ESEKIELE 36

₁“Iwe ṅwana wa muthu, ḓivhadza thavha dza Israele hezwi. Amba u ri, ‘Inwi thavha dza Israele, ipfani ipfi ḽa Yahavee. ₂Muṋe wa zwoṱhe Yahavee u ri: Vhunga maswina aṋu o takala a ri: Ahaa! Miṱumba ya dzithavha dza kale na kale zwino yo no vha shango ḽashu,’ ₃iwe porofita! Amba u ri, ‘Muṋe wa zwoṱhe Yahavee u ri: Vhunga mashango oṱhe o ni lalela, a takalela ni tshi welwa nga khombo, na dzhiwa nga tsalela dza dziṅwe tshakha, na ṱwa ni tshi ambiwa ni tshi sasaladzwa, ₄zwino inwi thavha dza Israele ipfani ipfi ḽa Muṋe wa zwoṱhe Yahavee: Muṋe wa zwoṱhe Yahavee u amba na dzithavha na zwivhanga, milambwana na magovha, matumba o ṱutshelwaho na miḓi yo phusukanywaho i si na muthu ine ya sewa nga tshakha dzoṱhe dzo i tangaho. ₅Ee, Muṋe wa zwoṱhe Yahavee u ri: Ndi khou amba ndo sinyuwa tshoṱhe, ndi khou amba na tshakha dzoṱhe na vhoṱhe vha ḽa Edomo vhe vha dzhia shango ḽanga vha tshi pembela nga lunyadzo luhulu, vha thatha vhathu shango ḽa vha ḽavho.’ ₆Zwino-ha, iwe porofita hezwi nga shango ḽa Israele. Vhudza dzithavha na mivhundu na milambwana na magovha u ri, ‘Muṋe wa zwoṱhe Yahavee u ri: Ndi khou amba ndo sinyuwa ndi na mbiti ndi tshi vhona uri tshakha dzi ni nyadza hani. ₇Ndi zwone, Nṋe Muṋe wa zwoṱhe Yahavee ndi ri: ndi ana ndo imisa tshanḓa tshanga ndi ri tshakha dzo ni tangaho na dzone dzi ḓo nyadziwa. ₈Inwi dzithavha dza Israele, melani miri i aṋwe mitshelo i no ḓo ḽiwa nga vhathu vhanga vha Israele, ngauri hu si kale vha ḓo vhuya. ₉Ee, ndi khou ḓa ha inwi, ndi ḓo ni vhavhalela; ni ḓo dovha na liṅwa na zwalwa. ₁₀Ndi ḓo andisa vhathu vhane vha dzula kha inwi, vhathu vhoṱhe vha Israele, ee, vhoṱhe. Miḓi i ḓo dovha ya dzula vhathu, matumba a vuswa. ₁₁Ndi ḓo andisa vhathu vhane vha dzula kha inwi na zwifuwo zwine zwa dzula kha inwi; vhathu vha ḓo beba vha vha vhanzhi, na zwifuwo zwa dzwala zwa vha zwinzhi. Ndi ḓo dzudza vhathu kha inwi zwa nga zwiḽa kale; zwi ḓo ni nakela u fhira zwiḽa kale, ndi hone na inwi dzithavha ni tshi ḓo zwi ḓivha uri ndi Nṋe Yahavee. ₁₂Ndi ḓo ḓisa vhathu vha dovha vha kanda mavu aṋu, ndi vhathu vhanga vha Israele; vha ḓo hu dzhia na vha shango ḽavho, a ni tsha ḓo dovha na vha vhulahela vhana vhavho.’ ”

₁₃Muṋe wa zwoṱhe Muṋe washu u ri, “Vhunga vhathu vho ni vhudza vha ri, ‘Ni madyavhathu, no vhulahela lushaka lwaṋu vhana vhalwo,’ ₁₄ndi zwone, a ni tsha ḓo ḽa vhathu, a ni tsha ḓo dovha na vhulahela lushaka lwaṋu vhana vhalwo – hu amba Muṋe wa zwoṱhe Yahavee. ₁₅A thi tsha ḓo dovha nda tenda ni tshi kolelwa nga dzitshakha, a ni tsha ḓo dovha na nyadziswa nga vhatsinda, a ni tsha ḓo dovha na vhulahela lushaka vhana vhalwo – hu amba Nṋe Muṋe wa zwoṱhe Yahavee.”

₁₆Ipfi ḽa Muṋe washu ḽo amba na nṋe ḽa ri, ₁₇“Iwe ṅwana wa muthu, vhathu vha Israele vho vha vha tshi dzula shangoni ḽavho, hone vho ḽi shata tshika nga kutshilele kwavho na maitele avho; Nṋe ndo vha ndi tshi vhona kutshilele kwavho ku kwa tshika ku tshi nga maṱambo a musadzi. ₁₈Ndi zwe nda shululela mbiti dzanga khavho nga mulandu wa malofha e vha a shulula shangoni ḽavho na nga midzimu yavho ya tshika ye vha ḽi shata tshika ngayo. ₁₉Ndo vha balanganya na dzitshakha, nda vha thalanganya mashangoni asili; ndo vha rwa nga ṱhamu yo teaho kutshilele kwavho na maitele avho. ₂₀Zwino dzina ḽanga ḽikhethwa vho ḽi shata tshika vhukati ha tshakha dze vha ya khadzo, vhathu vha tshi vha amba vha tshi ri, ‘Havha ndi vhathu vha Yahavee, vho thathwa shangoni ḽawe.’ ₂₁Hone zwa dzina ḽanga ḽikhethwa zwo vha zwi tshi nndina, dzina ḽanga ḽe vhathu vha Israele vha ḽi shata tshika vhukati ha dzitshakha he vha ya hone.

₂₂“Zwino-ha, vhudza vhathu vha Israele u ri, ‘Muṋe wa zwoṱhe Yahavee u ri: Inwi vhathu vha Israele, ndi tshi ita hezwi a thi iteli inwi, ndi itela dzina ḽanga ḽikhethwa, ngauri no ḽi shata tshika vhukati ha dzitshakha dze na ya khadzo. ₂₃Ndi ṱoḓa u sumbedza vhukhethwa ha dzina ḽanga ḽihulu ḽe ḽa shatwa tshika vhukati ha dzitshakha ḽe na ḽi shata tshika vhukati havho. Ndi hone dzitshakha dzi tshi ḓo zwi ḓivha uri ndi Nṋe Yahavee – hu amba Nṋe Muṋe wa zwoṱhe Yahavee – musi ndi tshi sumbedza vhukhethwa hanga nga inwi, tshakha dzi tshi zwi vhona. ₂₄Zwenezwo ndi ḓo ni bvisa vhukati ha dzitshakha nda ni kuvhanganya noṱhe ni tshi bva mashangoni oṱhe asili, nda ni ḓisa hayani shangoni ḽa haṋu. ₂₅Ndi ḓo ni handulula nga maḓi o kunaho nda ni ṱanzwa tshika, ndi ḓo ni ṱanzwa tshika dzaṋu dzoṱhe dze na ḓishata nga midzimu yaṋu yoṱhe ya tshika. ₂₆Ndi ḓo ni ṋea mbilu ntswa, nda dzhenisa muya muswa ngomu haṋu; ndi ḓo bvisa mbilu ya tombo muvhilini waṋu, nda ni ṋea mbilu ya ṋama. ₂₇Ndi ḓo dzhenisa Muya wanga ngomu haṋu, nda ita uri ni vhulunge milayo yanga, na hulisa ndayo dzanga na dzi tevhedza. ₂₈Ni ḓo dzula shangoni ḽe nda ḽi ṋea vhokhotsi aṋu. Inwi ni ḓo vha vhathu vhanga, Nṋe nda vha Mudzimu waṋu. ₂₉Ndi ḓo ni ṋula tshikani dzaṋu dzoṱhe. Ndi ḓo vhidza mavhele a vha manzhi, nda si tsha ni ḓisela nḓala. ₃₀Ndi ḓo ita uri miri yaṋu i ni aṋwele mitshelo minzhi, masimuni ni wane khaṋo khulu, uri ni si tsha welwa nga nḓala vhukati ha dzitshakha na shona. ₃₁Ndi hone ni tshi ḓo elelwa kutshilele kwaṋu kuvhi na maitele aṋu mavhi. Ni ḓo ḓinengwa ni tshi elelwa vhuvhi haṋu na maitele aṋu a nengisaho. ₃₂Ndi ṱoḓa ni tshi zwi ḓivha uri ndi tshi ita nga u rali a thi iteli inwi – hu amba Nṋe Muṋe wa zwoṱhe Yahavee. Inwi vhathu vha Israele, a ni shoni naa? A ni soli kutshilele kwaṋu?’ ”

₃₃Muṋe wa zwoṱhe Muṋe washu u ri, “Musi une nda ni ṱanzwa vhutshinyi haṋu hoṱhe, ndi ḓo dovha nda dzudza vhathu muḓini, nda ita uri matumba a dovhe a vuswe. ₃₄Shango ḽa soga, ḽe vhafhiri vha gondo vhoṱhe vha vhuya vha vhona ḽi sa dzuli muthu, zwino ḽi ḓo dovha ḽa liṅwa. ₃₅Muṅwe na muṅwe u ḓo ri: Shango heḽi a si kale ḽi tshee soga, zwino ḽi vho nga tsimu ya Edeni; miḓi ye ya vhuya ya ṱutshelwa ya sala i matumba, ya phusukanywa, zwino yo no vha vhushavhelo, i vho dzula vhathu. ₃₆Ndi hone tshakha dzo salaho dzo ṋekanaho masakha na inwi dzi tshi ḓo zwi ḓivha uri Nṋe Yahavee ndo dovha nda vusa zwe zwa vha zwo phusukanywa, nda dovha nda ṱavha zwe zwa vha zwo tupulwa. Ho amba Nṋe Yahavee, ndi ḓo zwi ita.”

₃₇Muṋe wa zwoṱhe Muṋe washu u ri, “Ndi ḓo ṱuṱuwedza vhathu vha Israele uri vha nṱoḓe uri ndi dovhe ndi vha tonde, ndi ḓo vha andisa unga masambi a nngu, ₃₈vha nga sambi ḽa nngu dza tshiṱhavhelo, vha nga sambi ḽa nngu Jerusalema musi wa vhuṱambo ho vhetshelwaho maḓuvha aho. Miḓi yaṋu yo phusukanywaho i ḓo ḓala vhathu vha anda unga masambi a nngu. Ndi hone vhathu vha tshi ḓo zwi ḓivha uri ndi Nṋe Yahavee.”