HOSIA 9

₁Hee Vhaisraele, ni songo fhululedza na tou pembela na nga dziṅwe tshakha; Mudzimu waṋu o vhona ni sa fulufhedzei, no ḓiphiṋa nga malamba a phombwe luvhanḓeni luṅwe na luṅwe lwa u fhulela. ₂Luvhata lwa u fhulela na bonḓelo a zwi nga fushi vhathu, waini ya tuvhu a vha nga i wani. ₃A vha tsha ḓo dzula shangoni ḽa Muṋe washu. Vhathu vha Efraimi vha ḓo humela Egipita, vha ḓo ḽa zwiḽiwa zwo kumalaho ngei Ashuru. ₄A vha nga ṋekedzi Muṋe washu nduvho ya waini, na zwiṱhavhelo zwavho a zwi nga takadzi. Zwiṱhavhelo zwo raloho vha ḓo vhona zwi tshi nga zwiḽiwa zwa vha lilaho mufu, vhoṱhe vhane vha zwi ḽa vha ḓo kumala; zwi itwa ngauri vho zwi ḽa vhone vhaṋe vha zwi fhedza, a vho ngo zwi kumulula nga u isa zwiranzhe thembeleni ya Muṋe washu. ₅Musi wa vhuṱambo haṋu ho vhewaho, misi ya vhuṱambo ha Muṋe washu, ni ḓo itani? ₆Naho vha ponyoka u phusukanywa, Vhaegipita vha ḓo vha kuvhanganya, vha Memfisi vha vha swiṱa. Lupfumo lwavho lwa siliva lu ḓo sala lu mitshutshungu, mipfa i tanda dennde dzavho. ₇Misi ya u lifhedzwa i khou ḓa, misi ya tsengo yo sendela. Vhaisraele vha ḓo zwi pfa! Ni ri, “Muporofita ndi tsilu, muthu o vhonetshelwaho ndi mpengo.” Ndi nge zwivhi zwaṋu zwa anda, vhuswina haṋu ho hulela. ₈Muporofita o ruṅwa nga Mudzimu wanga uri a linde vhathu vha Efraimi, naho zwo ralo vha mu retshela zwikwekwe hoṱhe hune a tshimbila hone, vhuswina a vhu fheli shangoni ḽa Mudzimu wawe. ₉Vho tou ṋupela vhuvhini unga misi iḽa ya Gibia. Mudzimu u ḓo elelwa vhuvhi havho a vha rwela vhutshinyi havho.

₁₀Muṋe washu u ri, “Ndi tshi wana Vhaisraele zwo nga muthu a tshi wana nḓirivhe phangani. Musi ndi tshi vhona vhokhotsi aṋu, zwo nga muthu a tshi vhona mutshelo wa tshiranzhe kha muhuyu. Hone musi vha tshi swika Baali Phioro, vha mbo ḓi ḓikumedza mudzimu wonoyo u shonisaho, vha mbo nengisa-vho unga tshenetsho tshithu tshe vha tshi funa. ₁₁Vhugala ha Efraimi vhu ḓo fhufha unga tshiṋoni: a hu tsha ḓo bebwa vhana, vhasadzi a vha tsha ḓo vhifha muvhilini, ṋowa dza vhasadzi a dzi tsha ḓo fara. ₁₂Nangwe vha alusa vhana, ndi ḓo vha dzhiela vhoṱhe nda si sie na muthihi. Na vhone vhaṋe vha ḓo zwi vhona musi ndi tshi vha ṱutshela.”

₁₃Ndo vhona Efraimi a tshi nga Tiro, hone wo ṱavhiwa mavuni o nonelaho. Hone onoyo Efraimi u ḓo kumedza vhana vhawe muvhulahi. ₁₄Muṋe washu, vha ṋee ... u ḓo vha ṋea mini? Vha ṋee mbumbelo dzine dza tshinyalelwa na maḓamu a si na mikando.

₁₅Muṋe washu u ri, “Vhuvhi havho hoṱhe ho thoma Giligala, ndo vha vhenga henefho. Ndi ḓo vha thatha nḓuni yanga nge vha ita zwo vhifhaho. A thi tsha ḓo vha funa, vharangaphanḓa vhavho vhoṱhe ndi mashandukwa. ₁₆Vhathu vha Efraimi vho tumulwa, midzi yavho yo puta, a vha tsha ḓo aṋwa mitshelo. Nangwe vha vhe na vhana, ndi ḓo vhulaha mbebo yavho ine vha i funa.”

₁₇Mudzimu wanga u ḓo vha landula nge vha si mu thetshelese. Vha ḓo vha vhatendeleki vhukati ha dzitshakha.