DZIPHISALEMA 82

₁Mudzimu u langa khoro ya makoleni;

u haṱula vhukati ha midzimu a ri,

₂“Ni ḓo piringanya khaṱhulo u swika lini?

Ni ḓo imelela vhavhi u swika lini?

₃Lamukisani vhaheḓana na tsiwana;

vho tambudzwaho na vhashai vha ṋeeni pfanelo dzavho.

₄Lamulelani vhaheḓana na vha lilaho;

vha vhofhololeni zwanḓani zwa vhavhi.

₅“Vhathu a vha ḓivhi tshithu,

a vha ṱalukanyi tshithu,

vha tshimbila swiswini;

miteo yoṱhe ya ḽifhasi i a dzinginyea.

₆Ndi zwone, ndo ri ni pfi midzimu,

noṱhe ni vhana vha Waṱaḓuluṱaḓulu.

₇Hone ni ḓo ḓi lovha unga vhathu vha ṋama,

ni ḓo ḓi wa unga vhavhusi vhoṱhe.”

₈Mudzimu, takuwa u haṱule ḽifhasi,

hufha u Muṋe wa tshakha dzoṱhe!