2 VHAKORINTA 5

₁Ndi uri ri ḓivha uri arali thumba yashu ya fhano shangoni i tshi thuthea, ri ḓo wana Mudzimu o ri fhaṱela pfamo ngei ṱaḓulu; ndi muḓi u songo itwaho nga vhathu, we ra lugiselwa nga Mudzimu Ene muṋe, wa lini na lini. ₂Rí fhano thumbani ri a gomela ro lavhelela u ambadzwa pfamo yashu ya ngei ṱaḓulu; ₃ngauri ró no i ambadzwa a ri nga vhonali ri fhedzi. ₄Ri tshi kha ḓi vha thumbani ino ri dzula ri tshi gomela nga u pfa vhuleme: a ri funi u thoma ra thuthelwa thumba iyi, ri funa u sokou ambadzwa pfamo iyo nṱha hayo, uri tshi faho tshi midzwe nga vhutshilo, ₅ngeno Mudzimu Ene muṋe o dzula o ri tela zwenezwo zwa u thoma u thuthelwa thumba hedzi, a khwaṱhisa zwine ra ḓo wana nga u ri ṋea Muya wawe.

₆Ndi zwine ra sa nete, nga u ḓivha uri ri tshi kha ḓi vha kha muvhili uno, ri tshee kule na hayani henengei ha Muṋe washu. ₇Fhano ri tshila nga lutendo, hu si nga zwine ra zwi vhona nga maṱo. ₈A ri neti, ngauri ri pfa zwi khwiṋe u fhandekana zwashu na muvhili uno ra ya hayani hune ra ḓo dzula na Muṋe washu. ₉Ngauralo tshililelwa tshashu ndi tshithihi – arali ri tshee fhano kana ro no pfulutshela henengei – tshine ra tama ndi u takadza Ene. ₁₀Hufha roṱhe ro fanela u ima phanḓa ha Khristo uri ri haṱulwe ngae. Ndi hone muṅwe na muṅwe a tshi ḓo wana zwo fanelaho zwiito zwawe zwa musi a tshi kha ḓi tshila fhano shangoni, zwivhuya kana zwivhi.

₁₁Zwino-ha vhunga ri tshi ofha Muṋe washu, ri edzisa u kwengweledza vhathu. Hone Mudzimu ndi Ene ane a ṱalukanya zwine ra vha zwone. Hone ndi na fulufhelo ḽa uri na inwi mbiluni dzaṋu ni a nṱalukanya-vho. ₁₂A si uri ri khou dovha ra ḓiṱanziela uri ni ri takalele lini; ri khou tou ni sumbedza tshine na nga ri zuwa ngatsho ni tshi fhindula vhaḽa vhane vha zuwa lukanda lwa muthu vha sa sedzi zwa mbiluni. ₁₃Arali ro ṱangana ṱhoho ndi u itela Mudzimu; arali ro dzivhuluwa ndi u itela inwi. ₁₄Ri tou kombetshedzwa nga lufuno lwa Khristo, ngauri ri tenda uri muthihi ó fela vhoṱhe, zwenezwo vhoṱhe vho fa. ₁₅O fela vhoṱhe uri vha tshilaho vha si tsha ḓitshilela, vha tshilele Ene we a vha fela a dovha a vuwa hu u itela vhone.

₁₆Vhunga zwo ralo, u bva zwino a ri tsha sedza muthu nga kusedzele kwa vhathu. Na Khristo naho kale ro vha ri tshi mu sedza nga kusedzele kwa vhathu, zwino a ri tsha mu sedza nga u ralo. ₁₇Zwino-ha arali muthu o vha muthihi na Khristo ndi tsiko ntswa; ya kale yo fhela, ho ḓa ntswa. ₁₈Zwoṱhe hezwi zwi itwa nga Mudzimu, o ri pfumedzanya na Ene muṋe nga Khristo a konou ri ita vhaḓinḓa vhawe vha u ḓivhadza vhathu a u pfumedzana nae. ₁₉Mafhungo ane ra a ḓivhadza ngea: Khristo a tshi ḓa ndi Mudzimu we a vha a tshi khou pfumedzanya shango na Ene muṋe, a si tsha vhala u khakha havho, a ri kumedza mafhungo ayo a uri vhathu vha pfumedzane nae. ₂₀Zwino-ha ri fhano ri vhaḓinḓa vha Khristo, zwa nga ndi Mudzimu Ene muṋe ane a khou ni ṱuṱuwedza nga riṋe. Ri a ni humbela ri vhuimoni ha Khristo, ri ri: pfumedzanani na Mudzimu. ₂₁Khristo o vha a si na vhutshinyi, naho zwo ralo Mudzimu a ita uri a nge mutshinyi, uri riṋe ri pfumelelwe nga u itwa vhathihi nae.