JOHANISI 9

₁Musi Yesu a tshi khou ḓitshimbilela a vhona munna we a bebwa e bofu. ₂Vhafunziwa vhawe vha mu vhudzisa vha ri, “Vhafunzi, uyu muthu a tshi bebwa e bofu, hu nga vha ho tshinya nnyi? Ho tshinya ene muṋe kana ho tshinya vhabebi vhawe?”

₃Yesu a fhindula a ri, “Vhupofu ha hoyu muthu a ho ngo bva kha vhutshinyi ha ene muṋe kana ha vhabebi vhawe; ho vha u itela fhedzi uri Mudzimu a sumbedze vhathu maanḓa awe khae. ₄Riṋe tshashu ndi u futelela u ita mushumo wa o nthumaho ḽi tshi kha ḓi vha masiari; zwenezwino ḓuvha ḽi a kovhela, muthu a si tsha ḓo kona u shuma tshithu. ₅Zwino ndi tshee fhano shangoni ndi Nṋe tshedza tsha shango.”

₆Yesu a ri u ralo a mbo pfela mare fhasi a suka matope ngao a a ḓodza kha maṱo a uyo munna wa bofu; ₇a konou mu vhudza a ri, “Tshimbilani ni yo ṱamba khofheni ishani ḽa Silomu.” (Silomu ndi uri “Muḓinḓa”.) Ndi hone uyo munna a tshi ṱuwa a yo ṱamba khofheni, a vhuya a tshi vho vhona.

₈Vhahura vhawe, na vhaṅwe vhathu vhe vha vha vha tshi ḓi mu vhona zwiḽa a tshi kha ḓi tshila nga u humbela, vha vhudzisana vha ri, “Nṋa uyu munna a si onouḽa we a vha a tshi ṱwa o dzula a tshi khou humbela zwifhiwa?”

₉Vhaṅwe vha ri, “Ndi ene.” Vhaṅwe vha ri, “A si ene; vha tou fana.”

Hone ene muṋe wazwo a ri, “Ndi nṋe.”

₁₀Vha mu vhudzisa vha ri, “Nṋa zwo ḓa hani ni tshi vho vhona?”

₁₁A fhindula a ri, “Uḽa munna a no pfi Yesu o tou suka matope a nnḓodza kha maṱo a ri, ‘Tshimbilani ni yo ṱamba khofheni Silomu.’ Nangoho nṋe nda ya; ndi tshi tou fhedza u ṱamba nda wana ndi tshi vho kona u vhona.”

₁₂Vha vhudzisa vha ri, “Nṋa onoyo munna u ngafhi?”

Ene a fhindula a ri, “A thi ḓivhi.”

₁₃Ndi hone vha tshi ṱuwa na uyo munna we a vha e bofu vha mu isa ha Vhafarisei. ₁₄Hafhu zwiḽa Yesu a tshi suka matope a swingulusa bofu iḽo yo vha i Sabatha. ₁₅Zwino Vhafarisei na vhone vha vhudzisa uyo munna uri nṋa zwo ḓa hani a tshi vho kona u vhona. Ene a vha vhudza a ri, “O tou dzhia matopenyana a nnḓodza kha maṱo; nṋe nda ya nda ṱamba khofheni nda wana ndi tshi vho kona u vhona.”

₁₆Vhaṅwe Vhafarisei vha ri, “Muthu we a ita zwithu izwo a nga si vhe a tshi bva ha Mudzimu; hufha a sa tevhedzi mulayo wa Sabatha!”

Hone vhaṅwe vha ri, “Nṋa muthu wa mutshinyi a nga kona hani u ita maḓembe mangafhangafha?” Vha tshi ralo ha mbo ḓi vha u fhandekana havho.

₁₇Ndi hone vha tshi vho tou dovha vha vhudzisa uyo munna vha ri, “Zwino inwi ni ri mini ngae? Ri amba ngauri ndi inwi we na swinguluswa!”

Ene a fhindula a ri, “Nṋe ndi ri ndi muporofita.”

₁₈Vhahulwane vha Majuda vhone vho vha vha sa funi u tenda uri uyo munna o vha e bofu o tou swinguluswa; vha vhuya vha tou vhidza vhabebi vhawe ₁₉vha vha vhudzisa vha ri, “Nṋa uyu ndi ṅwana waṋu? Zwino ni tshi ri o bebwa e bofu zwo ḓo ḓa hani uri a kone u vhona?”

₂₀Vhabebi vhawe vha fhindula vha ri, “Riṋe tshine ra ḓivha ndi uri ndi ṅwana washu na uri o bebwa e bofu. ₂₁Hone uri o swinguluswa hani a si zwine ra zwi ḓivha; hu ḓi nga muthu o mu swingulusaho, na Ene a ri mu ḓivhi. Hufha ene muṋe e munna; mu vhudziseni, u ḓo ḓifhindulela!” ₂₂Vhabebi vhawe vha tshi vhuya vha ralo ndi uri vho vha vha tshi ofha vhahulwane vha Majuda, vhunga vhenevho vho vha vho no ḓi vhofha ḽa uri ane a vhuya a bula ḽa uri Yesu ndi Mesia u ḓo thathiwa sinagogoni yavho. ₂₃Ndi zwe vha tshi fhindula vha ri, “Hufha ene muṋe e munna. Mu vhudziseni!”

₂₄Vha dovha vha vhidza uyo munna vha mu vhudzisa vha ri, “Ambani ngoho phanḓa ha Mudzimu! Riṋe ri ḓivha uri hoyo munna ndi mutshinyi.”

₂₅Ene a fhindula a ri, “Nṋe zwauri ndi mutshinyi kana a si mutshinyi a thi zwi ḓivhi; tshine nda ḓivha ndi uri ndo bebwa ndi bofu, hone zwino ndi vho vhona.”

₂₆Vhone vha dovha vha vhudzisa vha ri, “Nṋa o tou ni ita mini? O ni swingulusa hani?”

₂₇Ene a fhindula a ri, “Hufha ndo no ḓi ni vhudza ni si thetshelese! Zwino ni kha ḓi ṱoḓa u dovha na zwi pfela mini? Kani-ha na inwi ni vho ṱoḓa u vha vhafunziwa vhawe?”

₂₈Vhone vha thoma u mu sema vha ri, “Mufunziwa wawe ndi enenwi; riṋe ri vhafunziwa vha Mushe. ₂₉Riṋe ri ḓivha uri Mudzimu o amba na Mushe, a vha uyo muthu a ri ḓivhi na hune a bva hone.”

₃₀Uyo munna a ri, “Zwi a kanukisa! O ntswingulusa, hone inwi a ni ḓivhi hune a bva hone! ₃₁Roṱhe ri ḓivha uri Mudzimu ha pfi thabelo dza mutshinyi; u pfa dza vhane vha mu hulisa vha ita zwine Ene a funa. ₃₂Zwino tshee shango ḽa sikiwa a ri athu vhuya ra zwi pfa zwa muthu we a swingulusa muthu we a tou bebwa e bofu. ₃₃Arali hoyu munna o vha a sa bvi ha Mudzimu o vha a sa ḓo kona tshithu.”

₃₄Vha fhindula vha ri, “Inwi we na tou bebelwa vhutshinyini na alutshela khaho, riṋe ni nga vhuya na ri funza mini-vho.” U ralo vha mbo ḓi mu tumula tshivhidzoni.

₃₅Yesu a zwi pfa uri vho tumula uyo munna tshivhidzoni. A tshi mu wana a mu vhudzisa a ri, “Nṋa Mubebwa-nga-muthu ni a mu fulufhela naa?”

₃₆Ene a ri, “Kha vha mmbudze uri ndi nnyi Muṋe wanga, uri ndi kone u mu fulufhela!”

₃₇Yesu a ri, “No no ḓi mu vhona; ndi Nṋe ane a khou amba na inwi.”

₃₈Uyo munna a ri, “Ndi a fulufhela Muṋe wanga!”, u ralo a mbo ḓi gwadama phanḓa hawe.

₃₉Yesu a ri, “Tshe Nṋe nda ḓela tshone fhano shangoni ndi u haṱula; mabofu a ḓo swinguluwa; vha vhonaho vha ḓo pofula.”

₄₀Vhaṅwe Vhafarisei vhe vha vha vhe nae henefho vha tshi pfa a tshi ralo vha ri, “Ni songo vha ni tshi khou ṱoḓa u ri na riṋe ri mabofu.”

₄₁Yesu a fhindula a ri, “Arali no vha ni mabofu ndi musi ni si na mulandu; zwino ni ri ni a vhona, ndi zwine na ḓi dzula ni na mulandu ngazwo.