MARKOSI 7

₁Vhaṅwe vhaḓivhi vha Mulayo vha bvaho Jerusalema, na Vhafarisei, vha kuvhanganela Yesu; ₂vha vhona vhafunziwa vhawe vha tshi khou ḽa zwiḽiwa vha songo ṱamba zwanḓa – ndi uri vho vha vha songo ṱamba nga maitele a vhomakhulukuku.

₃Ndi uri Majuda vhoṱhe, zwihulu vhone Vhafarisei, vho vha vha tshi tevhedza zwidayo zwa vhomakhulukuku wavho; a vha koni u ḽa arali vha songo ṱamba zwanḓa nga nḓila yazwo, ₄nahone a vha ḽi tshiḽiwa tshi bvaho makete arali tshi songo ranga u ṱanzwiwa. Hu tshee na zwiṅwe zwidayo zwinzhi zwa vhomakhulukuku wavho zwine vha zwi tevhedza, sa kuṱanzwele kwa zwinwelo na kwa dzikhali na kwa dzigeḓela na kwa mimbete.

₅Ndi hone Vhafarisei na vhaḓivhi vha Mulayo vha tshi vhudzisa Yesu vha ri, “Ndi mini vhafunziwa vhavho vha sa tevhedzi ndayo dza vhomakhulukuku washu, vha tshi ḽa vha songo ṱamba?” ₆Yesu a vha fhindula a ri, “Ṋowa dzenedzi! Yesaya ha ni zwifheleli a tshi ni porofita unga ho ṅwalwa ha pfi,

₈“Na inwi ni ralo: ni litsha Mulayo wa Mudzimu, na fara zwidayo zwa vhathu.”

₉A tshi isa phanḓa a ri, “A ni koni zwone u laṱa Mulayo wa Mudzimu uri ni kone u nambatela zwidayo zwaṋu! ₁₀Hufha Mushe o laya a ri, ‘Hulisa khotsi au na mme au,’ a dovha a ri, ‘Ane a sema khotsi kana mme tshawe ndi u vhulawa.’ ₁₁Hone inwi ni tshi funza ni ri arali muthu e na tshithu tshine a nga kona u vhavhalela khotsi awe kana mme awe ngatsho, hone a ri, ‘Hei ndi korobani,’ (ndi uri: Ndi nduvho ya Mudzimu), ₁₂onoyo muthu a ni tsha mu tendela u vhavhalela khotsi awe kana mme awe. ₁₃Ndi hone u laṱa ipfi ḽa Mudzimu, ni tshi laya vhathu uri vha tevhedze zwidayo zwa vhomakhulukuku waṋu. Hu tshee na zwiṅwe zwidayo zwinzhi zwi no nga zwenezwo.”

₁₄Yesu a dovha a vhidza vhathu a ri, “Noṱhe thetshelesani zwine nda amba uri ni kone u ṱalukanya! ₁₅A hu na na tshithu tshine muthu a ri o tshi ḽa tsha mu kumadza. Tshine tsha mu kumadza ndi tshine tsha bva khae. [ ₁₆A na nḓevhe kha a pfe!]”

₁₇A sia vhathu nnḓa a dzhena nḓuni; vhafunziwa vhawe vha tevhela vha mu vhudzisa nga tshiḽa tshifanyiso. ₁₈Yesu a ri, “Matsina na inwi a ni koni u ṱalukanya? A ni zwi ṱalukanyi naa uri tshine tsha dzhena nga mulomo a tshi koni u kumadza muthu, ₁₉hufha tshi sa yi mbiluni, tshi tshi ya thumbuni, tsha dovha tsha bva nga nḓila yatsho.” (A tshi ralo o vha a tshi amba uri zwiḽiwa zwoṱhe zwi nga ḓi ḽiwa.)

₂₀A tshi isa phanḓa a ri, “Zwi bvaho kha muthu ndi zwone zwine zwa kumadza muthu, ₂₁ngauri mbiluni ya muthu ndi hone hune ha bva mihumbulo mivhi ine ya ḓisa vhufevhi, na vhufobvu, na vhupondi, ₂₂na vhupombwe ha tshakha-tshakha, na nyemulo, na vhuvhi hoṱhe, na vhufhura, na vhuvhuḓu, na vivho, na u nyefula vhaṅwe, na u ḓihudza, na hone vhutsilu. ₂₃Hezwi zwithu zwivhi zwoṱhe zwi bvaho mbiluni ndi zwone zwi kumadzaho.”

₂₄Ndi hone Yesu a tshi takuwa a livha thungo dza Tiro, a dzhena nḓuni uri hu si vhe na ane a ḓivha uri u henefho, hone vhathu vha ḓi fhedza vho zwi ḓivha. ₂₅Muṅwe musadzi we a vha e na ṅwanyana o dzhenwaho nga thuṅwa ya Saṱhane a tshi pfa hu tshi pfi Yesu u henefho, a mbo ḓi ḓa a gwadama phanḓa hawe. ₂₆Uyo musadzi o vha e si Mujuda, o vha e Mufinikia wa Siria. A humbela Yesu uri a pandele thuṅwa kha ṅwana wawe. ₂₇Yesu a tshi fhindula a ri, “A zwo ngo fanela ri tshi dzhia zwiḽiwa zwa vhana ra ṋea zwibwanana vhana vha sa athu fura.” ₂₈Uyo musadzi a fhindula a ri, “Muṋe wanga, hufha na zwibwanana zwi re fhasi ha ṱafula zwi tshi ḓi ḽa-vho matshakatshaka o wiswaho nga vhana.” ₂₉Yesu a ri, “Ni amba zwone. Iyani zwaṋu hayani, thuṅwa yo bva kha ṅwana waṋu.” ₃₀Ene a tshi swika hayani a wana ṅwana wawe o eḓela mmbeteni, nangoho thuṅwa yo bva.

₃₁Yesu a mbo ṱuwa shangoni ḽa Tiro, a buḓekanya ḽa Sidoni o livha Dzivhani ḽa Galelia, a fhira nga shangoni ḽa Miḓi-ya-fumi. ₃₂Vhaṅwe vhathu vha mu ḓisela dzinganḓevhe ḽa mbevhevhe vha humbela uri Yesu a mu vhee zwanḓa. ₃₃Yesu a mbo mu vhidzela thungo, a dzhenisa minwe yawe nḓevheni dza uyo munna, a pfela mare kha munwe a ṋanga lulimi lwawe ngawo. ₃₄A lilala, a fhihamelwa a ri, “Efata,” zwine zwa amba uri, “Nḓevhe dzaṋu kha dzi vulee!”

₃₅Nḓevhe dza uyo munna dza mbo ḓi thoma u pfa, na lulimi lwawe lwa vhofholowa, a thoma u amba zwavhuḓi. ₃₆Yesu a vha laya vhoṱhe uri vha si zwi vhudze muthu, u ralo ha tou vha u vha vhudza uri vha zwi anḓadze hoṱhe-hoṱhe. ₃₇Vhoṱhe vhe vha zwi pfa vha akhamala zwihulu vha ri, “Vhonani, zwoṱhe zwine a ita zwi a naka. Madzinganḓevhe u ita uri a pfe; mbevhevhe u ita uri dzi ambe.”