VHAEFESA 1

₁Ndi nṋe Paulo we nda vha muapostola wa Khristo Yesu nge Mudzimu a zwi funa. Ndi ṅwalela inwi vhakhethwa vha Mudzimu ngeo Efesa vha fulufhedzeaho kha Khristo Yesu. Ndi khou ni resha ndi ri: ₂Ngavhe Mudzimu Khotsi ashu, na Muṋe washu Yesu Khristo vha tshi ni itela vhuthu na vha na mulalo.

₃Nga hu rendwe Mudzimu, Khotsi a Muṋe washu Yesu Khristo, Ene we nga Khristo a ri ṋea mashudu oṱhe a zwa muya a bvaho ṱaḓulu. ₄Zwiḽa shango ḽi sa athu na u sikiwa o vha o no ḓi ri nanga nga Khristo, uri a tshi ri sedza a vhone ri vhakhethwa ri sa solisei. Nga lufuno lwawe ₅o vha o no dzula o ri ta u vha vhathihi na Yesu Khristo uri ri vhe vhana vhawe. Hezwo o zwi ita nge a tou zwi funa Ene muṋe, ₆uri ri kone u renda vhuthu hawe vhungafhangafha he a ri itela nga Murwa mufunwa wawe.

₇Onoyo Murwa o ri rengulula nga malofha awe uri ri hangwelwe u khakha hashu. Ngoho vhuthu ha Mudzimu ndi vhuhulu! ₈O ri kovhela hone lwa u tou wa muwa nga vhuṱali vhuhulu na ṱhalukanyo. ₉A ita zwe a vha o dzudzanya nga u funa hawe, a ri dzumbululela tshiphiri tsha zwe a vha o ḓiimisela u zwi ita nga Khristo, ₁₀a konou zwi khunyeledza ngae musi tshifhinga tsho swika. Zwino-ha tshe a vha o ḓiimisela ndi u ṱanganya tsiko yoṱhe ya zwi re ṱaḓulu na fhano fhasi uri zwoṱhe zwi vhuswe nga ṱhoho nthihi, Ene Khristo.

₁₁Mudzimu u tshimbidza zwoṱhe nga hune a tou funa Ene muṋe. Zwenezwo o dzula o zwi dzudzanya u bva mathomoni, a ri ta uri ri vhe mukovhe wawe nga u vha vhathihi na Khristo. ₁₂Hezwo o zwi itela uri riṋe Majuda vhe ra vha vha u ranga u ṱulutshela Khristo ri rende vhugala ha Mudzimu. ₁₃Na kha inwi vhannḓa zwo ralo: musi ni tshi pfa mafhungo maḓifha ane na tshidzwa ngao, ane a vha yone ngoho ye ra laedzwa, no fulufhela Khristo, Mudzimu a tshi ni swaya nga luswayo lwawe nga u ni ṋea Muya Mukhethwa we na fulufhedziswa. ₁₄Muya ndi Ene tshiga tsha u khwaṱhisa uri ri ḓo wana mukovhe we Mudzimu a ri fulufhedzisa, musi a tshi ḓo vhofholola tshoṱhe vha re vhawe, uri vhugala hawe vhu rendwe ngazwo.

₁₅Ndi tshi pfa uri ni fulufhela hani Muṋe washu Yesu na uri ni funa hani vhakhethwa vhoṱhe vha Mudzimu, ₁₆a thi litshi u mu livhuha. Ndi dzula ndi tshi ni rabelela ₁₇uri Khotsi wa vhugala a re Mudzimu wa Muṋe washu Yesu Khristo a ni ṋee vhuṱali vhune ha bva kha Muya, a ni dzumbululele Mudzimu ni mu ḓivhe, ₁₈maṱo a mbilu dzaṋu a vhonetshelwe, ni kone u ṱalukanya zwe Mudzimu a ni fulufhedzisa musi o ni vhidza, na uri vhugala ha mukovhe we Mudzimu a vhetshela vhakhethwa vhawe ndi vhungafhani, ₁₉na vhuhulu ha maanḓa awe. Maanḓa a Mudzimu ndi a shumaho, ha imedzanwi nao, ha na mugumo, a fhira zwoṱhe. Eneo maanḓa a shumaho kha riṋe vhane ra mu fulufhela ndi one ₂₀e a vusa ngao Khristo vhafuni, a mu dzudza thungo ya tshanḓa tshawe tshauḽa hangei ṱaḓulu vha vhusa vhoṱhe. ₂₁Zwenezwo Khristo u vho vhusa vhavhusi vhoṱhe, vharuṅwa na thuṅwa na vhalangi vhadzo na vha maanḓa na vhahulwane, kana vhahulwane vhafhio na vhafhio, vha tshifhinga tshino na tshi ḓaho, u a vha vhusa vhoṱhe. ₂₂Mudzimu o ita zwoṱhe vhukando hawe, a mu vhumba ṱhoho ya tshivhidzo i re nṱha ha zwoṱhe. ₂₃Tshivhidzo tshone ndi muvhili wa Khristo; ndi tshone tshine a vha o khunyelelaho ngatsho, Ene-vho ndi Mukhunyeledzi wa zwoṱhe hoṱhe-hoṱhe.