1Mosiami o tlaa ema a sa boife sepe kgatlhanong le ba ba neng ba mmogisa, le ba ba neng ba lebela dipogo tsa gagwe kwa tlase.
2E tlaa re ba mmona ba roromake ke letshogo le le boitshegang, ba akabadiwe ke go bona a bolokwa ba ne ba sa lebelela.
3Ba tla buisana ba ikwatlhaya mme e tlaa re ba le mo kutlo-botlhokong e ba dumaele mme ba bue ba re: 4“Motho yo ke ene yo re kileng ra bo re mo tshega re mo sotla, rona masilo! Re ne re ithaya re re botshelo jwa gagwe ke botseno, mme bokhutlo jwa gagwe bo a nyatsega. 5Go tsile jang gore a balelwe le bana ba Modimo? go tsile jang gore a bo a tlhakanngwe le baitshepi? 6Ntseana ke rona ba re neng re leleretse kgakala le boammaaruri, lesedi la tshiamo le sa phatsime mo go rona, mme letsatsi le ise le re tlhabele. 7Re kgarakgatshegile le ditselana tsotlhe tsa boleo le tshenyego, ra pholethaka le sekaka se se iseng se ke se tsamaiwe, fela tsela ya Morena yone ra se ka ra bo ra e itse. 8Kana ruri boikgogomoso bo re buseditse eng? Go ikaaka le dikhumo di re file eng? 9Dilo tse tsotlhe di nyeletse fela jaaka moriti, jaaka mošwadilenyana fela o o iphetelang, 10jaaka sekepe se se fatolang makhubu a a kokomogang, se sa tlogele motlhalanyana ope go supa fa se fetileng teng, kgotsa moselenyana mongwe o se o dirileng ka sehuba sa sone mo makhubung. 11Kgotsa jaaka nonyane e a re e fofa e sutlha phefo, e se ke e tlogele le fa e le sesuponyana sa go feta ga yone, e phaila moya ka go phaphasela ga diphuka tsa yone, e o phunyeletsa ka sekgatlha sa go fofa ga yone, e tsubalala ka go foka-foka ga diphuka tsa yone mme e re morago go bo go sa bonale sesupo sepe sa gore e kile ya feta foo. 12Kgotsa jaaka e a re motsu o fulelwa kwa paakaneng nngwe, phefo e e phunyeleditšweng jalo e re e itšwala ka bonako go se ke go bo go itsiwe gore a motsu o o kile wa fetela kae. 13Go ntse fela jalo ka rona, e a re e le gone fela re bonwang, re bo re bile re khutlile go nna gone, e le gore tshiamo, ga go na le fa e le motlhalanyana wa yone o re ka o supang, re mpile ra tshelela mo go direng bosula.”
14Nnyaa tlhe, tsholofelo ya moikepie tšhwana le moko o o tsewang ke phefo, kgotsa kgokgotšhwaane e e phatlaladiwang ke sefefo. E phatlalala jaaka mosi fa phefo e foka. E feta fela jaaka kgakologelo ya moeng wa letsatsi le le lengwefela.
15Fela basiami ba tshela ka bosakhutleng. Tuelo ya bone e mo Moreneng. Mogodimodimo o a ba tlamela.
16Jalo he, ba tlaa amogela serwalo sa bogosi se se galalelang le hutshe e ntle mo mabogong a Morena, gonne o tlaa ba sireletsa ka seatla sa gagwe se se siameng mme a ba femele ka letsogo la gagwe.
17O tlaa tsaya lorato lwa gagwe lo lo lefufa jaaka ditlhomelo tsa ntwa. O tlaa dirisa dibopiwa go otlhaya baba ba gagwe.
18O tlaa dirisa tshiamo jaaka tshireletso ya sehuba sa gagwe, a bo a rwale tshiamo e e seng letlhotlho jaaka kokoro.
19O tlaa tsaya boitshepo jaaka thebe e e sa phunyegeng, 20o tlaa lootsa bogale jo bo tukang gore e nne tšhaka, mme dibopiwa di tlaa gwanta nae go ya go lwa le difafalele tsa ditseno.
21Marumo a e kete dikgadima a tlaa korolwa, a tsapogele kwa sekonopiweng jaaka fa a tšwa mo boreng jo bo gogilweng sentle jwa maru, 22mme dikgolokwe tsa sefako di tlaa kolopiwa di tletse kgalefo jaaka e kete di betsega mo seragantšwaneng. Metsi a lewatle a tlaa ba galefela, dinoka di ba bete ka bosetlhogo, 23moya wa Bothatiyotlhe o tlaa ba tsogela, mme jaaka setsuatsuwe o ba alose; boikepi bo tlaa senya lefatshe lotlhe mme go dira bosula go pitikolole ditilo tsa segosi tsa babusi.
