LUKASI 17

₁Yesu a amba na vhafunziwa vhawe a ri, “Zwikhukhuliso zwone zwi nga si kundwe u vha hone; hone u ḓo zwi vhona hoyo ane zwa ḓa ngae! ₂Ane a khakhisa muṅwe wa havha vhaṱuku, ṱhamu yawe i ḓo fhira zwa musi o tou vhofhelelwa zwawe guyo mukoloni a poswa lwanzheni.

₃“Ivhani na nzhele! Arali murathu wau a u khakhela, u mu kaidze. Arali u tshi ralo a ḓisola, u mu hangwele. ₄Arali a u khakhela luṱanu na luvhili nga ḓuvha hone a ḓi ḓa kha iwe luṱanu na luvhili a tshi ri, ‘Ndo laṱa,’ u fanela u ḓi mu hangwela.”

₅Vhaapostola vha amba na Muṋe washu vha ri, “Kha vha ri engedze lutendo.”

₆Muṋe washu a tshi vha fhindula a ri, “Ngavhe ni vhe ni na lutendo lune lwa tou lingana na mbeu ya muhuyu, no vha ni tshi nga vhudza hoyu murebeila na ri, ‘Tupuwa u yo ḓiṱavha lwanzheni!’ na wana wo no tupuwa.

₇“Ndi nnyi waṋu henefha ane a nga ri e na mushumi wawe wa u lima kana wa u lisa nngu, a ri uyo mushumi a tshi vhuya a amba nae a ri, ‘Dzulani zwaṋu fhasi ni ḽe’? ₈Tshaṋu a si u sokou amba nae na ri, ‘Nndugiseleni zwiḽiwa ni ambare zwavhuḓi ni zwi ḓise, ndi thome ndi ḽe, ndi nwe, ndi hone na inwi ni tshi ḓo kona u ḽa na nwa’? ₉Nṋa mushumi ó ita zwe a vhudzwa u a vhuya a livhuhiwa naa? ₁₀Na inwi musi no khunyeledza zwoṱhe zwe Mudzimu a ni vhudza, ni sokou ri, ‘Riṋe a ri na tshe ra shuma; ro tou ita zwo ri fanelaho.’ ”

₁₁Musi Yesu a tshee lwendoni lwa u ya Jerusalema, a bva nga vhukati ha Samaria na Galelia. ₁₂Musi a kha ḓi tou ri u a dzhena kha muṅwe muḓi, a ṱangana na vhathu vha fumi vha re na vhulwadze ha lukanda vhu kumadzaho, vha ri vho ima fhaḽa kulenyana ₁₃vha vhidzelela vha ri, “Yesu Muṋe washu, a ri khathutshelwi zwashu naa?”

₁₄Yesu a tshi vha vhona a amba navho a ri, “Iyani ha vhotshifhe vha ni vhone.” Vhe nḓilani vha fhola. ₁₅Muṅwe wavho a tshi vhona uri o fhola, a mbo ḓi huma a tshi khou ṱavha mukosi a tshi renda Mudzimu. ₁₆A ḓa a ḓiposa fhasi milenzheni ya Yesu, a mu livhuha. Uyo munna o vha e Musamaria. ₁₇Yesu a ri, “Hufha ho fhodzwa vha fumi, zwino vhaḽa vhaṅwe vha 9 vha ngafhi? ₁₈Khezwi hu si na o vhuyaho uri a livhuhe Mudzimu, arali e si uyu mutsinda!” ₁₉A amba nae a ri, “Takuwani zwaṋu ni ṱuwe; lutendo lwaṋu lwo ni fhodza.”

₂₀Vhaṅwe Vhafarisei vho vhuya vha vhudzisa Yesu uri muvhuso wa Mudzimu u ḓo ḓa lini, Ene a fhindula a ri, “Muvhuso wa Mudzimu u tshi ḓa muthu a nga si u vhone nga maṱo na u sedza hani. ₂₁A hu na ane a ḓo tou ri, ‘Asuyu!’ kana ane a ri, ‘Asuuḽa!’ ngauri muvhuso wa Mudzimu wo no ḓi vha vhukati haṋu.”

₂₂Ndi hone a tshi amba na vhafunziwa a ri, “Hu ḓo ḓa tshifhinga tshine na ḓo ṱuvha u vhona ḓuvha ḽithihi zwaḽo ḽa Mubebwa-nga-muthu, hone ni si ḽi vhone. ₂₃Hu ḓo vha na vhane vha ḓo ni vhudza vha ri, ‘U hafhaḽaa!’ kana vha ri, ‘U ngeno!’ Hone inwi ni songo vhuya na ya; ni songo vha tevhela; ₂₄Mubebwa-nga-muthu nga ḓuvha ḽawe u ḓo tou nga lupenyo lune lu tshi ri vhenge lutomboni, lwa vhonetshela u bva vhusendakamisi u guma vhusendekamisi. ₂₅Hone o fanela u thoma u tambudzwa zwinzhi, a vhuye a tou landulwa nga vhenevha vhathu vha musalauno. ₂₆Zwa misi ya Mubebwa-nga-muthu zwi ḓo tou fana na zwiḽa zwa misi ya Nua. ₂₇Ho vha hu tshi ḽiwa, hu tshi nwiwa, hu tshi dzewa, ha vhuya ha swika ḓuvha ḽe Nua a dzhena tshikepeni, maḓi mahulu a mbo ḓa a vha lozwa vhoṱhe. ₂₈Zwi ḓo tou vhuya zwi zwa misi iḽa ya Loto. Ho vha hu tshi ḽiwa, hu tshi nwiwa, hu tshi rengwa hu tshi rengiswa, hu tshi liṅwa, hu tshi fhaṱwa. ₂₉Ho ḓo ri ḓuvha ḽe Loto a ṱutshela muḓi wa Sodoma, Mudzimu a nisa mulilo na matombo a dugaho, ha vha u vha lozwa vhoṱhe. ₃₀Na nga ḓuvha ḽa u dzumbuluwa ha Mubebwa-nga-muthu zwi ḓo ḓi tou ralo.

₃₁“Ane a ḓo vha e muṱani nga ḽeneḽo ḓuvha a songo tsha vhuya a dzhena nḓuni u yo dzhia thundu yawe, na a re tsimuni a songo tsha humela hayani. ₃₂Kani-ha no hangwa zwa musadzi wa Loto! ₃₃Ane a tata u ṅaledza vhutshilo hawe u a ḓilozwa, ane a fa ndi ene ane a ḓo tshila. ₃₄Vhusiku honoho vhavhili vha ḓo vha vhulaloni vhuthihi, muṅwe wavho a dzhiwa, muṅwe wavho a dzhiwa, muṅwe a siwa. ₃₅Vhasadzi vhavhili vha ḓo vha vha tshi khou sinḓisana mutulini muthihi; muṅwe wavho a dzhiwa, muṅwe a siwa.”

_36-37Ndi hone vhafunziwa vha tshi mu vhudzisa vha ri, “Hu ḓo vha hu ngafhi Muṋe washu?” Yesu a vha fhindula a ri, “Hune ha vha na tshitumbu ndi hune maanga a kuvhangana hone.”