MIRERO 4

₁Inwi vhana,

thetshelesani ndayo dza khotsi,

ni kolongonye nḓevhe uri ni wane ṱhalukanyo;

₂ndi ni ṋea ndayo dzavhuḓi,

ni songo furalela pfunzo yanga.

₃Zwiḽa ndi tshee mutukana

muṱani wa khotsi anga,

ndi tshi kha ḓi vha mutete,

ndi tshee ṅwana muthihi fhedzi wa mme anga,

₄khotsi anga vho mpfunza vha ri,

“Mbilu yau nga i nambatele maipfi anga,

vhulunga ndayo dzanga,

ndi hone u tshi ḓo tshila.

₅Wana vhuṱali, wana ṱhalukanyo;

u songo hangwa zwine nda amba,

u songo zwi nyadza.

₆U songo furalela vhuṱali,

vhu ḓo u tsireledza;

vhu fune, vhu ḓo u londola.

₇Tshi no fhira zwoṱhe ndi vhuṱali;

vhona uri u vhu wane,

renga ṱhalukanyo nga zwoṱhe zwine wa vha nazwo.

₈Vhu vhone vhu tshi lilelwa,

ndi hone vhu tshi ḓo u hulisa ha u gagamisa;

arali wa vhu kuvhatedza vhu ḓo u tonda;

₉vhu ḓo u ambadza tshiala ṱhohoni,

ha u ṋea khare ya vhugala.”

₁₀Ṅwananga, thetshelesa u ṱanganedze maipfi anga,

ndi hone u tshi ḓo lalama.

₁₁Ndi ḓo u funza nḓila ya vhuṱali,

nda u endedza kha nḓilatswititi.

₁₂U tshi tshimbila a u nga kundwi,

u tshi gidima a u nga khukhulwi.

₁₃Nambatela ndayo dzi si u ṱutshele,

dzi londole, dzi ḓo u ṋea vhutshilo.

₁₄U songo kanda nḓilani ya vhavhi,

kana wa fara ya vho furalelaho Mudzimu.

₁₅I tinye, u si tshimbile khayo,

pambuwa khayo u i fhire.

₁₆Vhone a vha lali vha songo tshinya,

a vha fari khofhe

vha sa athu bidigamisa muthu.

₁₇Vhuvhi ndi tshone tshiḽiwa tshavho,

vhupondi ndi yone waini yavho.

₁₈Nḓila ya vha no fulufhedzea yone

i nga tshedza tsha maḓautsha,

tshine tsha ḓi penya tshi tshi ya

u swika masiari tshivhangalala.

₁₉Hone nḓila ya vhavhi i nga swiswi ḽihulu,

a vha ḓivhi tshine tsha vha khukhula.

₂₀Ṅwananga, kolongonya nḓevhe u pfe maipfi anga,

u tshingamisele nḓevhe kha zwine nda amba.

₂₁Maipfi anga a songo u ponyoka, a vhulunge mbiluni yau;

₂₂ane a a wana, a mu ṋea vhutshilo,

na muvhili wawe wa takala woṱhe.

₂₃Tshihulwane tshi no fhira zwoṱhe,

linda mbilu yau,

ndi yone i no vhumba vhutshilo hau.

₂₄Nyambo dza vhumbulu

dzi songo pfala mulomoni wau,

zwiambo zwa vhufhura nga zwi vhe kule na iwe.

₂₅Maṱo au nga a sedze phanḓa,

u ṱalele zwi re phanḓa hau.

₂₆Dzula wo dzudzanya nga vhuronwane zwine wa ita,

ndi hone zwoṱhe zwi tshi ḓo u nakela.

₂₇U songo pambutshela kha tshauḽa kana tsha monde,

tinya vhuvhi hoṱhe.