BOTLHALE 10

₁Botlhale bo ne jwa sireletsa ralefatshe yo o neng a dirwa pele, fa a sena go bopiwa a le esi; bo ne jwa mo golola mo tlolong ya gagwe.

₂Jwa mo thatafaletsa go busa dilo tsotlhe. (Atame).

₃Mme e rile moikepi a bo hularela mo kgalefong ya gagwe, a nyelela ka o ne a bolaya morwarraagwe (Kaine).

₄Ya re lefatshe le betwa ke metsi ka ntlha ya gagwe, ya nna Botlhale gape bo le bolokang e le jone bo kgweetsang mosiami mo logonnye lo e seng lwa sepe (Noa).

₅Gape, e rile ditšhaba di tseanye mo tumalanong e e bosula, ya nna Botlhale jo bo neng jwa lemoga mosiami, jwa mmoloka a se nne molato fa pele ga Modimo, mme jwa nna jwa mo thatafaletsa go tlhomogela ngwana wa gagwe pelo (Abrahama).

₆Botlhale bo ne jwa namola mosiami fa baikepi ba ne ba nyelela. A falola molelo o o neng wa wela mo godimo ga metse e metlhano (Lota).

₇Sesupo se se bonalang sa bosula jwa yone se sa ntse se le teng: lefatshe le le se nang mosola le le tlholang le kua mosi, ditlhatshana tse di ungwang maungo a a tlholang e le makgela fela. Seolo sa letšwai se se sa ntseng se eme se ntse se gakolola moya o o sa dumeleng.

₈Gonne ka ba ne ba tlhokomologa Botlhale ba ne ba idiwa go lemoga bomolemo ba bo ba tlogelela batho segopotso sa boeleele jwa bone, gore go tlholega ga bone go se ka bo ga tlhoka go lemogwa.

₉Botlhale bo ne jwa namola batlhanka ba jone mo matshwenyegong a bone.

₁₀E rile mosiami a tshaba bogale jwa morwarraagwe jwa mo etelela pele mo ditseleng tse di tlhamaletseng, jwa mo supegetsa bogosi jwa Modimo, jwa mo ruta kitso ya dilo tse di boitshepo. Bo dirile gore matsapa a gagwe a nne le thuso, mme jwa oketsa maungo a ditiro tsa gagwe (Jakobe).

₁₁Ya re bagateledi ba gagwe ba fufega, jwa mo thusa mme jwa mo humisa.

₁₂Bo ne jwa mo tlamela kgatlhanong le baba ba gagwe, jwa mo falodisa botlhe ba ba neng ba mo laletse. Bo ne jwa dira gore a fenye mo tlhabanong e e bokete gore a tle a ithute gore bosemodimo bo nonofile go feta dilo tsotlhe.

₁₃E rile mosiami a rekisiwa Botlhale jwa se ka jwa mo hularela, mme bo ne jwa mo falodisa sebe (Josefa).

₁₄Bo ne jwa tsena nae mo kgolegelong, jwa se ka jwa mo tlogela mo dikgoleng, go fitlhelela bo mo naya tsamma ya puso le thata ya go laola barena ba ba neng ba mo gateletse. Bo ne jwa bontsha gore ba ba neng ba mmaya molato ba ne ba bua maaka mme jwa mo naya tlotlo e e sa feleng.

₁₅Bo ne jwa ntsha batho ba ba boitshepo ba ba se nang molato mo setšhabeng sa bagateledi,

₁₆Bo ne jwa tsena mo moeng wa motlhanka wa Morena, mme jwa ema dikgosi tse di boitshegang pele ka dikgakgamatso le ditshupo (Moše).

₁₇Bo ne jwa duelela baitshepi matsapa a bone, jwa ba etelela pele mo tseleng e e gakgamatsang, jwa nna loobo lwa bone motshegare, mme jwa nna lesedi la dinaledi bosigo.

₁₈Bo ne jwa ba kgabagantsha lewatle le lehibidu, mme jwa ba etelela pele go kgabaganya metsi a a boteng, ₁₉fela jwa beta baba ba bone, mme jwa ba bilola mo botennye jwa lewatle.

₂₀Jalo he, basiami ba ne ba thopela baikepi. Morena, ba ne ba opelela leina la gago difela mme ba nna seoposengwe mo go bokeng seatla sa gago se se emelang, ₂₁gonne botlhale bo ne jwa bula melomo ya dimumu mme jwa buisa diteme tsa masea sentle.