JONASI 3

₁Muṋe washu a dovha a amba na Jonasi a ri, ₂“Takuwa, iya muḓini uḽa muhuluhulu wa Ninive, u vha ḓivhadze zwine nda u vhudza.” ₃Jonasi a thetshelesa ipfi ḽa Muṋe washu a takuwa a livha Ninive. Zwino Ninive wo vha u muḓi muhuluhulu, muthu a tshi tshimbila a fhedza maḓuvha mararu a konou u buḓekanya. ₄Jonasi a dzhena muḓini, a tshimbila lwendo lwa ḓuvha ḽithihi. A ḓivhadza a ri, “Ho sala maḓuvha a 40 fhedzi muḓi wa Ninive u tshi phusukanywa.” ₅Vhathu vha Ninive vha tenda Mudzimu. Vha ḓivhadza uri vhathu vha ḓidzime, vha ambare madzanganda, u thoma nga muhuluhulu u swika nga muṱukuṱuku.

₆Mafhungo ayo a swika ha khosi ya Ninive; a tsa kha khuluṋoni yawe, a bvula khanzu yawe, a ambara madzanganda, a dzula milorani. ₇Khosi ya ḓivhadza hoṱhe Ninive ya ri, “Hoyu ndi mulayo wa khosi na magota awe: Vhathu na phukha, masambi a kholomo na a nngu, zwi songo vhuya zwa thetshela tshithu, hu songo ḽiwa, hu songo nwiwa maḓi. ₈Vhathu na phukha zwoṱhe zwi ambare madzanganda. Muṅwe na muṅwe a rabele Mudzimu nga hune a kona, muṅwe na muṅwe a laṱe maitele awe mavhi na vhutshinyi hoṱhe he a ita. ₉Khamusi Mudzimu a nga kha ḓi ri litsha a ri khathutshela, a si tsha ri sinyutshela zwingafhangafha, ra si lovhe. Zwi ḓihwa nga nnyi?”

₁₀Mudzimu a vhona u ḓidina havho vha tshi laṱa maitele mavhi, a vha khathutshela, a si tsha vha phusukanya unga o amba.