Tobite o a Foufadiwa
1Jalo he, mo pusong ya ga Esarhaddone, ke ne ka boela gae, mme ka busediwa mosadi wa me Anna a na le morwaake Tobiase. Kwa moletlong wa rona wa Pentekonta (moletlo wa Dibeke) go ne go na le dijo tsa motshegare tse di siameng. Ka nna fatshe ka ja. 2Tafole ya tsisiwa kwa go nna le megopo ya mefutafuta ya leriwe. Ke fa ke raya morwaake, Tobiase ke re: “Ngwanaka, a ko O ye go batla monna mongwe yo o humanegileng, yo o boikanngo mo bakaulengweng ba rona ba ba leleketsweng mono Ninefe, O tle nae gore a tle go ja le nna. Ke tlaa leta go fitlhelela O bo O boa, ngwanaka.”
3Ke fa Tobiase a tswa a ya go batla monna mongwe yo o humanegileng mo bakaulengweng ba rona, fela a boa a re: “Rra.” Ka araba ka re: “Ke eng, ngwanaka?” A tšwelelapele a re: “Rra, mongwe wa setšhaba sa rona ke gone a neng a bolawa jaanong jaana, a kgamiwa a bo a latlhelwa fa fatshe mo mmarakeng, o sa ntse a le teng gone foo.”
4Ka tlola ka bonakonako, ka tlogela dijo tsa me ke ise ke bo ke di ame ka ya go tlosa monna yoo, mo mmarakeng, ka mo latsa mo go nngwe ya matlwana a me, go letela phirimo ya letsatsi gore ke tle ke mo fitlhe. 5Ke ne ka tsena gape, ka tlhapa, ka ja senkgwe se, ka kutlo-botlhoko, 6ke ntse ke gakologelwa mafoko a ga Amose moprofeta fa a bua ka Bethele a re:
Meletlo ya gago e tlaa fetolwa khutsafalo,
le dipina tsa gago di tlaa fetolwa selelo.
7Mme ka lela. E rile letsatsi le sena go phirima ka ya go epa lebitla ka mo fitlha. 8Bakaulengwe ba me ba tshega ba re: “A ko lo boneng: Ga a tlhole a tshaba sepe.” (O gakologelwe gore e ne e rile malobanyana ka bo ke kile ka tsomelwa sone selo se). “Pele ga mo o ne a tšhwanela go sia, fela ke yo, o a bo a simolotse go fitlha bašwi gape.”
9Mo bosigong joo, ke ne ka tlhapa mmele; ka bo ke ya ka kwa segotlong ke feta ke robala go bapa le lebotana la segotlo. Ka go ne go le mogote ke ne ka se ka ka ikhurumetsa sefatlhogo. 10Ke ne ke sa itse gore go na le dipeolwane mo lebotaneng le le neng le nkokame tlhogo; mantle a tsone a a bothito a ne a wela mo matlhong a me. Ga bo go nna le dibala tse ditshweu, tse ke neng ka bo ka tshwanelwa ke go di isa dingakeng gore di alafiwe. Fela le fa ba ne ba leka go nkalafa ka ditlolo di le dintsi dibala tsone di ne tsa nna tsa oketsegela go mphoufatsa, mme ya re kgabagare ka foufalela ruri. Ka nna ke sa bone dingwaga di le nne; bo-morwa-rre botlhe ba utlwa botlhoko; mme Ahikare a ntlamela dingwaga di le pedi, go fitlhelela a ya Elimaise.
11Mosadi wa me jaanong ke fa a simolola tiro ya bosadi; o ne a tle a dire leloba a tseye letsela a le loge; 12Sengwe le sengwe se se neng se rekilwe mo go ene ka thomelo o ne a se isa a bo a amogele tuelo. Jaanong fa Mopitlwe a tlhola malatsi a supa o ne a tle a fetse tironyana e o neng a e dira a bo a e isa kwa bareking ba gagwe. Ba ne ba mo duela sotlhe se ba neng ba tšhwanetse go se duela; mme ya re mo tirisanyong e ya papadi ba mo fa potsanyane gore e nne dijo.
13E rile potsanyane e e tsena mo tlung ya me ya simolola go lela. Ka bitsa mosadi wa me ka re, “Sebopiwa se se tšwa kae? Fa e le gore se utšwilwe: Ka bonako, se busetse beng ba sone; ga re a tšhwanela go ja dilo tse di utšwilweng.”
14A bo a re, “Nnyaa, e ne e le mpho e ke neng ke e neilwe fa godimo ga dituelo tsa me.” Ka se ka ka mo dumela mme ka mo raya ka re a e busetse beng ba yone (Ka utlwa ke tlhabilwe ke ditlhong fa pele ga gagwe ka selo se.) Ke fa a araba a re, “Jaanong Wa reng wena ka dikatso tsa gago? Wa reng gape ka ditiro tsa gago tse di molemo? Batho botlhe ba itse ka mo o di otlhaetsweng ka teng.”
