ESEKIELE 25

₁Ipfi ḽa Muṋe washu ḽo amba na nṋe ḽa ri, ₂“Iwe ṅwana wa muthu, livhana na Vhaamoni u porofite u tshi vha kaidza, ₃u ri, ‘Ipfani ipfi ḽa Muṋe wa zwoṱhe Yahavee. Muṋe wa zwoṱhe Yahavee u ri: Ni ri: Koṱo! ni tshi vhona fhethu hanga hukhethwa ho kumadzwa, shango ḽa Israele ḽo phusukanywa, vhathu vha Juda vha tshi iswa vhuthubwani. ₄Nga zwenezwo shango ḽaṋu ndi ḓo ḽi ṋea tshakha dza Vhubvaḓuvha ḽa vha ḽavho; vha ḓo ṱoka mishasha yavho shangoni ḽaṋu, vha dzula khaḽo. Vha ḓo ḽa mitshelo yaṋu, vha nwa mukhaha waṋu. ₅Muḓi wa Raba ndi ḓo u ita pfulo ya dzigamela, miḓi ya Amoni nda i ita vhuawelo ha dzinngu. Ndi hone ni tshi ḓo ḓivha uri ndi Nṋe Yahavee.’ ”

₆Muṋe wa zwoṱhe Muṋe washu u ri, “Vhunga no vhanda zwanḓa na tou tshina nga u takalela khombo yo welaho shango ḽa Israele, na vha nyala nga mbilu yoṱhe, ₇ndi ḓo angaladza tshanḓa tshanga nda ni rwa ndi tshi itela zwenezwo; ndi ḓo ni kumedza dzitshakha dza ni ṱangula, nda ni lozwa na si tsha vha lushaka, nda ni swiela na si tsha vha hone shangoni. Ndi ḓo ita uri ni si tsha vha tshithu; ndi hone ni tshi ḓo ḓivha uri ndi Nṋe Yahavee.”

₈Muṋe wa zwoṱhe Muṋe washu u ri, “Vhunga Vhamuaba na Vhaseiri vho ri, ‘Edzonu vhona vhathu vha Juda; vho fhambana ngafhi na dziṅwe tshakha?’ ₉Ndi zwone, ndi ḓo ṱangula mivhundu ya Muaba ya sala i si na miḓi, nda phusukanya miḓi yaḽo shangoni ḽoṱhe, na ine ya tou vha yone ine vha i ṱongisa, Bethe Jeshimothi na Baali Mioni na Kiriathaimi. ₁₀Ndi ḓo ḽi kumedza tshakha dza Vhubvaḓuvha, maswina a Vhaamoni, ḽa vha ḽavho uri Vhaamoni vha si tsha vhuya vha ḓivhea vhe lushaka. ₁₁Ndi ḓo lifhedza na Muaba nga u ralo, ndi hone muṅwe na muṅwe a tshi ḓo ḓivha uri ndi Nṋe Yahavee.”

₁₂Muṋe wa zwoṱhe Muṋe washu u ri, “Vhunga Vhaedomo vho lifhedza vhathu vha Juda, u ralo ha vha u ḓiovhela mulandu muhulu, ₁₃ndi zwone, Nṋe Muṋe wa zwoṱhe Yahavee ndi ri: Ndi ḓo angaladza tshanḓa tshanga nda rwa na Vhaedomo nda fhedza vhathu vhoṱhe na zwifuwo shangoni. Ndi ḓo ita uri ḽi sale ḽi phanga; vhathu vha ḓo vhulawa nga pfumo u bva Themana u swika Dedani. ₁₄Ndi ḓo lifhedza Vhaedomo nga Vhaisraele vhathu vhanga. Vha ḓo ita Edomo zwine zwa tshimbilelana na mbiti dzanga na u sinyuwa hanga, muṅwe na muṅwe u ḓo zwi ḓivha uri ndi yone ndifhedzo yanga – hu amba Nṋe Muṋe wa zwoṱhe Yahavee.”

₁₅Muṋe wa zwoṱhe Muṋe washu u ri, “Vhafilista vho lifhedza Juda nga tshiṱuhu; vho tou ḓiimisela u vha lozwa tshoṱhe zwi tshi bva kha vhuswina havho ha kale na kale. ₁₆Ndi zwone, hu amba Nṋe Muṋe wa zwoṱhe Yahavee, ndi ḓo angaladza tshanḓa tshanga nda rwa Vhafilista nda lozwa vhenevho Vhakhrita hu si sale na muthihi henefho khunzikhunzini ya lwanzhe. ₁₇Ndo vha sinyutshela, ndi ḓo vha lifhedza. Ndi hone vha tshi ḓo zwi ḓivha uri ndi Nṋe Yahavee, musi ndi tshi vha lifhedza.”