VHAKOLOSA 2

₁Litshani ndi ni vhudze uri ndi ḓidina hani ndi tshi ni shumela, nda shumela na vhaḽa vha Laodikia na vhoṱhe vha nnḓivhaho nga bvumo fhedzi hu si nga tshifhaṱuwo. ₂Tshine nda lwela ndi u ni ṱuṱuwedza uri ni tou oma kha lufuno, ni vhe na ṱhalukanyo khulu yo tou khunyelelaho, ni kone u ṱalukanya tshiphiri tsha Mudzimu. Tshiphiri itsho ndi amba Ene Khristo, ₃ngauri ndi Ene tshisiku tshine lupfumo lwoṱhe lwa vhuṱali na nḓivho lwa rafhiwa khatsho.

₄Ndi ralo ngauri a thi funi muthu a tshi ni xedza nga haṋwani ha u ḓifha zwa vho ni ḓaḓisa. ₅Naho ndi siho henefho nga tsha vhukoma, hone mbilu yanga i henengeo, nahone ndi takalela u pfa uri a ni vilinganyi zwithu, na u fulufhela haṋu Khristo a hu dzinginyei.

₆Vhunga zwino no ṱanganedza Khristo Yesu a vha Muṋe waṋu, tshilani-ha unga vhalanda vhawe; ₇ni tou ṱoka midzi na u fhaṱwa khae, ni khwaṱhe kha lutendo lwonolwo lwe na gudiswa lwone ni si lu ponyokise; ni tou fhufhuma ndivhuho misi yoṱhe.

₈Ni vhone hu sa ḓo vha na ane a ni thuba nga vhuṱali ha vhufhura. Ndi zwithu zwi simuwaho kha mihumbulo ya vhathu, zwa u tevhedza tsinde ḽa zwidayodayo zwa shango, hu si Khristo. ₉Kha Khristo hu dzula Mudzimu, zwoṱhe zwine Mudzimu a vha zwone zwa tou khunyelela khae zwa ambara muvhili. ₁₀Huno na inwi nge na vha vhathihi nae no no vha tshenetsho tshe Mudzimu a ri ni vhe tshone. Ndi Ene ṱhoho ine vhavhusi na vhalangi vhoṱhe vha tshikhalani vha simuwa khae.

₁₁Na u fumba no no ḓi fumba nge na vha vhathihi nae, hu si u fumba hu itwaho nga vhathu lini, hai, no fumbiswa nga Khristo. U fumba ndi amba u bvula tsiko yaṋu ya kale. ₁₂Zwo itea nge ni tshi lovhedzwa ha tou vha u swiṱwa nae. Nge na fulufhela maanḓa a Mudzimu we a mu vusa vhafuni no vha vhathihi nae, na vuswa nae vhafuni.

₁₃No vha no dzula no fa, ni tshi dzula ni tshi pfuka Mulayo wa Mudzimu, tsiko yaṋu í songo fumba. Hone Mudzimu a ri hangwela u khakha hashu hoṱhe uho, a vho ni ita vha tshilaho khathihi na Khristo. ₁₄O thutha luṅwalo lwa milandu yashu lwe lwa vha lu tshi ṱwela u ri vhila, a lu fhahea henefhaḽa tshifhambanoni ha vha u fhela halwo tshoṱhe, ₁₅a ṱangula vhahulwane na vhalangi vha thuṅwa vha re tshikhalani, a vha ṱana vhathuni sa mathubwa, ha vha u kumbwa nga Khristo a tshi ḓala muḓalo.

₁₆Zwenezwo ni songo tsha tenda muthu na muthihi a tshi ni vhea mulandu nga zwa u ḽa na zwa u nwa, naho zwi zwa maḓuvha a vhuṱambo ha Majuda, nangwe zwi zwa u dzula ha miṅwedzi, kana zwa Sabatha. ₁₇Zwoṱhe hezwo ndi mirunzi zwayo ya hezwi zwe zwa pfi zwi ḓo ḓa. Ene vhukuma ane hezwo zwa vha mirunzi yawe ndi Khristo. ₁₈Ni songo tenda u fhuriwa nga vhathu vhane vha sokou ḓihudza vha ri vho vhona mabono, vha tshi ita na u vhaisa muvhili nga u ḓidzima, na u rerelela vharuṅwa, ngeno mihumbulo yavho i yone i laulwaho nga tsiko yavho ya kale, ₁₉vha si tsha farelela Khristo, Ene ṱhoho ya tshivhidzo. Ndi Ene ane muvhili woṱhe wa farakana u tshi ya nga zwiendanungo, wa ṱumekana nga misipha, wa konou aluwa nga hune Mudzimu a funa ngaho.

₂₀Hufha no fa na Khristo ha vha u fa siani ḽa zwidayodayo zwa shango ḽino. Zwino ni kha ḓi tshilelani sa vhathu vha shango ḽino. Ni kha ḓi tevhedzelani zwidayo zwine zwa ri, ₂₁“U songo fara tshauri na tshauri,” “U songo thetshela tshigede,” “U songo kwama tshikene.” ₂₂Matsina hezwo zwoṱhe ndi zwithu zwe zwó shuma zwa fhela zwi sa tsha vha hone; zwidayo na zwipfunzo hezwo ndi zwa vhathu. ₂₃Zwenezwo zwi nga zwi na vhuṱali nga vhurereleli ha u ḓiitela, na nga u ḓidzima, na u langa muvhili nga tshiṱuhu, hone zwi sa vhuyi zwa farisa tshithu kha u tsikeledza tsiko mmbi ya muthu.