LUKASI 14

₁Muṅwe musi nga Sabatha Yesu a ṱuwa na muṅwe murangaphanḓa wa Vhafarisei u yo ḽa nae ha hawe, huno vhathu vho vha vho dzula vho mu lalela uri vha vhone zwine a ḓo ita, ₂ngauri henefho phanḓa hawe ho vha hu na muṅwe munna we a vha o zwimba muvhili woṱhe. ₃Huno Yesu a vhudzisa vhaḓivhi vha Mulayo na Vhafarisei a ri, “Nṋa Mulayo u a tenda muthu a tshi fhodzwa nga Sabatha kana a u tendi naa?” ₄Vhone vha sokou fhumula. Ndi hone Yesu a tshi fhodza uyo muthu, a mu litsha a ṱuwa. ₅A konou amba navho a ri, “Ndi nnyi waṋu ane ṅwana wawe kana kholomo yawe yo wela bidzini a si ṱavhanye u i bvisa naho hu nga Sabatha?” ₆Hone vhone iḽo fhungo ḽa vha somela.

₇Yesu a tshi vhona vhaeni vha tshi nanga vhudzulo ha phanḓa, a vha fanyisedzela a ri, ₈“Arali na vhidziwa munyanyani, ni songo dzula vhudzuloni ha phanḓa; zwi nga kha ḓi itea uri hu vhe ho vhidziwa na a fhiraho inwi, ₉huno we a ni vhidza vhuvhili haṋu a vho ḓo amba na inwi a ri, ‘Kha vha takuwe zwavho vha sendelele avha.’ Inwi na vho ḓo ya u dzula kha vhudzulo ha murahurahu no farwa nga ṱhoni. ₁₀Tsha khwiṋe dzulani vhudzuloni ha murahurahu, uri o ni vhidzaho a tshi dzhena a kone u ḓo tou amba na inwi a ri, ‘Takuwani khonani yanga, ni ḓe ngeno phanḓa.’ Ndi hone ni tshi ḓo huliswa vhaeni vhoṱhe vha tshi zwi vhona. ₁₁Ane a ḓihudza u ḓo ṱukufhadzwa, ane a ḓiṱukufhadza u ḓo huliswa.”

₁₂Ndi hone Yesu a tshi amba na muṋe wa muḓi a ri, “Musi ni na tshiswiṱulo kana tshilalelo, ni songo vhidza khonani dzaṋu kana vharathu vhaṋu, naho e mashaka kana vhahura vha vhapfumi, ngauri vha nga ḓo ni vhidza-vho na vho ḓo vha no ima kha ḽa uri mutondi u tonda mutondi ngae. ₁₃Musi ni na tshimima, vhidzani vha si na tshavho na zwihole, na vha sa koni u tshimbila, na mabofu, ₁₄ndi hone ni tshi ḓo vha na mashudu, vhunga vhenevho vha sa koni u ni vhidza-vho. Inwi ni ḓo tou pfufhiwa nga Mudzimu musi vhavhuya vhoṱhe vha tshi vuwa vhafuni.”

₁₅Muṅwe wa vho dzulaho nae zwiḽiwani a tshi pfa zwenezwo a amba na Yesu a ri, “U na mashudu ane a ḓo vhidziwa munyanya muvhusoni wa Mudzimu.”

₁₆Yesu a amba nae a ri, “Ho vhuya ha vha na muṅwe munna we a ri a tshi khou lugisa munyanya a vhidza vhathu vhanzhi. ₁₇Nga ḓuvha ḽa munyanya a ruma muḓinḓa wawe uri a yo laledza vho vhidzwaho a ri, ‘Iḓani, zwoṱhe zwo lugiswa!’ ₁₈Hone vhone vhoṱhe vha ḓibvula sa vho langanaho. Wa u thoma a ri, ‘Ndo renga tsimu; ndi fanela u i tandula. Nga vha mpfarele, zwi ḓo nkunda.’ ₁₉Muṅwe-vho a ri, ‘Ndo renga phulu dza dzhogo ṱhanu, ndi kha ḓi yo dzi gudisa; zwi ḓo nkunda.’ ₂₀Muṅwe nga fhaḽa a ri, ‘Ndi kha ḓi bva u vhinga, zwenezwo ndi nga si kone u ḓa.’ ₂₁Uyo muḓinḓa a huma a yo vhudza muṋe wawe zwe zwa itea. Muṋe wa muḓi a sinyuwa nga maanḓa a amba na muḓinḓa wawe a ri, ‘Gidimelani zwiṱaraṱani na nḓilani dza muḓi, ni vhuye na vhashai na zwihole na mabofu na vha sa koni u tshimbila.’ ₂₂Hu si kale uyo muḓinḓa a dovha a vhuya a ri, ‘Ndo ita zwe vha amba, hone vhudzulo vhu tshee hone.’ ₂₃Ndi hone muṋe wawe a tshi amba nae a ri, ‘Iyani magondoni na dzinḓilani ni kombetshedze vhathu vha ḓe uri nnḓu yanga i ḓale. ₂₄Hone vhaḽa vhe nda vha vhidza vha hana, ndi ri a hu na na muthihi wavho ane a ḓo vhuya a thetshela tsha munyanya wanga!’ ”

₂₅Ho vha hu na gogo ḽihulu ḽi tshi khou tshimbila na Yesu. Ene a rembuluwa, a vha lavhelesa a ri, ₂₆“Ane a ri a tshi ḓa ha Nṋe a si vhenge khotsi awe na mme awe, na musadzi wawe na vhana vhawe, na vharathu vhawe na khaladzi dzawe, a sa ite na u ḓivhenga ene muṋe, onoyo ha koni u vha mufunziwa wanga. ₂₇Ane a sa hwale tshifhambano tshawe a ntevhela, ha koni u vha mufunziwa wanga.

₂₈“Ndi nnyi waṋu ane a tshi ṱoḓa u fhaṱa mutsheṱo mulapfu, a si thome u dzula fhasi a anganya uri a vhone arali e na tshelede yo eḓanaho u fhedza mushumo? ₂₉A sa ralo u ḓo ri o no tea a vho kundwa u fhedza uyo mutsheṱo, vha zwi vhonaho vha vho ḓo mu sea ₃₀vha ri, ‘Vhonani munna o thoma mutsheṱo zwino u vho kundwa u u fhedzisa!’

₃₁“Kana ndi ifhio khosi ine ya ri yo bvelwa pfumo nga iṅwe khosi i re na vhanna vha 20 000, yone i na vha 10 000 fhedzi, i si thome u dzula fhasi ya rekanya uri i vhone arali i tshi nga kona u livhana na iḽa iṅwe khosi? ₃₂Arali a vhona uri a nga si kone, u ḓo ruma vhaḓinḓa uri vha yo ṱangana na iḽa khosi musi i tshee kule, vha pfumedzane. ₃₃Ndi zwone zwine nda ri, a hu na na muthihi waṋu ane a nga vha mufunziwa wanga arali a sa furaleli zwoṱhe zwine a vha nazwo.

₃₄“Muṋo ndi tshithu tshavhuḓi, hone wa vhuya wa fhela vhuhali hawo wa si tsha dunga, u nga dovha wa dungiswa ngani? ₃₅A wo ngo tsha lugela u nyora mavu naho hu a ṱanganywa na mupfudze; tshawo ndi u laṱwa. A na nḓevhe kha a ḓipfele.”