MARKOSI 16

₁Sabatha yó no fhira, Maria Magadalina na Salume na Maria mme a Jakopo vha renga mishonga ya u ḓodza tshitumbu tsha Yesu. ₂Nga Swondaha nga matshelonitsheloni, ḓuvha ḽi tshi kha ḓi tou bva u bvisa mulomo, vha ya tshaloni. ₃Vhe nḓilani vha amba nga tshavho vha ri, “Nṋa ane a nga ri kungulusela tombo ḽa bva mulomoni wa tshalo ndi nnyi?” ₄Ndi uri ḽo vha ḽi tombo ḽihulwane nga maanḓa. Musi vha tshi sedza vha vhona tombo ḽo no ḓi kunguluswa. ₅Vha tshi dzhena ngomu tshaloni vha vhona muṱhannga o dzula thungo ya tshauḽa tshavho o ambara phuraphura tshena; vha akhamala. ₆Uyo muṱhannga a ri, “Ni songo akhamala. A thi ri ni khou ṱoḓa Yesu wa Nazaretha we a vhambiwa tshifhambanoni? Ha tsheeho fhano; o vuwa. A ni vhoni na afho he a vha o ladzwa hone? ₇Iyani ni yo ḓivhadza vhafunziwa haya mafhungo, na ene Pitrosi, ni vha vhudze ni ri, ‘Yesu o ni ranga phanḓa, o ya Galelia, ni ḓo ṱangana nae henengei unga o ni vhudza!’ ” ₈U pfa zwenezwo ha mbo ḓi vha u bva tshaloni nga u gidima vha tshi tou tetemela nga nyofho. Aya mafhungo vha si ende vha tshi a vhudza muthu, ngauri vho vha vha tshi kha ḓi ofha.

[Ṱhanzi nnzhi-nnzhi dza kale-kale dzi ri Bugu ya Markosi i guma henefha, hone hu kha ḓi vha na dziṅwe ṱhanzi dzi re na tshipiḓa hetshi tshi tevhelaho.]

[ ₉Musi Yesu o no vuwa vhafuni nga Swondaha, hu tshee nga matshelonitsheloni, a thoma u ḓisumbedza Maria Magadalina, uḽa we a vhuya a pandela thuṅwa dza 7 dza Saṱhane khae. ₁₀U bva henefho Maria a yo vhudza vhaḽa vhe vha vha vha tshi tshimbila na Yesu, a wana vho ṱungufhala vha tshi khou lila. ₁₁Vha tshi pfa a tshi ri Yesu u a tshila na uri Maria o mu vhona, vha si vhuye vha tenda.

₁₂Zwo no ralo Yesu a ḓisumbedza vhaṅwe vhafunziwa vhavhili tshivhumbeo tshawe tshó shanduka. Vhone vho vha vhe nḓilani vha tshi khou bva Jerusalema. ₁₃Ndi hone vhafunziwa avho vha tshi huma vha yo vhudza vhaṅwe, hone vhone vha si tende.

₁₄Lwa u fhedzisela Yesu a dovha a ḓisumbedza vhafunziwa vha 11 vha tshi khou ḽa. A vha kaidza u sa tenda havho na u omisa havho dziṱhoho lwe vha vhuya vha hanedza na vhe vha tou mu vhona uri o vuwa vhafuni. ₁₅A amba navho a ri, “Iyani mashangoni oṱhe ni yo ḓivhadza mafhungo maḓifha kha zwivhumbwa zwoṱhe. ₁₆Ane a a tenda a lovhedzwa u ḓo tshidzwa. Ane a si a tende u ḓo laṱwa. ₁₇Vhane vha mpfulufhela vha ḓo vha na maḓembe haya: Vha ḓo pandela thuṅwa dza Saṱhane nga dzina ḽanga; vha ḓo amba nga nyambo dzisili; ₁₈naho vha doba maṋowa kana vha ḽa tshiganame a vha nga fi; na vhalwadze vha ḓo fhola musi vha tshi vha vhea zwanḓa.”

₁₉Musi Yesu Muṋe washu o no fhedza u amba navho, a takulelwa ṱaḓulu a ya a dzula thungo ya tshanḓa tshauḽa tsha Mudzimu vha vhusa vhoṱhe. ₂₀Vhafunziwa vhawe vha ya u anḓadza ipfi ḽawe thungo dzoṱhe, Muṋe washu a vha navho hoṱhe he vha ya a tshi vha ṋea maanḓa a u ita maḓembe a u khwaṱhisa ipfi ḽawe.]