TOBITE 9

₁Ke fa Tobiase a retologela kwa go Rafaele, ₂a re, “Azariase, morwarra, a ko O tseye batlhanka ba le bane le dikamela di le pedi, O ye Rhagese. ₃O ye kwa tlung ya ga Gabaele, O mo neye sesupo sa kamogelo ya madi mme O bone ka ga madi; O bo O mo laletse gore a tle nao modirong wa me wa nyalo. ₄O itse gore rre o tšhwanetse a bo a bala malatsi jaanong mme ga nkake ka bo ka senya le fa le le lengwefela a sa tšhwenyege mo maikutlong.”

₅O bona se Raguele a ikanneng go se dira; ke patelediwa ke maikano a gagwe. Ke fa Rafaele a ya Rhagese kwa Media a na le batlhanka ba le bane le dikamela tse pedi. Ba nna le Gabaele, mme Rafaele a mo supegetsa sesupo sa kamogelo ya madi, ammolelela ka nyalo ya ga Tobiase morwa Tobite, a bo a mo laleletsa modiro wa nyalo. Gabaele a simolola go mmalela dikgetsana – dikano di ne di itekanetse – ba bo ba di pega mo dikameleng. ₆Mo mosong phakela ba bothologa mmogo ba ya modirong, mme ba fitlha kwa tlung ya ga Raguele mo ba fitlhetseng Tobiase a ja teng. A ema a dumedisa Gabaele, yo o neng a itshêlêka ka dikeledi mme a mo tshegofatsa ka mafoko a, “A ngwana yo o siameng thatathata yo rraagwe a se nang sekgobo sepe, yo o tshiamo, yo o pelo mo ditirisanyong tsa gagwe! A Morena a tshele tshegofatso ya legodimo mo go wena, mo mosading wa gago, mo go rraagwe mosadi wa gago le mo go mmaagwe! A go bakwe Modimo, o bakelwe go dira gore ke bone setšhwano se se tshelang se sa ga ntsalake Tobite.”