NZUMBULULO 9

₁Zwenezwo muruṅwa wa vhuṱanu a lidza phalaphala yawe. Nda vhona ṋaledzi yo wela fhasi; iyo ṋaledzi ya ṋewa khii ya u vula muṋango wa dindi. ₂Ya vula dindi ḽo itaho tshisiku, henefho ha mbo duba vhutsi vhu no nga vhu bvaho ṋanḓoni khulu, ḓuvha na lutombo zwa swifhala nga vhutsi vhu bvaho kha dindi iḽo. ₃Henefho vhutsini ha bva nzie dza kavha fhasi, dza ṋewa maanḓa a u luma sa phame. ₄Idzo nzie dza vhudzwa upfi dzi songo ḽa hatsi kana miri kana tshiṅwe tshimela-vho, dza pfi dzi lume vhenevho fhedzi vha si na luswayo lwa Mudzimu kha phanḓa dzavho; ₅dza pfi dzi songo vha vhulaha, dzi tou vha shengedza miṅwedzi miṱanu yoṱhe, u vhavha ha hone hu tshi nga ha musi muthu o luṅwa nga phame. ₆Misi yeneyo vhathu vha ḓo ri, “Ngavhe ri tshi fa!” hone vha si fe; vha tou tama lufu, lwone lwa vha shavha.

₇Tshivhumbeo tsha idzo nzie tsho vha tshi tshi nga tsha bere dzo lugiselwaho u bva pfumo, ṱhohoni dzo ambadzwa zwiṅwe zwithu zwi no nga khare dza musuku, khofheni hadzo hu tshi nga ha vhathu, ₈mavhudzi adzo a tshi nga a vhasadzi, maṋo adzo a tshi nga a ndau, ₉dzo ambadzwa zwipilakhana zwi no nga tsimbi, mibvumo ya phapha dzadzo i tshi nga ya bere nnzhi dzi tshi kokodza gariki dzi tshi ya nndwani. ₁₀Dzo vha dzi na mitshila ya mbolela dzi no nga dza phame. Dzo vha na maanḓa a u shengedza vhathu nga yeneo mitshila miṅwedzi miṱanu yoṱhe. ₁₁Dzi na khosi yadzo i dzi vhusaho. Onoyo ndi muruṅwa wa ḽiḽa dindi, ane nga Tshiheberu a pfi “Abadoni”, nga Tshigiriki a pfi “Apolioni”, ḽine ḽa amba uri “Mutshinyadzi”.

₁₂Khombo ya u thoma zwino yo fhira. Hu tshee ho sala khombo mbili.

₁₃Ndi hone muruṅwa wa 6 a tshi lidza phalaphala yawe. Nda pfa ipfi ḽi tshi bva vhukati ha ṋanga nṋa dza aḽiṱari ya musuku i re phanḓa ha Mudzimu, ₁₄ḽa amba na muruṅwa wa 6 o faraho phalaphala ḽa ri, “Vhofholola vhaḽa vharuṅwa vhaṋa vho vhoxwaho ngei mulamboni muhulu wa Yufuratha.” ₁₅Avho vharuṅwa vho vha vho telwa ṅwaha wonoyo, ṅwedzi wonoyo, ḓuvha ḽeneḽo, tshifhinga tshenetsho. Ndi hone vha tshi mbo ḓi vhofhololwa uri vha vhulahe tshipida tshithihi kha zwiraru tsha vhathu. ₁₆Nda vhudzwa upfi tshivhalo tsha maswole ayo o namelaho dzibere ndi maḓana a dzimilioni. ₁₇Kha bono ḽanga nda vhona dzibere na vhanameli vhadzo vho ambara zwipilakhana zwo tswukaho unga mulilo na zwa muvhala wa lutombo wo dziaho na zwa tshirulwane, ṱhoho dza idzo bere dzi tshi nga dza ndau, milomoni yadzo hu tshi bva mulilo na vhutsi na tsevhela. ₁₈Tshipiḓa tshithihi kha zwiraru tsha vhathu tsha vhulawa nga madambudzo eneo mararu: mulilo na vhutsi na tsevhela zwi bvaho milomoni ya idzo bere. ₁₉Maanḓa adzo o vha e milomoni yadzo na mitshilani, mitshila yadzo i tshi nga dziṋowa dzi re na dziṱhoho, dzi tshi huvhadza vhathu ngayo.

₂₀Vhathu vhe vha si vhulawe nga ayo madambudzo a vho ngo laṱa zwa u luvha midzimu ye vha tou ḓiitela nga zwanḓa zwavho, na madimoni na zwifanyiso zwa musuku na siliva na musina na matombo na dzithanda, zwi sa vhoni, zwi sa pfi, zwi sa tshimbili. ₂₁A vho ngo laṱa vhupondi na vhuloi na vhupombwe na vhufobvu.