MIRERO 3

₁Ṅwananga,

u songo hangwa pfunzo yanga,

mbilu yau nga i vhulunge ndayo dzanga;

₂zwi ḓo engedza vhutshilo hau

wa tshila miṅwaha minzhi,

wa ḓi vha na mashudu.

₃Dzula u tshi funa vhathu u tshi fulufhedzea;

hezwo itou zwi kungela mukuloni wau;

zwi ṅwale mbiluni yau,

₄ndi hone u tshi ḓo vha na phungo mbuya,

wa takalelwa nga Mudzimu na vhathu.

₅Fulufhela Mudzimu nga mbilu yoṱhe,

u songo ḓitika nga nḓivho yau.

₆U tshi ita tshithu, ranga u humbula Ene;

u ḓo u onyolosela dzinḓila.

₇U songo vhona unga wo ṱalifha;

ofha Muṋe washu u ile vhuvhi,

₈ndi hone muvhili wau u tshi ḓo takala,

wa pfa u na nungo.

₉Hulisa Muṋe washu nga lupfumo lwau,

na nga zwiranzhe zwa khaṋo yau,

₁₀ndi hone zwiṱaṱari zwau zwi tshi ḓo ḓala

zwa tou wa muwa,

nkho dzau dza tou balea nga waini.

₁₁Ṅwananga, u songo nyadza ndayo dza Muṋe washu,

a tshi u kaidza u songo zwi sanda;

₁₂Muṋe washu u kaidza vhane a vha funa,

unga khotsi a tshi kaidza vhana vhane a vha takalela.

₁₃U na mashudu munna ane a wana vhuṱali,

ane a kona u ṱalukanya;

₁₄o pfuma u fhira a re na siliva,

u bindula u fhira a re na musuku.

₁₅Vhuṱali vhu fhira nungu dza mutengo muhulu;

zwine muthu a zwi tama,

na tshithihi a tshiho tshi no vhambedzwa naho.

₁₆Ho puta ndalamo kha tshauḽa,

kha tshamonde ho puta lupfumo na khuliso.

₁₇Vhu u ṋea vhutshilo vhu takadzaho,

wa ḓi dzula u na mulalo;

₁₈vhane vha vhu kuvhatedza vha vhona vhu muri u ṋeaho vhutshilo;

vha na mashudu vhane vha vhu nambatela.

₁₉Vhuṱali ndi he Muṋe washu a sika ḽifhasi ngaho,

ḽiṱaḓulu a ḽi adza nga ṱhalukanyo,

₂₀a fhandekanya mativha nga nḓivho yawe,

makole a rothisa ṅwando.

₂₁Ṅwananga, dzula wo dzivhuluwa,

u vhe na vhuronwane;

zwenezwo zwi songo u ponyoka,

₂₂zwi ḓo u ṋea vhutshilo,

zwa nakisa mukulo wau,

₂₃wa tshimbila u sa ofhi tshithu,

mulenzhe wau wa si khukhulwe.

₂₄Wó lala a u nga ofhi tshithu,

wó eḓela u ḓo pfa u tshi ḓiphiṋa.

₂₅U songo ofha khombo dza tshihaḓu,

kana phanzi dzine dza wela vhavhi;

₂₆Muṋe washu u ḓo vha Ene fulufhelo ḽau,

u ḓo tsireledza mulenzhe wau u si fashwe.

₂₇U songo shaisa vhaṅwe zwivhuya zwo vha fanelaho arali zwi zwanḓani zwau.

₂₈U songo ri u na tshithu henefho,

wa vhudza muṅwe wa ri, “Tshimbila,

u vhuye matshelo, ndi ḓo u ṋea.”

₂₉U songo lukela muṅwe vhunwa,

ngeno a tshi u fulufhela.

₃₀U songo sokou pomoka muthu á songo u khakhela.

₃₁U songo tama vhutshilo ha ḽivemu,

u songo vhuya wa edzisa zwiito zwawe;

₃₂Muṋe washu u nyala phaṱhi;

vha si na vhufhura a somolana navho zwa haṋwani.

₃₃Muṋe washu u teketela nnḓu ya muvhi,

ya muvhuya a i shudufhadza.

₃₄U goḓa vhagoḓi;

vha ḓiṱukufhadzaho a vha itela vhuthu.

₃₅Pfufho ya vhaṱali ndi khuliso;

matsilu one a ḓo niwa nga ṱhoni.