MATIOSI 26

₁Musi Yesu o fhedza u amba maipfi ayo oṱhe a amba na vhafunziwa vhawe a ri, ₂“Ḓivhani uri hu tshee ho sala maḓuvha mavhili hu tshi ḽiwa vhuṱambo ha Paseka. Ndi hone Mubebwa-nga-muthu a tshi ḓo kumedzwa uri a vhambiwe tshifhambanoni.”

₃Zwenezwo vhotshifhe vhahulwane na vhahulwane vha lushaka vha kuvhangana khoroni ya tshifhe muhulu we a vha a tshi pfi Khayafasi, ₄vha vhamba maano a u fara Yesu nga vhukwila uri vha mu vhulahe. ₅Hone vha ri, “Ri songo mu fara vhuṱamboni; vhathu vha nga ḓo ri vutshela.”

₆Yesu o vha e Bethania nḓuni ya Simoni uḽa wa u lwala vhulwadze ha lukanda. ₇Ha ḓa muṅwe musadzi o fara tshiḓolo tshi nukhelelaho nga khambana ya alibastere. Itsho tshiḓolo tsho vha tshi tsha mutengo muhulu. Uyo musadzi a mbo ḓi shululela tshiḓolo kha ṱhoho ya Yesu.

₈Vhafunziwa vhawe vha tshi zwi vhona vha vhilaela vha ri, “Nṋa u itani a tshi tambisa itshi tshiḓolo? ₉Khezwi tshi songo rengiswa nga tshelede nnzhi ya ṋewa zwayo vhashai?” ₁₀Hone Yesu a ḓivha zwine vha amba. Ndi hone a tshi fhindula a ri, “Ni songo ṱolou dina hoyu musadzi. Kani ho ngo nnyitela zwavhuḓi? ₁₁Vhashai ni ḓo ḓi dzula ni navho misi yoṱhe, hone Nṋe a ni nga vhi na Nṋe misi yoṱhe. ₁₂Hoyu musadzi a tshi ḓodza muvhili wanga mapfura aya ho vha u nndugisela ḓuvha ḽa u swiṱwa hanga. ₁₃Zwino ipfani-ha: zwe hoyu musadzi a nnyita a zwi nga hangwiwi; dzina ḽawe ḽi ḓo pfala-vho hoṱhe-hoṱhe hune mafhungo maḓifha aya a ḓo anḓadzwa hone shangoni ḽoṱhe.”

₁₄Ndi hone hu tshi takuwa muṅwe wa vha 12 a no pfi Judasi Iskariote, a ya ha vhotshifhe vhahulwane ₁₅a ri, “Ni ḓo mpha vhugai arali nda ni kumedza Ene?” Vha langana nae uri vha ḓo mu fha maseṱha a 30. ₁₆U bva zwenezwo Judasi a mbo ḓi thoma u ṱoḓa tshifhinga tsha u vha sumbedza hune vha nga wana Yesu.

₁₇Nga ḓuvha ḽa u thoma ḽa vhuṱambo ha Vhurotho vhu si na mbilisa vhafunziwa vha ḓa ha Yesu vha mu vhudzisa vha ri, “Vhafunzi, vha funa ri tshi yo vha lugisela ngafhi tshilalelo tsha Paseka?” ₁₈Yesu a fhindula a ri, “Dzhenani muḓini ni ye ha mukene ni mu vhudze ni ri, ‘Vhafunzi vha ri: Tshifhinga tshanga tsho sendela; ndi khou ṱoḓa u ḽa Paseka na vhafunziwa vhanga nḓuni yavho.’ ”

₁₉Vhafunziwa vha mbo ya vha ita zwenezwo zwe Yesu a vha laedza, vha konou lugisa tshilalelo tsha Paseka.

₂₀Nga madekwana Yesu a dzula zwiḽiwani na vha 12. ₂₁Musi vha tshi khou ḽa, Yesu a ri, “Zwino ipfani-ha: muṅwe waṋu henefha u ḓo mpheṱa.” ₂₂Zwa vha dina, vha thoma u mu vhudzisa nga muthihi nga muthihi vha ri, “Kani Muṋe wanga vha khou amba nṋe?”

₂₃A fhindula a ri, “Ane a ḓo mpheṱa ndi a thothaho na Nṋe fhano. ₂₄Zwe Maṅwalo a tela Mubebwa-nga-muthu zwi ḓo ṱuwa zwi tshi itea, hone hoyo ane a ḓo mu fheṱa u ḓo zwi vhona. Onoyo u ḓo ita na u ḓisola zwe a vhuya a bebwa.”

₂₅Judasi, we a sala a tshi mu fheṱa a mbo vhudzisa a ri, “Kani a nga vha e nṋe Vhafunzi?” Yesu a fhindula a ri, “Ndi zwenezwo.”

₂₆Musi vha tshi khou lalela, Yesu a dzhia vhurotho, a livhuha Mudzimu a konou vhu ṅwatekanya a ṋea vhafunziwa vhawe a tshi ri, “Ṱanganedzani ni ḽe; hoyu ndi muvhili wanga.”

₂₇O no ralo a dzhia tshinwelo, a livhuha Mudzimu a vha ṋea a ri, “Inwani ngatsho noṱhe. ₂₈Haya ndi malofha anga ane a shululelwa vhathu vhanzhi uri vha hangwelwe vhutshinyi; malofha anga haya ndi a u khwaṱhisa mulanga wa Mudzimu. ₂₉Zwino ipfani-ha: u bva ṋamusi a thi tsha ḓo dovha nda nwa waini ndi vhuye ndi i nwe na inwi nga huswa nga heḽo ḓuvha muvhusoni wa Khotsi anga.” ₃₀Ndi hone vha tshi imba luimbo vha konou ya Thavhani ya Miolivi.

₃₁Ndi hone Yesu a tshi vha vhudza a ri, “Vhusiku honovhu noṱhe ni ḓo nndaṱa, ngauri ho ṅwalwa ha pfi,

₃₂“Hone musi ndo no vuswa vhafuni hu ḓo ranga Nṋe u ya Galelia, inwi na konou tevhela.”

₃₃Ndi hone Pitrosi a tshi amba na Yesu a ri, “Naho vhoṱhe vha tshi nga vha laṱa, nṋe ndi nga si vhuye nda vha laṱa.” ₃₄Yesu a mu fhindula a ri, “Litshani ndi ni vhudze: hu ḓo ri vhusiku ha ṋamusi mukukulume u sa athu lila, na vha no no landula kararu na ri a ni nnḓivhi.” ₃₅Pitrosi a dovha a khwaṱhisa a ri, “Nangwe nda tou pfi ndi fe navho, ndi nga si vhuye nda ri a thi vha ḓivhi!” Na vhaḽa vhaṅwe vhafunziwa vhoṱhe vha ḓi ralo-vho.

₃₆Ndi hone Yesu a tshi ṱuwa na vhafunziwa vha ya fhethu hu no pfi Getsemani. Vha tshi swika a vha vhudza a ri, “Salani henefha, Nṋe ndi kha ḓi ya fhaḽa u rabela.” ₃₇A ṱuwa na Pitrosi na vhana vhavhili vha Zebedia, a ṱungufhala o tou hanganea. ₃₈A amba navho a ri, “Mbilu yanga i vhavha lune nda tou nga ndi sa fa. Dzulani henefha ri tshesisane.” ₃₉A fhirela phanḓanyana a ḓiposa fhasi a wa nga tshifhaṱuwo a rabela a ri, “Khotsi anga, arali zwi tshi konadzea itshi tshinwelo a tshi mpfuki zwanga naa? Naho ndi tshi ralo hu songo itwa zwine Nṋe nda zwi funa, nga hu itwe zwi funwaho nga Iwe.”

₄₀A tshi vhuya, a wana vhaḽa vhafunziwa vho eḓela, a amba na Pitrosi a ri, “Ni tou kundwa na u pandela khofhe na Nṋe awara nthihi zwayo na? ₄₁Fhaṱuwani ni rabele uri ni si ungwe. Mbiluni ni a zwi funa; ni ro kundwa nge na vha vhathu vha ṋama.”

₄₂A dovha a yo rabela a ri, “Khotsi anga, arali zwi sa konei uri tshinwelo itshi tshi mpfuke, nga hu itwe zwine Iwe wa funa.” ₄₃A tshi vhuya a ḓi wana vho dovha vha eḓela, ngauri maṱo avho o vha a tshi khou lemela nga khofhe.

₄₄A vha sia henefho a dovha a yo rabela lwa vhuraru, a ḓi amba maipfi eneaḽa. ₄₅A tshi vhuya kha vhafunziwa a vha vhudza a ri, “Nṋa ni tshee no eḓela zwaṋu no ḓiawetshela? Tshikhathi tshazwo tsho swika. Zwino Mubebwa-nga-muthu ndi hone o kumedzwa zwanḓani zwa vhatshinyi. ₄₆Takuwani ri ṱuwe; uḽa muthu we a mpheṱa asuyu o swika.”

₄₇Musi a tshi kha ḓi amba ha mbo bvelela Judasi, we a vha e muṅwe wa vha 12, e na tshigwada tshihulwane tsho hwala mapanga na dzithonga, tsho rumiwa nga vhotshifhe vhahulwane na vhahulwane vha lushaka. ₄₈Tshiḽa tshifheṱi tsho vha tsho dzula tsho vha vhudza tsha ri, “Ane nda ḓo mu resha nga u tou mu kuvhatedza, ndi ene. Ni mu fare.” ₄₉Judasi e u swika a mbo ḓi ya ha Yesu a ri, “Ri a vusa Vhafunzi!” a tshi ralo a mu kuvhatedza. ₅₀Hone Yesu a mu fhindula a ri, “Hee khonani, itani tshe na ḓela tshone!” Vhaḽa vha mbo ḓi sendela vha fara Yesu. ₅₁Muṅwe wa vhaḽa vhe vha vha vhe na Yesu a mbo ḓi ṱomola banga ḽawe a tshi ri a reme phuli ya tshifhe muhulu, a i tumula nḓevhe. ₅₂Yesu a amba nae a ri, “Vhuedzedzani banga ḽaṋu tshilandani tshaḽo; vhoṱhe vhane vha rema vhaṅwe nga banga vha ḓo vhulawa-vho ngaḽo. ₅₃Kani ni vhona unga zwi a nkunda u humbela Khotsi anga a mbo ḓi nthumela mmbi dza vharuṅwa dzi fhiraho 12? ₅₄Hone arali nda ralo Maṅwalo a nga khunyeledzwa hani a tshi ri ndi fanela u itwa zwenezwi?”

₅₅Zwenezwo Yesu a amba na tshigwada tshiḽa tsha vhathu a ri, “No tou vhuya na bva no hwala mapanga na dzithonga ni tshi ḓa u fara Nṋe nda nga ndi ḽivemu naa? Hufha ḓuvha ḽiṅwe na ḽiṅwe ndo vha ndi tshi ṱwa thembeleni ndi tshi funza vhathu; no kundwa ngani u mpfara? ₅₆Hone izwi zwoṱhe zwo itea uri hu khunyelele Maṅwalo a vhaporofita.”

Zwi tshi ralo vhafunziwa vhawe vhoṱhe vha mu ṱutshela vha shavha.

₅₇Vhe vha vha vho fara Yesu vha mbo ṱuwa nae vha mu isa ha Khayafasi tshifhe muhulu. Henefho ho vha ho no kuvhangana vhaḓivhi vha Mulayo na vhahulwane vha lushaka. ₅₈Pitrosi a tevhela Yesu nga kule vha vhuya vha swika khoroni ya tshifhe muhulu, a dzhena-vho, a dzula fhasi na vhalindi uri a vhone uri zwi ḓo gumafhi.

₅₉Vhotshifhe vhahulwane na vhanna vha khoro vha ṱoḓa vhuṱanzi ha u zwifha ha u hwesa Yesu mulandu uri a vhulawe, ₆₀hone ha si wanale, naho ho ḓa ṱhanzi nnzhi dza u zwifha. Ha vhuya ha ḓa ṱhanzi mbili ₆₁dza ṱanzilela dza ri, “Hoyu muthu o amba a ri u ḓo thutha nnḓu ya Mudzimu a dovha a i fhaṱa ya fhela nga maḓuvha mararu.”

₆₂Ha vhuya ha takuwa tshifhe muhulu a vhudzisa Yesu a ri, “Nṋa a hu na ḽine na ḓifhindulela-vho? A ni khou pfa zwine havha vha khou ni hwelela ngazwo?” ₆₃Yesu a si fhindule tshithu.

Ndi hone tshifhe muhulu a tshi mu anisa a ri, “Ndi ni anisa nga Mudzimu a tshilaho ndi ri ni ri vhudze arali e inwi Mesia, Murwa wa Mudzimu.” ₆₄Yesu a mu fhindula a ri, “Ndi zwenezwo. Nazwino ndi ni vhudza ndi ri: Noṱhe ni ḓo vhona ‘Mubebwa-nga-muthu a tshi ḓa e kha gole o dzula thungo ya tshauḽa tsha Ramaanḓaoṱhe vha tshi vhusa vhoṱhe.’ ”

₆₅Tshifhe muhulu a mbo kherukanya zwiambaro zwawe a ri, “Asuyu u khou tamba nga Mudzimu! Ri kha ḓi ṱoḓa dziṅwe ṱhanzi dza mini? Hufha no tou mu pfa nga nḓevhe dzaṋu a tshi khou tamba nga Mudzimu! ₆₆Vha hashu, ni ri mini?” Vha fhindula vha ri, “U na mulandu, nga a vhulawe!” ₆₇Ndi hone vha tshi mu pfela mare khofheni vha mu sinḓa nga mavili ₆₈vha ri, “Hee Mesia, ri porofitele uri ndi nnyi o u rwaho!”

₆₉Zwino Pitrosi o vha a tshee o dzula ngei nnḓa khoroni. Muṅwe mushumi wa musidzana a ḓa khae a ri, “Na vhone vho vha vhe na hoyu Yesu wa Galelia.” ₇₀Pitrosi a hanedza vhoṱhe vha tshi khou mu pfa a ri, “Ayo thi a ḓivhi!” ₇₁Pitrosi a takuwa o livha getheni, a dovha a vhonwa nga muṅwe musidzana, uyo a vhudza vho imaho henefho a ri, “Na onoyu munna o vha e na Yesu wa Nazaretha.” ₇₂Pitrosi a dovha a hanedza a tou ana a ri, “Uyo munna thi mu ḓivhi!” ₇₃Hu si kale vha ḓa vha vhudza Pitrosi vha ri, “Ni songo hanedza uri ni muṅwe ngavho, hufha na kuambele kwaṋu ku tshi ni dzumbulula.” ₇₄Pitrosi a vhuya a tou ana a ri, “Arali ndi tshi khou zwifha Mudzimu kha a nthwe. Hoyu munna ndi ri a thi mu ḓivhi!” A tshi tou ralo mukukulume wa vha u a lila. ₇₅Pitrosi a mbo elelwa zwiḽa zwe Yesu a amba a tshi ri, “Hu ḓo ri mukukulume u sa athu lila na vha no no nndandula kararu.” A mbo ḓi bva, a thoma u lila lu ṱungufhadzaho.