ESEKIELE 2

₁Ipfi ḽa ri, “Iwe ṅwana wa muthu, takuwa u ime, ndi konou amba na iwe.” ₂A tshi khou amba maipfi ayo Muya a mbo ḓi dzhena kha nṋe, a ntakusa nda ima, nda mu pfa a tshi khou amba na nṋe ₃a tshi ri, “Iwe ṅwana wa muthu, ndi khou u ruma kha Vhaisiraele, havhaḽa mashandukwa vho ntshandukelaho. U swika zwino vhone na vhomakhulukuku wavho vha kha ḓi vha vho ntshandukela. ₄Vhathu vhane nda u ruma khavho vha na tshipimbi na tshikhuna. Iyo vha vhudza u ri, ‘Muṋe wa zwoṱhe Yahavee u ralo.’ ₅Havha vhathu ndi mashandukwa, hone naho vha thetshelesa kana vha si thetshelese, tenda vha ḓivha uri ho vha hu na muporofita khavho.

₆“Huno iwe ṅwana wa muthu, u songo vha ofha, u songo ofha nangwe zwa nga wo fashwa nga mipfa ya muluwa, wo kanda phame! Havha vhathu ndi mashandukwa, hone u songo vhuya wa ofha zwine vha amba. ₇Ndi mashandukwa, hone naho vha thetshelesa kana vha sa thetshelesi, iwe u vha vhudze maipfi anga.

₈“Iwe ṅwana wa muthu, thetshelesa zwine nda u vhudza: u songo vha ḽishandukwa na iwe wa nga havhaḽa vha mashandukwa. Aṱama mulomo wau u ḽe zwine nda ṱoḓa u u ṋea.” ₉Nṋe nda sedza nda vhona tshanḓa tshi tshi khou onyolowa tshi tshi ḓa ha nṋe tsho fara kubugu. ₁₀A ku petulula henefho phanḓa hanga; kwo vha kwo ṅwalwa phanḓa na murahu; kwo vha kwo ṅwalwa upfi, “Zwililo, u honḓa, u ṱungufhala.”