhoko ka tsone. E rile pele ga a tlhokafala a nna le gone gore a itumelele se se neng sa wela Ninefe, mme a baka Morena Modimo ka metlha le metlha. Amen.