Muano we Muṋe washu a anela Dafita
Luimbo lwa lwendoni ho livhiwa Jerusalema.
Muano we Dafita a anela Muṋe washu
1Muṋe washu, u songo hangwa Dafita,
na zwoṱhe zwe a konḓelela.
2U si hangwe zwe a u fulufhedzisa nga muano,
Iwe Ramaanḓa, Mudzimu wa Jakopo,
3a ri, “Ngoho thi nga dzheni thumbani yanga,
kana nda ya vhulaloni hanga;
4thi nga fari khofhe,
thi nga kumedzi
5ndi sa athu wanela Muṋe washu vhudzulo,
hune Ramaanḓa Mudzimu wa Jakopo a nga dzula.”
Muduba wo livhaho thembeleni ya Tsioni
6Ngezwo, ro zwi pfa ri Efratha,
ro zwi wana midavhini ya Jaara;
7nga ri ye nḓuni ya Muṋe washu,
ri gwadame ri vhukandoni ha milenzhe yawe.
8Muṋe washu,
vuwa u ye vhuaweloni hau
ú na mbulungelo i no sumbedza maanḓa au.
9Vhotshifhe vhau nga vha ḓiṱame nga u fulufhedzea,
vhalanda vhau vha fulufhedzeaho vha pembele.
10U songo laṱa khosi ye wa i ta,
i tonde u tshi itela Dafita mukoma wau.
Muano we Muṋe washu a anela Dafita
11Muṋe washu o anela Dafita muano wa ngoho,
ha nga vhuyi a shanduka na kathihi;
o ri, “Kha khuluṋoni yau ndi ḓo vhea muḓuhulu wau.
12Arali vhana vhau vha tshi tevhedza mulanga wanga
vha thetshelesa nyeletshedzo dzanga,
vhana vhavho na vhone vha ḓo dzula kha khuluṋoni yau lini na lini.”
Tsioni vhudzulo ha Muṋe washu
13Muṋe washu o nanga Tsioni,
o tama u dzula hone, a ri,
14“Hafha ndi ḓo awela tshoṱhe,
ndi ḓo dzula henefha, ndo hu tama.
15Tsioni ndi ḓo u shudufhadza,
wa ḽa wa fura,
vhashai vhawo ndi ḓo vha fusha,
vha ḽa vha laṱa.
16Vhotshifhe vhawo ndi ḓo vha ambadza maanḓa,
vha konou tshidza vhathu vhanga;
vhalanda vhanga vha fulufhedzeaho
vha ḓo fhululedza vha pembela.
17Henefho ndi ḓo vhumba
muḓuhulu wa Dafita vhuhosi,
a vha khosi khulu,
nda mu shululela Muya wanga nda mu londola,
a nga luvhone lu sa dzimi.
18Maswina awe ndi ḓo a ambadza ṱhoni,
nguwane yawe ya vhuhosi ya ḓi penya i tshi ya.”
