MARKOSI 15

₁Nga matshelonitsheloni vhotshifhe vhahulwane na vhahulwane vha lushaka na vhaḓivhi vha Mulayo na khoro yoṱhe vha mbo ḓi kuvhangana vha langana, vha vhofha Yesu nga dzigeḓane vha mu isa ha Pilato. ₂Pilato a mu vhudzisa a ri, “Nṋa inwi ni khosi ya Majuda?” Yesu a mu fhindula a ri, “Vha amba zwone.” ₃Vhotshifhe vhahulwane vha pomoka Yesu zwithu zwinzhi, ₄lwe Pilato a vhuya a tou dovha a mu vhudzisa a ri, “Nṋa a ni fhinduli ni tshi khou pfa vha tshi khou ni hwelela nga mafhungo mangafhangafha?” ₅Yesu a si tsha fhindula na ipfi na ḽithihi; Pilato a wana zwi tshi mu kanukisa.

₆Nga vhuṱambo vhuṅwe na vhuṅwe ha Paseka, Pilato o vha a tshi ḓi vhofholola muṅwe wa zwivhotshwa we a humbelwa nga vhathu. ₇Zwino ho vha hu na vhaṅwe vhanna vhe vha vha vho fariwa nge vha vutshela muvhuso vha ita na u vhulaha vhathu. Kha vhenevho ho vha hu na muṅwe we a vha a tshi pfi Barabasi. ₈Musi vhathu vho sendela uri Pilato a vha itele zwine a ḓi vha itela, ₉ene a vha vhudzisa a ri, “Nṋa ni funa ndi tshi ni vhofhololela khosi ya Majuda naa?” ₁₀Pilato a tshi ralo ndi uri o vha a tshi zwi ḓivha uri vhotshifhe vhahulwane vha tshi mu kumedza Yesu vho vha vha tshi itwa nga vivho. ₁₁Hone vhotshifhe vhahulwane vha ṱuṱuwedza vhathu uri Pilato a vha vhofhololele Barabasi zwawe hu si Yesu. ₁₂Pilato a dovha a amba na vhathu a ri, “Zwino ni khou ri uyu ane na ri ndi khosi ya Majuda ndi iteni ngae?” ₁₃Vhone vha zhamba vha ri, “Kha a vhambiwe kha tshifhambano!” ₁₄Pilato a vha vhudzisa a ri, “Nṋa o tshinyani?” A tshi ralo vhone vha tou ṋaṋa u zhamba vha ri, “Kha a vhambiwe kha tshifhambano!” ₁₅Pilato a tshi ṱoḓa u vha takadza a mbo vha vhofhololela Barabasi. O no ralo a ri Yesu a rwiwe nga mboma, a konou mu kumedza maswole uri a vhambiwe kha tshifhambano.

₁₆Maswole vha dzhia Yesu vha dzhena nae nḓuni ya khaṱhulo, a tou tangwa nga gomane yoṱhe. ₁₇Vha mu ambadza phuraphura ya muvhala mutswuku, vha ita na khare ya mipfa vha mu ambadza kha ṱhoho ₁₈vha mu kumela vha ri, “Khosi ya Majuda nga i lalame!” ₁₉Vha tshi ralo vha mu rwa kha ṱhoho nga luṱanga, vha mu pfela mare vha ita na u mu gwadamela vha mu luvha nga u hoya. ₂₀Musi vho no fhedza u mu kolela vha mu bvula iḽa nguvho tswuku vha dovha vha mu ambadza nguvho dzawe vha konou bva nae vha yo mu vhamba kha tshifhambano.

₂₁Vhe nḓilani vha ṱangana na muṅwe munna a tshi khou ḓa muḓini, vha mu kombetshedza u hwala tshifhambano tsha Yesu. (Uyo munna o vha e Simoni wa Kirene, khotsi a Alekzannda na Rufasi).

₂₂Vha isa Yesu fhethu hu no pfi Golgotha, ndi u ri, “Fhethu hu no nga dethele ḽa muthu”. ₂₃Henefho vha edzisa u mu nwisa waini yo ṱanganaho na mishonga i vhavhaho, hone Yesu a hana. ₂₄Ndi hone vha tshi mu vhamba kha tshifhambano, vha konou kovhekana nguvho dzawe nga u tou ita mamvaṱe. ₂₅Vha tshi mu vhamba tsho vha tshi tshikhathi tsha 9 nga matsheloni. ₂₆Henefho kha tshifhambano ho vha hu na luṅwalo lwa u ḓivhisa mulandu wawe lu tshi ri, “Khosi ya Majuda”. ₂₇Vha mu vhamba na mavemu mavhili, ḽiṅwe thungo ya tshauḽa ḽiṅwe ya tshamonde. [ ₂₈Zwi tshi ralo ho ḓo khunyelela aḽa a uri, “O baḓekanywa na vhatshinyi.”]

₂₉Vhafhiri vha gondo vha tshi zwi vhona vha dzungudza ṱhoho vha mu holedza vha ri, “Koṱo! Ndi iwe we wa ri u nga thutha nnḓu ya Mudzimu wa dovha wa i fhaṱa nga maḓuvha mararu! ₃₀Idzou tsa-ha afho kha tshifhambano u ḓitshidze!” ₃₁Na vhotshifhe vhahulwane na vhaḓivhi vha Mulayo vha amba nga tshavho vha tshi mu kolela vha ri, “O vha a tshi konela u tshidza vhaṅwe, zwino u ḓitshidza zwi vho mu kunda! ₃₂Kha ri mu vhone-ha Mesia wa hone Khosi ya Vhaisraele a tshi tsa kha tshifhambano zwino, ndi hone ri tshi ḓo mu tenda.” Vhaḽa vhe vha vha vho vhambwa nae na vhone vha ḓi mu sema-vho.

₃₃Masiari tshivhangalala nga awara ya 12 shango ḽoṱhe ḽa tibwa nga swiswi, ya vhuya ya rwa tsha vhuraru zwo ḓi ralo. ₃₄Nga tshifhinga tsha vhuraru Yesu a ṱavha mukosi a ri, “Eloi, Eloi, lama sabaxthani?” Ndi uri, “Mudzimu wanga, Mudzimu wanga, wo nndaṱelani?” ₃₅Vhaṅwe vhe vha vha vhe henefho vha tshi pfa a tshi ralo vha ri, “Ipfani u vho vhidza Elia!” ₃₆Muṅwe wavho a mbo ḓi gidima a ḓa o fara tshiponnzhi, a tshi mbwandamedza kha waini i vhavhaho a tshi ṱoma kha luṱanga a konou tshi isa mulomoni wa Yesu uri a swiswine, a ri, “Imani ri vhone arali Elia a tshi ḓo ḓa a mu tsisa kha tshifhambano!”

₃₇Yesu a ṱavha mukosi ha mbo ḓi vha u welela. ₃₈Lupila lwa Hukhethwakhethwa lwa mbo ḓi kheruwa nga vhukati u bva nṱha u swika fhasi. ₃₉Mulangagomane we a vha o ima henefho phanḓa ha Yesu a tshi vhona kufele kwawe a amba a ri, “Nangoho hoyu muthu ndi Murwa wa Mudzimu.” ₄₀Henefho ho vha hu na vhaṅwe vhasadzi vho ima fhaḽa kulenyana vho lavhelesa. Vhaṅwe vhavho ndi Maria Magadalina na Salume, na Maria mme a Jakopo muṱuku na Josiasi. ₄₁Vhenevho ndi vhe vha vha vha tshi khou ḓi mu tevhela zwiḽa a tshee Galelia vha tshi enda vha tshi mu shumela. Na vhaṅwe vhasadzi vhanzhi vhe vha bva nae Jerusalema vho vha vhe henefho.

₄₂Musi ḽi tshi vho kovhela nga ḓuvha ḽa u ḓilugisa, hu tshi tou pfi Sabatha ndi ya matshelo, ₄₃Josefa wa Arimathia a luma mbilu a ya ha Pilato u humbela tshitumbu tsha Yesu. Uyo Josefa o vha e muraḓo wa khoro a huliswaho nga vhathu, we na ene a vha o dzula o lindela u ḓa ha muvhuso wa Mudzimu. ₄₄Pilato zwa mu kanukisa a tshi pfa uri Yesu o no fa. Ndi hone a tshi vhidza mulangagomane a mu vhudzisa uri Yesu hu nga vha hu kale o fa naa. ₄₅Musi o no pfa vhuṱanzi ha mulangagomane a konou vhudza Josefa uri tshitumbu a nga ḓi tshi dzhia zwawe. ₄₆Josefa a renga sila ḽitshena, a tsisa tshitumbu tsha Yesu a tshi putela ngaḽo a konou mu swiṱa tshaloni tshe tsha vha tsho korwa kha tombo. O no ralo a dzhia tombo a ḽi kungulusela mulomoni wa tshalo. ₄₇Maria Magadalina na Maria mme a Josiasi vho vha vho lavhelesa, vha zwi vhona uri Yesu o swiṱwa ngafhi.