MATIOSI 15

₁Ndi hone Vhafarisei na vhaḓivhi vha Mulayo vha bvaho Jerusalema vha tshi ḓa ha Yesu, vha ri, ₂“Ndi mini vhafunziwa vhavho vha tshi pfuka milayo ya vhomakhulukuku, vha tshi ḽa vha songo ṱamba zwanḓa?” ₃Ene a vha fhindula a ri, “Inwi-ha, ndi mini ni tshi pfuka ndaela ya Mudzimu nga mulandu wa zwidayo zwaṋu? ₄A thi ri Mudzimu o ri, ‘Hulisa khotsi au na mme au,’ a dovha a ri, ‘Ane a sema khotsi kana mme awe tshawe ndi u vhulawa.’ ₅Hone inwi ni tshi funza ni ri arali muthu e na tshine a nga kona u farisa ngatsho khotsi awe kana mme awe, hone a ri, ‘Hei ndi nduvho ya Mudzimu,’ ₆a nga litsha zwawe u hulisa khotsi awe kana mme awe. Asizwo-ha, no no pfuvhisa ipfi ḽa Mudzimu nga zwidayo zwaṋu. ₇Vhahoi ndinwi! Yesaya ho ngo ni zwifhelela a tshi ni porofita a ri,

₁₀Yesu a vhidza vhathu a vha vhudza a ri, “Thetshelesani ni ṱalukanye zwine nda amba: ₁₁tshine tsha kumadza muthu a si tshine tsha dzhena nga mulomo, ndi tshine tsha bva nga mulomo wawe.”

₁₂Ndi hone vhafunziwa vha Yesu vha tshi ḓa khae vha ri, “Nṋa vho zwi vhona uri Vhafarisei vho khukhulisea vha tshi pfa ipfi iḽo?” ₁₃A vha fhindula a ri, “Muri muṅwe na muṅwe u songo ṱavhiwaho nga Khotsi anga wa ṱaḓulu u ḓo tupulwa. ₁₄Vha litsheni, vha ḓi vha mabofu vhane vha endedza mabofu. Hone arali bofu ḽi tshi endedza ḽiṅwe bofu, vha ḓo wela dindini vhuvhili havho.”

₁₅Pitrosi a ri, “Kha vha ri ṱalutshedze-vho tshiḽa tshifanyiso.” ₁₆Yesu a fhindula a ri, “Matsina na inwi ni kha ḓi kundwa u ṱalukanya naa? ₁₇A ni zwi ḓivhi uri tshine muthu a ḽa tshi fhirela thumbuni tsha fhelela bungani? ₁₈Hone zwi bvaho nga mulomo zwi bva mbiluni; ndi zwone zwine zwa kumadza muthu. ₁₉Mbiluni ya muthu ndi hone hune ha bva mihumbulo mivhi, na vhupondi, na vhupombwe ha tshakha-tshakha, na vhufobvu, na mazwifhi, na u nyefulana. ₂₀Ndi zwone zwine zwa kumadza muthu. Hone u ḽa u songo ṱamba zwanḓa a zwi kumadzi muthu.”

₂₁Yesu a ṱuwa henefho a ṱutshela thungo dza Tiro na Sidoni. ₂₂Vha ṱangana na musadzi wa Mukanana wa thungo dzenedziḽa, a vha tevhela a tshi khou ḓi ṱavha mukosi a tshi ri, “Muṋe wanga, Murwa Dafita, kha vha nkhathutshele! Ṅwana wanga wa musidzana u khou tou tambula nga thuṅwa ya Saṱhane!” ₂₃Hone Yesu a si mu fhindule na ipfi na ḽithihi. Vhafunziwa vha vhuya vha ya khae vha mu humbela vha ri, “Nga vha mu vhudze a ṱuwe; u khou enda a tshi ri fhunga.” ₂₄Hone Ene a fhindula a ri, “A tho ngo rumiwa kha nngu dzo xelaho kha vhaṅwe, ndo rumiwa kha Vhaisraele fhedzi.” ₂₅Hone uyo musadzi a ḓi enda a tshi mu gwadamela a tshi ri, “Muṋe wanga, nga vha mpfarise!” ₂₆Yesu a fhindula a ri, “A zwo ngo fanela ri tshi dzhia zwiḽiwa zwa vhana ra ṋea zwibwa.” ₂₇Uyo musadzi a fhindula a ri, “Hufha zwibwa zwi tshi ḓi ḽa-vho matshakatshaka ane a wela fhasi a tshi bva ḓafulani ḽa vhaṋe vhazwo.” ₂₈Ndi hone Yesu a tshi mu fhindula a ri, “Mme a ṅwana, fulufhelo ḽaṋu ndi ḽihulu. Zwine na tama nga zwi itee.” Ṅwana wawe a mbo ḓi fhola na zwenezwo.

₂₉Yesu a tshi ṱuwa afho a tshimbila na Dzivha ḽa Galelia, a tshi swika a gonya tshikwara a dzula fhasi. ₃₀Ha ḓa nae magogo a vhathu vha tshi mu ḓisela zwihole na mabofu na vho huvhalaho na mbevhevhe na vhaṅwe vhanzhi, vha vha vhea milenzheni yawe, Ene a vha fhodza. ₃₁Vhathu vhoṱhe vha kanuka vha tshi vhona mbevhevhe dzi tshi vho amba na zwihole zwi tshi vho tshimbila na mabofu a tshi vho vhona, vha renda Mudzimu wa Israele.

₃₂Yesu a vhidza vhafunziwa vhawe a ri, “Havha vhathu ndi vha pfela vhuṱungu, ngauri ḽo no vha ḓuvha ḽa vhuraru ri navho, zwino vho no tou ita na u fhelelwa nga zwiḽiwa. A thi funi vha tshi ṱuwa na nḓala, vha nga ṋoka nḓilani.” ₃₃Vhafunziwa vha mu fhindula vha ri, “Zwiḽiwa zwa u fusha vhathu vhangafhangafha ri ḓo zwi wana ngafhi henefhano sogani?”

₃₄Yesu a vha vhudzisa a ri, “Ni na mikonde mingana?” Vha fhindula vha ri, “Ndi miṱanu na mivhili, khathihi na khovhe dzi si gathi.” ₃₅Yesu a vhudza vhathu uri vha dzule fhasi, ₃₆a dzhia mikonde iḽa miṱanu na mivhili na khovhe, a livhuha Mudzimu a zwi ṅwatekanya, a ṋea vhafunziwa vhawe, vhone vha zwi kovhela vhathu. ₃₇Vhoṱhe vha ḽa vha fura, zwipiḓa zwo salaho zwa ḓadza mifaro miṱanu na mivhili. ₃₈Vhe vha ḽa ndi 4 000, ri tshi vhala vhanna fhedzi, ri sa vhali vhasadzi na vhana. ₃₉Ndi hone Yesu a tshi onesa vhathu, a dzhena tshikepeni a ṱutshela thungo dza Magadani.