BOTLHALE 16

₁Ke gone ka moo, batho bao ba neng ba otlhaiwa ka tshwanelo ka tsone dibopiwa tse di ntseng jaana, ba utlwisiwa botlhoko ke motlhape o montsi wa dibatana.

₂Boemong jwa kotlhao e, O ne wa tšhwara batho ba gago ka bonolo, wa ba baakanyetsa maphurrwana gore ba a je, nama e e monate e e neng ya itumedisa keletso ya bone.

₃Ka mokgwa o, Baegepeto, e rile ba bona dibopiwa tse di ferosang sebete tse di neng di rometšwe kgatlhanong le bone, ba utlwa ba latlhegelwa le ke keletso ya tlhago ya go ja tota, le mororo ba ne ba eleditse dijo. Mme batho ba gago bone, e rile morago ga nako e khutšhwanyane ya go tlhoka dijo ba newa dijo tse di monate go ja.

₄Gonne go ne go tlhokega gore bagateledi ba tlelwe ke go tlhoka mo go botlhoko, fa ba, bone, ba ne ba bontshiwa fela gore baba ba bone ba utlwisiwa botlhoko jang.

₅E rile bogale jo bo boitshegang jwa dibatana tsa naga bo wela Baiseraele godimo, mme ba nyelediwa ke malomo a dinoga tse di menekganang, bogale jwa gago jwa se ka jwa nnela ruri go fitlhelela bokhutlo.

₆Ba ne ba utlwisiwa botlhoko ka nako e khutšhwanyane fela gore ba ke ba tlhagisiwe, gonne ba ne ba na le sesupo se se bolokang se se neng se ba gakolola taolo ya Molao wa gago.

₇Ka gore mongwe le mongwe yo o neng a se leba o ne a bolokwa, e seng ke se a neng a se bona, fela o ne a bolokwa ke wena, Mmoloki wa botlhe.

₈Mme ka mokgwa o O ne wa bontsha baba ba rona gore ke wena yo o gololang mo bosuleng bongwe le bongwe; ₉gonne ba ne ba bolawa ke malomo a tsie le dintsi, mme go ne ga se ka ga bonwa molemo ope go ba fodisa; ka ba ne ba tšhwanelwa ke go otlhaiwa ka dibopiwa tse di ntseng jalo.

₁₀Fela bomorwao bone ga ba a ka ba bo ba digwa le ke meno a dinoga tse di botlhole tota, gonne boutlwelo-botlhoko jwa gago bo ne jwa ba thusa, jwa ba fodisa.

₁₁Ba ne ba lomiwa gore ba tle ba gakologelwe mantšwe a gago, mme ba tloga ba gololwa ka pele, gore ba tle ba se ka ba go lebala thata, mme ba latlhegelwa ke bomolemo jwa gago.

₁₂E ne e se mothušwana ope, kgotsa setlolo sepe se se tshasiwang go fapiwa ntho ka sone se se neng sa ba fodisa. E ne e le lentšwe la gago, Morena, le le alafang batho botlhe, ₁₃gonne ke wena O laolang botshelo le loso; O gogela batho kwa dikgorong tsa bobipo, O bo O ba busa.

₁₄Motho, ka bosula jwa gagwe, o ka bolaya yo mongwe, Fela ga a kake a busa moya o o tsamaileng, kgotsa a golola moya o Bobipo bo setseng bo o amogetse.

₁₅Ga go na ope yo o ka kgonang go falola seatla sa gago.

₁₆Baikepi ba ba neng ba gana go go itse ba ne ba kgwathisiwa ke letsogo la gago: Ba tlhomarwa ke dipula tse di sa tlwaelesegang, le sefako, le matsorotsoro a a boitshegang. Ba gaupanngwa ke molelo.

₁₇Mme se se neng sa gakgamatsa go feta moo ke fa mo metsing a gale a timang dilo tsotlhe, molelo o ne wa tutuma go feta gale, gonne dilo tsa lefatshe di femela basiami.

₁₈Ka nako e nngwe kgabo ya molelo e ne e tle e bobalale gore e tle e se ka ya fisa diphologolo tse di neng di romeletšwe go tlhasela baikepi, o ba supegetsa sentle fa ba bona se gore katlholo ya Modimo e ba setse morago.

₁₉Mme ka nako e nngwe e ne e ka re mo gare ga metsi, kgabo ya tutuma ka bogale jo bo fetang jwa molelo o o tlwaelesegileng go gaupanya thobo ya lefatshe le le molato.

₂₀Boemong jwa dilo tse batho ba gago bone O ne wa ba fa dijo tsa baengele, wa se ka wa lapa go nna O ba folosetsa senkgwe se se fologang kwa legodimong, se se apeetšweng ruri, se na le monate mongwe le mongwe, se natefelela mongwe le mongwe.

₂₁Gonne kotlo e O neng wa e aba e ne e bontsha bomonate jwa gago mo baneng ba gago, mme ya re senkgwe se se natefelela mongwe le mongwe yo o neng a se ja, sa itira sengwe se moji mongwe le mongwe a neng a se eletsa.

₂₂Kapoko le metsi a a gatsetseng a ne a emelana le molelo a sa gakologe, gore ba tle ba itse gore thobo ya baba ba bone e ne e ka nna ya senngwa ke molelo o o tutumang mo sefakong, o o lakaselang pula e ntse e na, ₂₃fa molelo o o ne o ka nna wa lebala thata ya one ya tlhago gore o tle o jese basiami.

₂₄Gonne dibopiwa di tlhwaafalela go otlhaya baikepi ka ntlha ya go go utlwa, mme ka bonolo di iketlela ba ba go ikanyang.

₂₅Ke gone ka moo, ka nako eo, le gone, di neng tsa tsaya dipopego di sele gore di tle di direle bopelo jwa gago jo bo otlang thata, di itumedisa dikeletso tsa ba ba neng ba tlhoka, ₂₆gore bana ba gago ba O ba ratang, Morena, ba tle ba ithute gore ga se dithobo tsa mehutahuta tse di otlang motho, mme ke lentšwe la gago le le bolokang ba ba go ikanyang.

₂₇Gonne se molelo o neng o ka se ka wa se senya, se ne sa nyerisiwa ke marannyana a letsatsi, ₂₈go re bontsha gore, re tšhwanetse go tsoga letsatsi le ise le tlhabe go go leboga, mme re go rapele mahube a tlhaga; ₂₉gonne tsholofelo ya ba ba se nang tebogo e tlaa nyera jaaka kgokgotshwaane ya mariga, mme e tlaa elela jaaka metsi a a itshenyegelang fela.