MIRERO 19

₁Ndi khwiṋe u mushai, nḓila dzau dzi sa solisei,

u fhira u vha mudzia-u-zwifha wa dovha wa vha tsilu.

₂U ḓifunga u si na nḓivho a si zwavhuḓi;

ṱhavhanyedza i a khakhisa.

₃Muthu u xedzwa nga vhutsilu hawe ene muṋe,

a vho sinyutshela Muṋe washu.

₄Lupfumo lu kunga ṱhama nnzhi;

mushai u laṱwa na nga khonani yawe.

₅Ṱhanzi ya mazwifhi a i nga tinyi ṱhamu;

mudzia-u-zwifha ha nga ponyoki.

₆Muhulwane ha shayi vhahoi;

mapakulile ha shayi khonani.

₇Mushai u nyalwa na nga vhana vha mme awe;

khonani dzawe dzi nga kundwa ngani u mu laṱa?

Nangwe a tshi vha luvhelela a vha tsha vhonala.

₈Ane a wana vhuṱali u a ḓitonda;

a no takalela ṱhalukanyo zwi ḓo mu nakela.

₉Ṱhanzi ya mazwifhi a i nga tinyi ṱhamu;

mudzia-u-zwifha u ḓo lovha.

₁₀A zwo ngo tea tsilu ḽi tshi tshila nga u ḓiphiṋa;

zwi ḓi nga phuli i tshi vhusa vhahulwane.

₁₁Vhuṱali vhu kata muthu a si sokou fhela mbilu;

vhugala hawe ndi u kanda mupfa a tshi u vhona.

₁₂Khosi yo sinyuwa i nga ndau i tshi vhomba;

a tshi u takalela zwi nga ṅwando wo wela hatsini.

₁₃Muṱhanngana wa tsilu u hoṱefhadza khotsi awe;

musadzi wa luambo u nga maḓi a tshi bvuḓa a sa gumi.

₁₄Ifa ḽa nnḓu na lupfumo muthu u sielwa nga vhabebi;

musadzi wa ṱhalukanyo ndi tshifhiwa tsha Muṋe washu.

₁₅Vhubva vhu vhidza khofhe, muthu a lala e mbwandaa;

wa sa shuma u ḓo fa nga nḓala.

₁₆U tevhela ndaela ndi u ḓilondola;

ane a si londe u ḓo lovha.

₁₇A no khathutshela mushai o fhahea kha Muṋe washu;

u ḓo pfufhelwa zwe a ita.

₁₈Laṱisa ṅwana wau a tshi kha ḓi vha nga hawe,

hone u songo mu rwa wa tou vhulaha.

₁₉Muthu wa mbilwana tshawe ndi u lifha;

wa mu lamukisa u ḓo ḓi dovha.

₂₀Thetshelesa nyeletshedzo u tende u laiwa,

ndi hone u tshi ḓo fhedza nga u ṱalifha.

₂₁Mihumbulo ya muthu a i fheli,

fhedzi hu ḓo pfumba zwe zwa dzudzanywa nga Muṋe washu.

₂₂Muthu u huliselwa u fulufhedzea;

ndi khwiṋe u shaya

u fhira u zwi wana nga vhufhura.

₂₃U ofha Muṋe washu zwi tshidza muthu,

u lala e mbwandaa,

a si welwe nga khombo.

₂₄Mubva a longa tshanḓa tshidongoni,

u bvafha u tshi humisela mulomoni.

₂₅Irwa munyefuli

uri a no shaya nzhele a vhe na maano;

kaidza a re na vhusedzi, ndi hone a tshi ḓo vha na nḓivho.

₂₆Ane a tswela khotsi awe, a thatha mme awe,

u ita zwi shonisaho, zwi nyadzisaho.

₂₇Ṅwananga,

konyolela zwau matanda nḓevheni u tshi laiwa,

ndi hone wo xedza maipfi a nḓivho.

₂₈Ṱhanzi i sa ḓivhalei i nyefula khaṱhulo mbuya;

muvhi u pfa vhuvhi vhu tshi ḓifha.

₂₉Vhanyefuli vho dzula vho vhetshelwa ṱhamu;

miṱana ya matsilu yo lindela u rwiwa.