MALAKIA 4

“Vhukuma ḓuvha ḽi khou ḓa;

ḽi ḓo fhisa unga ṋanḓo.

Vhoṱhe vhadzia-u-ḓihudza na vhaitazwivhi

vha ḓo nga maṱanga,

ḓuvha heḽo ḽi no khou ḓa ḽi ḓo vha fhisa nga mulilo.

A hu nga sali mudzi wavho kana davhi ḽavho.

₂Hone inwi vhane na ofha dzina ḽanga

ni ḓo penyelwa nga ḓuvha ḽi re u fulufhedzea,

ḽa ni fhodza nga maṱalazaza aḽo.

Ni ḓo khana unga ṋamana dzi tshi bva dangani.

₃Ndi hone ni tshi ḓo kandekanya vhavhi,

vha ḓo nga milora ine na i kanda nga ṋayo

musi une nda ita zwithu hezwo.”

₄“Ni songo hangwa mulayo wa muḓinḓa wanga Mushe,

ndayo na milayo ye nda mu ṋea thavhani ya Horebe

uri i vhuse Vhaisraele vhoṱhe.

₅Vhonani,

ndi ḓo ruma muporofita Elia a ḓa ha inwi,

ḓuvha ḽanga iḽo ḽihulu ḽi ofhisaho ḽi sa athu ḓa.

₆U ḓo dovha a pfumedzanya vhokhotsi na vhana vhavho,

mbilu dza vhana dza livha kha vhokhotsi avho,

vha sala vha tshi pfana

ndi sa ḓo ḓa nda lozwa shango ḽoṱhe.”