DZIPHISALEMA 91

₁Ane a khuda nga Waṱaḓuluṱaḓulu,

u ḓo lala murunzini wa Ramaanḓaoṱhe.

₂Ndi ḓo amba na Muṋe washu nda ri,

“Ndi Iwe vhushavhelo hanga,

u vhudzumbamo hanga,

Mudzimu wanga ane nda mu fulufhela.”

₃Ngoho u ḓo u ponyokisa tshikwekweni

tshe wa retshelwa,

hu tshi ḓa dwadze ḽi vhulahaho,

a u tshidza.

₄U ḓo u kuvhatedza nga mithenga yawe,

a u pilela nga phapha dzawe;

u fulufhedzea hawe ndi tshone tshiṱangu na philelo.

₅Na khombo dza vhusiku a u nga dzi ofhi,

naho u musevhe u poswaho masiari,

₆nangwe ḽi dwadze ḽi dodelaho swiswini,

naho ḽi bulayo ḽi fhedzaho vhathu masiari tshivhangalala.

₇Vha tshigidi vha tshi ḓi rambalala thungo ino yau,

vha fumi ḽa zwigidi vha tshi wa thungo ya tshauḽa tshau,

hone iwe a zwi nga u kwami;

₈u ḓo sokou sedza zwau,

wa vhona vhavhi vha tshi lifhedzwa.

₉Hufha Muṋe washu e vhushavhelo hau,

Waṱaḓuluṱaḓulu e vhudzumbamo hau,

₁₀a hu na khombo i no ḓo u wela,

a hu na phanzi i no ḓo sendela nnḓu yau.

₁₁U ḓo ruma vharuṅwa vhawe,

vha u londola nḓilani dzau dzoṱhe;

₁₂vha ḓo u takula nga zwanḓa zwavho,

u sa ḓo khukhulwa mulenzhe nga tombo.

₁₃U ḓo kanda ndau na ṋowa,

ndawana na mbeḓa wa zwi kandekanya.

₁₄Mudzimu u ri,

“Ú a mpfuna, ndi ḓo mu tshidza;

ndi ḓo mu tsireledza,

u ḓivha dzina ḽanga.

₁₅A tshi mmbidzelela ndi ḓo mu aravha;

e khomboni ndi ḓo ima nae;

ndi ḓo mu lamukisa nda mu hulisa;

₁₆ndi ḓo mu tonda a lalama,

a vhona uri muthu ndi mu tshidza hani.”