ESEKIELE 19

“Mme au o vha e mini?

O vha e ndaukadzi yo tangwaho nga dzindaunduna,

yo shuvhama vhukati ha ndawana i tshi lela ndawana dzayo.

₃Yo lela iṅwe ndawana yayo,

ya aluwa ya vha ndau ya nduna;

ya guda u zwima na u ponda,

ya vha ḽidyavhathu.

₄Tshakha dza pfa bvumo ḽayo dza yo lwa nayo,

ya fashwa nga khunḓa yavho;

vha i khwikhwidzela kule nga zwihovhi

vha i isa shangoni ḽa Egipita.”

₅“Ndaukadzi ya lavhelela ya ṱovhowa,

ya fulufhuwa,

ya dzhia iṅwe ndawana yayo,

ya i ita ndau ya maanḓa.

₆Ya aluwa ya yo zwima na dziṅwe ndau,

ya aluwa ya vha ndau ya maanḓa;

ya guda u zwima na u ponda,

ya vha ḽidyavhathu.

₇Ya tshoṱhela pfamo dzavho,

ya phusukanya miḓi yavho;

shango na vhathu vhaḽo vha tshenuswa

nga mubvumo wa u vhomba hayo.

₈Tshakha dza bva dza yo lwa nayo,

vha tshi bva mashangoni o i tangaho,

vha i ṱharamudzela mambule,

ya fashwa nga khunḓa yavho.

₉Vha i kokodzela dangani nga zwihovhi,

vha i isa ha khosi ya Babele;

vha i longa ngomu ha mutsheṱo,

uri ipfi ḽayo ḽi si tsha dovha ḽa pfala

nṱha ha thavha dza Israele.”

₁₀“Mme au o vha a tshi nga munḓirivhe

wo ṱavhiwaho tsini ha maḓi,

u tshi aṋwa mitshelo,

wó ita tshimvingimvingi,

nge maḓi a vha a tshi ela e manzhi.

₁₁Wa bva matavhi o khwaṱhaho a vha luḓo lwa musanda;

a lapfa a swika nṱha-nṱha,

a guma nga makole,

vhathu vha takalela u lapfa hao,

vha takalela vhumvingimvingi hao.

₁₂Hone vho u sinyutshela vha u tupula vha u posa fhasi,

mitshelo yawo ya swa nga muya u no bva phangani

wa vunḓekanywa,

matavhi awo a u khwaṱha a puta,

mulilo wa u fhisa woṱhe.

₁₃Zwino wa ṱavhiwa phangani,

shangoni ḽa gomelelo ḽi si na maḓi,

₁₄tsindeni ḽawo ho bva mulilo,

wa fhisa matavhi awo na mitshelo,

a u tshee na matavhi o khwaṱhaho,

a u tshee na luḓo lwa vhuhosi.”

Holu ndi luimbo lwa tshililo;

lwo vha lu tshi imbwa nga u ralo.