DOTORONOMIO 21

₁“Arali shangoni ḽine Muṋe washu a ni ṋea uri ḽi vhe ḽaṋu ha wanala muthu o vhulawaho ḓakani, hu si na muthu a no ḓivha uri o vhulawa nga nnyi, ₂zwenezwo vhahulwane vhaṋu na vhahaṱuli vha fanela u ela tshikhala tsha u bva kha tshitumbu u swika kha miḓi i re henefho tsini, ₃vhahulwane vha muḓi une wa wanala u wone u re tsini ha tshitumbu vha konou dzhia tholehadzi i sa athu vhewa dzhogo, ₄vha i isa mulamboni u elaho, hu songo limiwaho, hu songo gobelwaho mbeu, vha i vunḓa mutsinga henefho mulamboni.

₅“Zwenezwo hu ḓo sendela vhotshifhe, vhone Vhalivi, ngauri ndi vhone vhe Muṋe washu Mudzimu waṋu a vha nanga uri vha mu shumele thembeleni, na u shudufhadza vhathu nga dzina ḽawe, na u haṱula mafhungo a u pomokana na a u huvhadzana. ₆Vhahulwane vhoṱhe vha muḓi we tshitumbu tsha wanala tsini hawo vha ḓo ṱamba zwanḓa nṱha ha tholehadzi iyo yo vunḓiwaho mutsinga henefho mulamboni, ₇vha ṱanzilela vha ri, ‘A si zwanḓa zwashu zwo shululaho malofha aya, na maṱo ashu ho ngo zwi vhona zwi tshi itea.’ ₈Vha konou rabela vha ri, ‘Muṋe washu, iwe wo ri vhofhololaho, pfumelela lushaka lwau lwa Israele kha malofha a uyu muthu a si na mulandu, u songo ri hwesa mulandu wa malofha aya.’ ₉Ngauralo ni ḓo vha no thutha mulandu wa malofha a muthu a songo tshinyaho a si tsha vhilwa kha inwi, ngauri ni ḓo vha no ita zwine zwa takadza Muṋe washu.

₁₀“Arali ni tshi bvela maswina aṋu pfumo, Muṋe washu Mudzimu waṋu a vha kumedza zwanḓani zwaṋu, na thuba vhathu, ₁₁kha mathubwa ayo wa vhona musadzi o nakaho, wa funana nae wa mu dzea, ₁₂u fanela u mu isa hayani hau wa mu palula ṱhoho wa tshea na ṋala dzawe, ₁₃wa mu ambadza zwiambaro zwiswa, a ri u fhedza ṅwedzi woṱhe e nḓuni yau a tshi lilela vhabebi vhawe, ha vha hone u tshi ḓo tendelwa u mu vhinga wa mu dzhenisa nḓuni a vha musadzi wau. ₁₄Hone arali ngavhuya wa pfa u sa tsha mu takalela, u fanela u mu vhofholola uri a ye hune a funa; u songo mu rengisa kana wa mu ita phuli, ngauri o vha e musadzi wau.

₁₅“Arali munna e na vhasadzi vhavhili, a tshi funa muṅwe u fhira muṅwe, vhoṱhe vha mu bebela vhana vha vhatukana, hone tanzhe e ṅwana wa musadzi a sa funwiho, ₁₆musi a tshi kovha ifa ho ngo tendelwa u ṋea ṅwana wa musadzi mufunwa ifa ḽa tanzhe a ḽi dzhiela ṅwana wa a sa funwi a re ene tanzhe vhukuma. ₁₇Onoyo a re tanzhe ḽo fanelaho, naho e ṅwana wa musadzi a sa funwi, u fanela u mu ṋea mikovhe mivhili ya thundu yawe yoṱhe, hufha e ene we a thoma u mu beba, o tewa nga ifa ḽa tanzhe.

₁₈“Arali muthu e na ṅwana a no nyadza vhabebi a sa thetshelesi vha tshi mu laya, e khundavhalai, ₁₉khotsi awe na mme awe nga vha mu dzhie vha mu ise khoroni ha vhahulwane vha muḓi uyo, ₂₀vha vhudze vhahulwane vha ri, ‘Uyu ṅwana washu ndi khundavhalai, u a ri nyadza, ha ri thetshelesi, ndi khusha, ndi tshidakwa.’ ₂₁Zwenezwo vhanna vhoṱhe vha uyo muḓi vha fanela u mu kanḓa nga matombo vha mu vhulaha. Ndi hone ni tshi ḓo fhelisa vhuvhi uho ha si tsha pfala kha inwi. Vhaisraele vhoṱhe vha ḓo zwi pfa vha ofha.

₂₂“Arali muthu o tshinya lwo eḓanaho lufu, na mu vhulaha nga u mu isa thamboni, ₂₃ni songo sia tshitumbu tshawe tsho nembelela murini ḽa vhuya ḽa kovhela, ni fanela u mu swiṱa ḓuvha ḽeneḽo, ngauri muthu o nembeledzwaho o teketelwa nga Mudzimu; ni songo kumadza shango ḽine Muṋe washu Mudzimu waṋu a ni ṋea uri ḽi vhe ḽaṋu.