VHAHEBERU 9

₁Mulanga uḽa wa u ranga wo vha u na ndaela dza zwa u luvha Mudzimu wa dovha wa vha na thembele yawo ya fhano shangoni. ₂Ho vha ho akhiwa dennde. Ngomu hayo kha tshipiḓa tshi re tsini ha muṋango tshine tsha pfi “Hukhethwa” ho vha hu na tshivheambone na ḓafula ḽi re na vhurotho ha u sumela Mudzimu. ₃Ri tshi fhira lupila lwa vhuvhili ho vha hu na tshipiḓa tsha dennde tshi no pfi “Hukhethwakhethwa”. ₄Henefho ho vha hu na aḽiṱari ya musuku ya u fhisela zwioro, na mbulungelo ya mulanga yo tou fukedzwaho nga musuku. Ngomu hayo ho vha hu na mvuvhelo ya musuku yo faraho mana, na lubaḓa lwa Aroni lwo ṱumaho lurere, na maḓaba o ṅwalwaho maipfi a mulanga. ₅Nṱha hayo ho vha ho imiswa tshifanyiso tsha vhakherube vha fanyisaho vhugala ha Mudzimu vho ṱharamudza phapha dzavho nṱha ha tshitibo tsha khangwelo. Hezwo zwoṱhe a ri tsha zwi amba nga zwiendanungo.

₆Zwó vhekanywa nga u ralo vhotshifhe vha ṱwela u dzhena kha tshipiḓa tsha u thoma tsha dennde vha tshi ita mishumo yavho ya vhutshifhe. ₇Hone hetshi tsha vhuvhili tshi dzhenwa luthihi fhedzi nga ṅwaha nahone hu tshi dzhena tshifhe muhulu fhedzi. Hafhu ha dzheni a songo fara malofha. Malofha a hone ndi a u pfumelelwa hawe, a konou pfumelela na lushaka zwe lwa tshinya hu si nga khole. ₈Nga hezwo Muya Mukhethwa u sumba uri musi dennde ya kale i tshee yo ima, nḓila ya u dzhena Hukhethwakhethwa a i athu vulea. ₉Hezwi zwi fanyisedzela zwa zwino hu tshi kha ḓi ṋekedzwa nduvho na zwipfumelo zwine zwa kundwa u ṱanzwa tshoṱhe mvalo dza vhaṋekedzi vhazwo. ₁₀Haya a tou vha mafhungo a zwiḽiwa na zwinwiwa na maitele o fhambanaho a u ḓikumulula; i tou vha milayo i kwamaho zwa nga nnḓa, ine ya shuma u swika Mudzimu a tshi ḓo vhekanya zwoṱhe nga huswa.

₁₁Hone zwino Khristo o no ḓa, Ene Tshifhe Muhulu o ri ḓiselaho zwivhuya hezwi zwine ra vho vha nazwo. Dennde ya vhutshifhe hawe i fhira iḽa, ndi yo khunyelelaho. Yone a yo ngo fhaṱwa nga ṋala dza vhathu; zwi amba uri a si ya ḽifhasi ḽino.

₁₂Malofha a tshipfumelo tshawe a si a mbudzi na ṋamana, a tou vha awe vhukuma. O ri u tshi ṋekedza a konou dzhena Hukhethwakhethwa kathihi ha mbo ḓi vha u ri wanela mbofholowo i sa gumi. ₁₃Zwino arali malofha a mbudzi na mboho na milora ya tholehadzi zwi na maanḓa a u ṱanzwa vho kumalaho arali vha tshi handululwa ngazwo, vha sala vho kumululwa, ₁₄malofha a Khristo a nga kundiswa ngani-ha u ri ṱanzwa mvalo ra laṱa mishumo i isaho lufuni ra konou luvha Mudzimu a tshilaho? A si zwenezwo zwe Khristo a itela zwone a tshi ḓikumedza Mudzimu nga Muya wa lini na lini a vha tshipfumelo tshi sa solisei naa?

₁₅Ndi zwe a kona ngazwo u ri ḓisela mulanga muswa. O fela u vhofholola vhe vha pfuka Mulayo musi vha tshi kha ḓi vhuswa nga mulanga mulala, uri vhe vha vhidzwa nga Mudzimu vha kone u ḽa ifa ḽi sa fheli ḽe vha fulufhedziswa. ₁₆Hafhu muḽaifa ha ḽi ifa hu sa athu wanala vhuṱanzi ha uri muṋe wa thundu o fa; ₁₇ifa ḽi wanala ḽó fanela musi muṋe wa thundu o no fa; a tshi kha ḓi tshila a ḽi wanali. ₁₈Ndi zwe na uḽa mulanga wa u thoma u si kone u vhoxwa hu si na malofha. ₁₉A thi ri Mushe o ri u ḓivhadza lushaka lwoṱhe ndaela dzoṱhe dza Mulayo, a dzhia malofha a ṋamana na mbudzi a a ṱanganya na maḓi na vhukuse vhutswuku, a handulula bugu ya Mulayo na lushaka lwoṱhe ngao nga lutavhi lwa muhisopo ₂₀a tshi khou ri, “Haya ndi malofha a khwaṱhisaho mulanga we Mudzimu a ri ni u vhulunge.” ₂₁A dovha a handulula na dennde sa zwenezwo khathihi na midzio yoṱhe ya zwa u luvha Mudzimu. ₂₂Hu tshi tevhedzwa mulayo wa u kumulula a si zwinzhi zwi sa kumululwiho nga malofha. Ha sa vha na malofha, vhutshinyi a vhu hangwelwi.

₂₃Khezwo-ha, hezwino zwine zwa tou fanyisedza zwa ngei ṱaḓulu zwi kumululwa nga u ralo, zwone zwiṋe zwa ngei ṱaḓulu a zwi lili u kumululwa nga zwipfumelo zwa khwiṋe naa? ₂₄Hafhu Khristo ho ngo dzhena hukhethwa ho fhaṱwaho nga vhathu, hune ha tou vha tshiga zwatsho tsha zwa vhukuma, o tou dzhena henengei ṱaḓulu uri a kone u ri imelela ha Mudzimu zwino. ₂₅Nahone ho ngo dzhena henengei uri a ṱolou ḓiṋekedza lu sa gumi, sa zwiḽa tshifhe muhulu a tshi ḓi dzhena ṅwaha muṅwe na muṅwe ó fara malofha a si awe. ₂₆Ngavhe zwo vha zwo ralo ndi musi o fanela u tambudzwa lunzhi tshee shango ḽa tewa. Hone-ha a zwo ngo ralo, o tou bvelela luthihi fhedzi misi ino ya vhufhelo ha vha u thutha vhutshinyi ha vhathu nga u ḓikumedza a vha tshipfumelo Ene muṋe. ₂₇Tsha muthu ndi u fa luthihi ha konou vha na khaṱhulo. ₂₈Sa zwenezwo Khristo o ḓikumedza a vha tshipfumelo luthihi fhedzi ha vha u ḓihwesa vhutshinyi ha vhathu vhanzhi. A tshi vhuya u ḓo vha a sa ḓeli u fela vhatshinyi, u ḓo vha a tshi ḓela u tshidza vho mu lindelaho.