ZAKARIA 7

₁Nga ṅwaha wa vhuṋa wa muvhuso wa khosi Dariosi, nga ḓuvha ḽa vhuṋa ḽa ṅwedzi wa vhuṱanu na vhuṋa, ṅwedzi wa Khisilevi, ipfi ḽa Muṋe washu ḽa amba na Zakaria. ₂Vhathu vha Bethele vho vha vho ruma Sharetsere na Regemu Melekhe khathihi na vhanna vhavho, u yo humbela Muṋe washu mashudu, ₃na u vhudzisa vhotshifhe vha thembele ya Muṋe washu Mulangazwoṱhe, na vhaporofita, vha ri, “Nṋa ndo fanela u ḓi lila nda ḓidzima nga ṅwedzi wa vhuṱanu, sa zwe nda vha ndi tshi ḓi ita miṅwaha minzhi yo fhelaho naa?”

₄Ipfi ḽa Muṋe washu Mulangazwoṱhe ḽa amba na nṋe ḽa ri, ₅“Vhudzisa vhathu vhoṱhe vha shango na vhotshifhe u ri, ‘Musi ni tshi ḓidzima ni tshi lila nga ṅwedzi wa vhuṱanu na wa vhuṱanu na vhuvhili miṅwaha ya 70 yo fhelaho, vhukuma no vha ni tshi itela u hulisa Nṋe naa? ₆Zwiḽa ni tshi khou ḽa dzinduvho ni tshi nwa, no vha ni sa khou ḓiḽela na ḓinwela inwi vhaṋe naa? ₇A thi ri aya ndi one maipfi e nda a ḓivhadza nga vhaporofita vha u ranga musi vhathu vha Jerusalema na miḓi yo u tangaho vhe na mulalo zwi tshi vha nakela, zwiḽa Negeve na midavhini ya vhukovhela hu tshee na vhathu naa?’ ”

₈Ipfi ḽa Muṋe washu ḽa dovha ḽa amba na Zakaria ḽa ri, ₉“Yahavee Mulangazwoṱhe u ri, ‘Ni vhone hu sa ḓo vha na tshiṱalula, ni itelane vhuthu ni pfelane vhuṱungu. ₁₀Ni songo kandeledza tshilikadzi na tsiwana na mutsinda na mushai. Mbiluni dzaṋu ni songo lukelana vhunwa.’

₁₁“Hone a vho ngo funa u zwi londa, vho zwi furalela vha konyolela matanda nḓevheni. ₁₂Vho omisa mbilu dzavho dza nga mbwane, vha si thetshelese ndayo kana maipfi e Yahavee Mulangazwoṱhe a a ḓisa nga Muya wawe, a swikiswa nga vhaporofita vha u ranga. Ndi zwe Yahavee Mulangazwoṱhe a sinyuwa zwihulu. ₁₃Yahavee Mulangazwoṱhe u ri, ‘Ndo ḓi vha vhidza vha si thetshelese, ndi zwe vhone vha tshi mmbidzelela Nṋe-vho nda si thetshelese. ₁₄Ndo vha balanganya na dzitshakha nga tshiḓumbumukwe, henefho vha vha vhatsinda, shango ḽavho ḽa sala ḽi si na muthu, hu si na a ḓaho na a ṱuwaho. Shango ḽi tamisaho ndi vhone vho ḽi phusukanyaho ḽa sala ḽi soga.’ ”