TOBITE 4

₁Ka lone letsatsi leo, Tobite a gakologelwa selefera e a neng a e tlogetse le Gabaele kwa Rhagese mo Media, ₂a bo a akanya a re, “Ke tsile mo jaanong ke rapelelang loso; go ne go ka nna botoka fa ke ne ke ka bitsa Tobiase morwaake mme ka mmolelela ka madi a, pele ga ke šwa.”

₃Ke fa a bitsa morwawe Tobiase a mmolelela: “Fa ke šwa, O ntirele phitlho e e tlotlegang. O tlotle mmago mme O se ka wa bo wa mo latlha malatsi otlhe a botshelo jwa gago. O dire sengwe le sengwe se a se batlang, O se ka wa bo wa dira gore a utlwe botlhoko. ₄O gakologelwe, ngwanaka, ka mo a neng a le mo dikotsing tsotlhe ka teng ka ntlha ya gago ka nako e O neng O le mo sebopelong sa gagwe ka yone. Mme e re a tlhokafala, O mo fitlhe go bapa le nna mo lebitleng le le lengwefela.

₅“Ngwanaka, ikanyege fa pele ga Morena malatsi otlhe a gago. O se ka wa bo wa kgatlhwa ke go rata go leofa kgotsa go tlola melao ya one. O dire ditiro tse di molemo malatsi otlhe a botshelo jwa gago, O se ka wa bo wa tsamaya mo ditseleng tse di sa siamang; ₆gonne fa O dira ka boammaaruri, O tlaa tšwelela-pele mo ditirong tsotlhe tsa gago fela jaaka batho botlhe fa ba dira se se siameng.

₇“O beele bontlha bongwe jwa dilo tsa gago gore O tle O ntshe dikatso ka jone. O se ka wa bo wa hularela mohumanegi ope; le Modimo ga o kitla o go hularela. ₈O lekanye dikatso tsa gago ka se O nang naso; fa O na le mo gontsi O ntshe go le gontsi; fa O na le mo gonnye, O ntshe go le gonnye, fela O se ka wa tsietsa mo go ntsheng dikatso. ₉Ka go dira jalo O tlaa ipeela namane e tona ya khumo e e tlaa go thusang ka letsatsi la go tlhoka. ₁₀Gonne go ntsha dikatso go golola motho mo losong mme go tidisa batho go wela mo felong ga lefifi. ₁₁Dikatso ke neelo e e thusang thatathata, e thusa botlhe ba ba di ntshang fa pele ga Mogodimodimo.

₁₂“Ngwanaka, O tile maitseo a a makgaphila. Itlhophele mosadi mo losikeng lwa ga rrago. O se ka wa nyala mosadi wa tšhaba se sele, yo o seng wa morafe wa ga rrago, gonne re bana ba baprofeta. O gakologelwe Noa, Abrahame, Isaka le Jakoba, borraetshomogolo go tšwa tshimologong. Botlhe fela ba ne ba nyala basadi ba ba neng ba tšwa mo losikeng lwa bone, mme ba ne ba tshegofala mo baneng ba bone, mme setšhaba sa bone se tlaa rua lefatshe. ₁₃Le wena ngwanaka, O bone fa barwarrago ba le botoka go na le batho ba sele; O se ka wa bo wa akanya go nyatsa barwarrago, barwa le barwadi ba batho ba ga eno; itlhophele mosadi mo go bone. Gonne boikgantsho bo tsala tshenyego le matšhwenyego a moya; botšhwakga bo tsala go tlhoka le lehuma, gonne mmaagwe tlala ke botšhwakga.

₁₄“Tuelo ya batho ba ba go direlang O se ka wa e tshegetsa go fitlhelela ka moso; ba duele ka bonako. Fa O direla Modimo O tlaa duelwa. O itlhokomele, ngwanaka, mo go tsotlhe tse O di dirang, O nne le boikgapo mo maitseong a gago. ₁₅O se ka wa bo wa direla ope se wena O neng o ka seka wa bo wa rata O se direlwa. O se ka wa nwa veini go fitlhelela O bo O tlhapelwa; go dira dilo ka go fetelela e se ka ya nna mopati wa gago.

₁₆“Ba ba tshwerweng ke tlala O ba fe senkgwe sa gago, mme ba ba sa aparang O ba apolele. Fa O na le dilo go feta selekanyo O ntshe dikatso. O se ka wa dira jalo ka pelo e e sa phuthologang.

₁₇“O nne pelo ka senkgwe le veini kwa mabitleng a batho ba ba siameng; fela O se ka wa direla moleofi jalo.

₁₈“O kope kgakololo mo mothong mongwe le mongwe yo o tlhalefileng, O se ka wa bo wa nyatsa kgakololo nngwe e e nang le thuso.

₁₉“O bake Morena Modimo mo dilong tsotlhe; O o kope go go bontsha tsela mo metsamaong ya gago le go diragatsa maano le maikaelelo a gago. Gonne botlhale ga bo newe setšhaba sengwe le sengwe; Morena ke ene yo o nayang dilo tsotlhe tse di siameng. Ka go rata ga gagwe o a tsholetsa kgotsa a digele kwa botennyeng jwa felo ga baswi. Jalo he, ngwanaka, O nne O gakologelwe ditaolo tse, O se ka wa bo wa dumelela gore di fokotsege mo pelong ya gago.

₂₀“Jaanong, ngwanaka, ke tšhwanetse go go bolelela gore ke tlogetse ditalenta di le some tsa selefera le Gabaele morwa Gabriase, kwa Rhagese mo Media. ₂₁O se ka wa bo wa boifa, ngwanaka, jaaka re humanegile jaana. O na le namane e tona ya khumo fela fa O tshaba Modimo, fa O tila sebe sengwe le sengwe mme O dira se se itumedisang Morena Modimo wa gago.”