MATIOSI 20

₁“Ndi zwine nda ri muvhuso wa Mudzimu u fana na muṋe wa tsimu we a bubela u yo thola vhashumi vha u shuma tsimuni yawe. ₂A langana na vhashumi uri u ḓo vha fha malamba a ḓuvha nga ḓuvha, a konou vha rumela tsimuni. ₃Nga tshifhinga tsha 9 a dovha a bva a ṱangana na vhaṅwe vha sa athu wana mushumo vho ima khoroni, ₄a amba navho a ri, ‘Na inwi iyani tsimuni, ndi ḓo ni fha malamba eneo e a ni fanela.’ ₅Nangoho vha ya. A dovha a ita zwenezwo nga tshifhinga tsha 12, a dovha nga tshifhinga tsha vhuraru. ₆A tshi dovha u bva nga tshifhinga tsha vhuṱanu a ṱangana na vhaṅwe vho ḓiimela henefho, a amba navho a ri, ‘Khezwi no sokou ima fhano ḓuvha ḽoṱhe ni sa shumi?’ ₇Vha fhindula vha ri, ‘Hufha hu si na we a ri thola.’ A vha vhudza a ri, ‘Na inwi iyani tsimuni!’ ₈Musi ḽo no kovhela muṋe wa tsimu a vhudza mukoma wawe a ri, ‘Vhidzani vhashumi ni vha fhe malamba avho; ni thome nga vhe vha ḓela murahu ni fhedzisele nga vha u thoma.’ ₉Vhaḽa vhe vha thoma nga tshifhinga tsha vhuṱanu vha ḓa vha wana a ḓuvha ḽoṱhe. ₁₀Musi hu tshi ḓa vhaḽa vha u thoma vha humbula uri vha ḓo hola manzhi, hone na vhone vha fhiwa malamba eneo. ₁₁Vha tshi wana yone vha gungulela muṋe wa tsimu ₁₂vha ri, ‘Hufha avha vha u fhedzisela vho shuma awara nthihi fhedzi, zwino vha vha fha hani zwithihi na riṋe vhe ra shuma ḓuvha ḽoṱhe ra tambula nga ḓuvha?’ ₁₃Muṋe wa tsimu a amba na muṅwe wavho a ri, ‘Hee khonani, a hu na he nda ni khakhela. A ro ngo pfana eneo malamba naa? ₁₄Dzhiani-ha malamba aṋu ni ye hayani. Nṋe ndi khou tou funa u fha hoyu wa u fhedzisela zwine zwa fana na zwaṋu. ₁₅Kani a thi na pfanelo ya u ita zwine nda funa nga zwi re zwanga? Kani-ha ni vho ita vivho nga u vhona vhuthu hanga?’

₁₆“Nga u ralo vhane ṋamusi vha vha vha u ranga vha vho ḓo vha vhone tsaleli, vhane vha vha tsaleli vha vho ḓo vha vhone vha u ranga.”

₁₇Yesu e nḓilani ya u ya Jerusalema a vhidzela vha 12 thungo, a vha vhudza a ri, ₁₈“Ri khou gonya Jerusalema. Henengei Mubebwa-nga-muthu u ḓo kumedzwa vhotshifhe vhahulwane na vhaḓivhi vha Mulayo. Vha ḓo mu haṱulela lufu ₁₉vha konou mu kumedza vhannḓa uri vha tambe ngae vha mu rwe nga mboma vha fhedze nga u mu vhamba kha tshifhambano. Hone nga ḓuvha ḽa vhuraru u ḓo vuswa.”

₂₀Ndi hone musadzi wa Zebedia a tshi ḓa ha Yesu e na vhana vhawe vhavhili vha vhatuka, Jakopo na Johanisi, a gwadama phanḓa hawe a ri, “Ndo vha ndi na khumbelo.” ₂₁Yesu a fhindula a ri, “Vha khou ṱoḓa u humbela mini?” A ri, “Nga vha mpfulufhedzise uri vhana vhanga avha vhavhili vha ḓo dzula navho muvhusoni wavho, muṅwe thungo ya tshauḽa muṅwe thungo ya tshamonde.” ₂₂Yesu a fhindula a ri, “A ni tsha ḓivha na tshine na humbela. Tshinwelo tshine Nṋe nda pfi ndi nwe inwi ni nga kona u tshi nwa naa?” Vha ri, “Ri nga kona.” ₂₃Yesu a fhindula a ri, “Nangoho tshinwelo tshanga ni ḓo tshi nwa-vho. Hone uri hu ḓo dzula nnyi kha tshauḽa kana kha tshamonde tshanga, a zwi langiwi nga Nṋe; zwi ḓo fhiwa avho vhe Khotsi anga a vha lugisela.”

₂₄Vhaḽa vhaṅwe vhafunziwa vha fumi vha tshi pfa khumbelo ya avho mukomana na murathu zwa vha dina. ₂₅Ndi hone Yesu a tshi vha vhidza a ri, “Ni a zwi ḓivha uri vhavhusi vha dzitshakha vha a dzi langa nga tshiṱuhu, vhahulwane vhadzo vha ṱongisa maanḓa avho. ₂₆Hone hezwo a si zwone zwine zwa itea kha inwi. Ane a funa u pfi muhulwane kha inwi, nga a vhe ene mushumeli waṋu; ₂₇ane a funa u vha wa u ranga, nga' ḓiite phuli yaṋu noṱhe, ₂₈unga na Mubebwa-nga-muthu a songo ḓa u shumelwa, o ḓa u shumela vhaṅwe na uri a fe a vhe tshipfumelo tsha u vhofholola vhanzhi.”

₂₉Vha tshi bva Jeriko, Yesu a tevhelwa nga gogo ḽihulu. ₃₀Zwino henefho nḓilani ho vha ho dzula mabofu mavhili. Vha tshi pfa hu tshi pfi Yesu u khou fhira vha ṱavha mukosi vha ri, “Muṋe washu Murwa wa Dafita, nga vha ri pfele vhuṱungu!” ₃₁Vhathu vha vha kaidza uri vha fhumule, u ralo ha tou vha u vha ṱuṱuwedza u ṱavha mukosi vha ri, “Muṋe washu Murwa wa Dafita, a vha ri pfeli zwashu vhuṱungu?” ₃₂Yesu a ima a vha vhidzisa a ri, “Nṋa ndi mini tshine na funa ndi tshi ni itela?” ₃₃Vha mu fhindula vha ri, “Muṋe washu, ri lila uri ri kone u vhona-vho.” ₃₄Yesu a vha pfela vhuṱungu a kwama maṱo avho, kathihi fhedzi vha mbo ḓi kona u vhona; vha mu tevhela.