JEREMIA 13

₁Muṋe washu o mmbudza a ri, “Iyo renga bannda ya sila u i ambare khunduni, hone i songo vhuya ya kwama maḓi.” ₂Nda mbo ḓi renga bannda, nga he Muṋe washu a amba, nda i ambara khunduni.

₃Ndi hone ipfi ḽa Muṋe washu ḽi tshi nnḓela lwa vhuvhili, ḽa ri, ₄“Iyo bannda ye wa i renga wa i ambara khunduni, i dzhie zwino u ye Pheratha u i dzumbe hone kha mutwe wa tombo.” ₅Nda mbo ḓi ya nda i dzumba Pheratha nga he Muṋe washu a mmbudza.

₆Ho no fhela maḓuvha manzhi Muṋe washu a mmbudza a ri, “Zwino iyo dzhia iḽa bannda ye nda ri u i dzumbe Pheratha.” ₇Zwenezwo nda ya Pheratha nda bwa iḽa bannda nda i dzhia he nda vha ndo i dzumba hone, hone yo vha yo no ṱahala i si tshee na mushumo.

₈Ndi hone ipfi ḽa Muṋe washu ḽi tshi ḓa ha nṋe ḽa ri, ₉“Nṋe Yahavee ndi ri, ‘Ndi ḓo fhedza u ḓihudza ha Juda nga u ralo na u ḓihudza huhulu ha Jerusalema. ₁₀Vhathu havha vhavhi vhane vha lamba u thetshelesa maipfi anga, vha sokou ita zwine vha funzedzwa nga mbilu dzavho dza tshipimbi, vha sala murahu ha miṅwe midzimu vha i shumela, vha i luvha, vha ḓo nga bannda hei i si na mushumo. ₁₁Unga bannda i tshi vhofha muthu khundu, na Nṋe ndo enda ndo kungela nnḓu yoṱhe ya Israele na ya Juda uri vha vhe vhathu vhanga, vha rende dzina ḽanga vha ḽi hulise, vha vhe vhugala hanga. Hone vhone vha si thetshelese.’ ”

₁₂Muṋe washu Mudzimu wa Israele o mmbudza a ri, “Jeremia, vhudza vhathu vha Israele uri tsha nkho iṅwe na iṅwe ya waini ndi u panga waini. Vha tshi fhindula vha ḓo ri, ‘Kani-ha a ri zwi ḓivhi uri tsha nkho iṅwe na iṅwe ndi u panga waini?’ ₁₃Zwenezwo vha vhudze uri vhathu vha shango heḽino khathihi na mahosi vha no dzula kha khuluṋoni ya Dafita, na vhotshifhe na vhaporofita na vhathu vhoṱhe vha Jerusalema, Nṋe Yahavee ndi ḓo vha panga waini vha vhuya vha kambwa. ₁₄Ndi ḓo vha kuḓanya vha pwashekana, vhokhotsi na vhana. A thi nga vha lileli, a thi nga vha pfeli vhuṱungu, a thi nga vha khathutsheli, a thi nga litshi u vha lozwa.”

₁₈Muṋe washu a amba na nṋe a ri, “Vhudza khosi na vhakoma mme awe vha tse kha khuluṋoni dzavho, ngauri khare dza vhugala dzi re ṱhohoni dzavho dzi ḓo wela fhasi. ₁₉Miḓi i re Negeve i ḓo govhelwa ha si vhe na a i phalalaho. Vhathu vha Juda vha ḓo iswa vhuthubwani, a hu na a no ḓo sala.”

₂₀Jerusalema, lilala u vhone vha no khou bva thungo ya devhula. Miḓi ya Juda, ḽone sambi ḽa nngu ḽe ha pfi u ḽi lise, ḽe wa vha u tshi ḽi zuwa, ḽi ngafhi? ₂₁Zwino vhathu vhe wa vha u tshi vha ita khonani dzau vha tshi vho ḓo u kunda vha u vhusa, u ḓo ri mini? A u nga pfi vhuṱungu vhu no nga ha musadzi a tshi ṱoḓou vhofholowa naa? ₂₂Arali wa ḓivhudzisa wa ri, “Ndi mini zwo raloho zwo nngwela?” ḓivha uri ndi nga mulandu wa zwivhi zwau nguvho dzau dzi shi vhuya dza pengulwa wa tshipiwa. ₂₃Muthu wa Kushu a nga shandukisa lukanda lwawe naa? Nngwe i nga shandukisa mavhala ayo naa? Khamusi ndi hone na inwi ni tshi nga kona u ita zwivhuya; no no tou vha na dzema ḽa u ita vhuvhi.

₂₄Muṋe washu u ri, “Ndi ḓo ni balanganya unga mungu u tshi hwalwa nga muya wa phangani. ₂₅Hezwo ndi zwone zwo u livhaho, ndi wone mukovhe we nda u kovhela, nge wa nkhangwa wa fulufhela midzimu i si ya ngoho. ₂₆Ndi ḓo pengula nguvho dzau, dza u thivha tshifhaṱuwo, uri vhoṱhe vha u vhonele. ₂₇Ndo nengwa vhupombwe hau na nyemulo dzau na u sa fhira munna hau u sa vhui wa shona! Ndo u vhona u tshi ita zwi nengisaho mivhunduni na shangoni. Iwe Jerusalema u ḓo zwi vhona! U ḓo dzula u ngomu vhuaḓani u swika lini?”