BOTLHALE 12

₁Wena, yo moya wa gago o o sa šweng o leng mo dilong tsotlhe.

₂Jalo he, ka iketlo o siamisa ba ba go kgopisang, O ba lemosa, O bo O ba gakolola ka fa ba leofileng ka teng, gore ba tle ba ikgoge mo bosuleng mme ba go ikanye, Morena.

₃Baagi ba bogologolo ba lefatshe la gago le le boitshepo ₄O ne wa ba tlhoela ditiro tsa bone tse di ferosang sebete, ditiro tsa boloi le ditirelo tse di sa itshepang, ₅wa ba tlhoela go bolaya bana ga bone mo go setlhogo, go ja meletlo ya setlhabelo ga bone ka diretlo le nama ya batho le madi a bone. Ba ne ba tšwa barutwana ba ba neng ba tšwa mo ditumelong di sele, e ne e le ₆batsadi ba ba neng ba bolaya bananyana ba batho ba ba neng ba ka se ka ba iphemela, O ne wa ikaelela go ba bolaya ka diatla tsa borraetsho.

₇Gore lefatshe le, le O le ratang go feta a mangwe le tle le amogele bathibeledi ba bana ba Modimo ba ba le tšhwanelang.

₈Fela le bone ba O ne wa ba rekegela, gonne e ne e le batho fela, wa romela meruthwane e le ditlhasedi pele ga mophato wa gago wa ntwa, go ba nyeletsa ka senya, ₉le mororo O ne O sa palelwe go lesa basiami ba tlhasela baikepi, kgotsa go ba nyeletsa gangwefela ka dibatana tsa naga kgotsa ka lentšwe le le lengwefela la kgalefo le le tšwang mo go wena.

₁₀Fela ka go ba bona molato ka iketlo O ne wa ba naya sebaka sa go ikotlhaya, le fa O ne O ntse O itse sentle fela gore bosula jwa bone ke jo bo ikepetseng, le boikepi jwa bone ke jo ba tsalwang ka jone, ₁₁le gore ba itsetsepetse mo popegong ya mogopolo wa bone: gonne e ne e le setšhaba se se hutsegileng go tšwa tshimologong, le gone e ne e se gore O tshaba mongwe fa O ne O ba tlogela ba sa otlhaelwa dibe tsa bone.

₁₂Ke mang yo o a bong a ka go raya, a re: “O dirile eng?” Ke mang yo o ka emelanang le katlholo ya gago? Ke mang yo o ka go sekisang fa O nyeletsa ditšhaba tse e leng wena O di bopileng? Ke mang yo o ka emang fa pele ga gago mme a go gwetlha a re o ka buelela baikepi?

₁₃Gonne ga go na Modimo ope, kwa ntle ga gago o o tlhokomelang sengwe le sengwe, o O ka nnang wa tshwanela go o bontsha gore ga O ise O ko O atlhole ka tshiamololo; ₁₄le gone ga go na kgosi epe kgotsa mogateledi yo o ka emang fa pele ga gago mme a go sekisetsa go otlhaya ba O ba otlhaileng.

₁₅O siame mme O laola dilo tsotlhe ka tshiamo, O bona go sa tšhwanele thata ya gago go bona motho yo o sa tšhwanelang go otlhaiwa molato.

₁₆Thata ya gago ke yone motšwedi wa tshiamo ya gago, mme borena jo bogolo jo O busang botlhe ka jone ke jone bo dirang gore O rekegele botlhe.

₁₇Ka gore O supa nonofo ya gago fela fa batho ba belaela botlalo jwa thata ya gago, O bo O otlhaya makgakga a ba ba e itseng.

₁₈Fela, le fa O ka dirisa nonofo e ya gago, O atlhola ka bonolo; O busa ka thekegelo e kgolo; gonne fa O batla fela thata ya gago e setse e bile e le teng.

₁₉Ka go dira jalo O ne O ruta batho ba gago gore mosiami o tšhwanetse go nna bonolo mo go ba ga gabo, mme O neile bomorwao tsholofelo e e molemo ya gore morago ga go leofa O tla ba thusa ka lobaka lwa go ikwatlhaya.

₂₀Gonne fa e le gore O ne wa otlhaya baba ba bana ba gago ka tlhokomelo le bomolemo jo bontsintsi fa tota ba ne ba tšhwanelwa ke loso mme wa ba fa nako le sebaka sa go iphimola bosula jwa bone, ₂₁kana ruri O atlhotse bomorwao ka thekegelo jang, ba bagologolo ba bone O kileng wa ba naya ditsholofetso tse di molemo ka maikano le dikgolagano!

₂₂Jalo he, e re O re siamisa jaana, O kgwathise baba ba rona thata go feta go menaganye ga dikete tse some, go re ruta gore e re re atlhola, re akanye ka bomolemo jwa gago, mme e re re atlholwa re solofele boutlwelo-botlhoko.

₂₃Ke gone ka moo O neng wa dirisa bomašwe jwa ba ba neng ba tshela botshelo jwa boikepi le boeleele go utlwisa bone batho ba botlhoko.

₂₄Ba timeletse kgakala tota le ditsela tse e neng e setse e le ditsela tsa timelo mo e leng gore ba ne ba bo ba tsaya diphologolo tse e seng tsa sepe, tse di nyatsegang thatathata fela, jaaka medimo; e le gore ba tsietsegile fela jaaka bananyana ba ba se nang tlhogo.

₂₅Jalo he, O ne wa ba otlhaya O ba tshega ka lesotlo jaaka bananyana ba ba se nang tlhaloganyo.

₂₆Fela bone ba ne ba tlhokomologa tshiamiso e e motlhofo e ya ditshego mme ba ne ba tloga ba bona kotlhao e e tshwanelang Modimo.

₂₇E rile ba tennwe ke se ba neng ba se boga mo dibataneng tse, ke gore tsone dibatana tse ba neng ba di tsaya jaaka medimo, tse jaanong e neng e le mokgwa wa go ba otlhaya, ba bona sentle mme ba lemoga gore Modimo o ba neng ba ntse ba gana go o itse go fitlhelela nako eo, e ne e le one Modimo tota. Ke gone ka moo ba neng ba otlhaiwa ka kotlhao e kgolo.