1 VHAKORINTA 13

₁Naho nda amba nyambo

dza vhathu na dza vharuṅwa,

lufuno ndi si na,

ndi nga tsimbi i ungaho,

ndi nga ngoma i lilaho.

₂Naho nda porofita,

nda ṱalukanya zwiphiri zwoṱhe,

nda vha na nḓivho yoṱhe;

nda vhuya nda vha na lutendo lwa u sudzulusa dzithavha,

lufuno ndi si na, a thi tshithu.

₃Naho nda kovhela vhaṅwe zwoṱhe zwine nda vha nazwo,

nda vhuya nda kumedza muvhili wanga uri u fhiswe,

lufuno ndi si na,

a zwi mpfarisi tshithu.

₄Lufuno a lu fheli mbilu.

Lu na vhuthu. A lu na vivho,

a lu ṱongi, a lu ḓihudzi.

₅Lufuno lwo vuḓa.

A lu na tseḓa, a lu na mbilwana,

a lu pakati vhukhakhi.

₆A lu takaleli tshivhi,

lu takalela zwi re zwone.

₇Lufuno lu na mbilu ndapfu:

Lu ḓi dzula lu tshi fulufhela,

a lu fulufhuwi, lu konḓelela zwoṱhe.

₈Lufuno a lu gumi.

Vhuporofita hone vhu ḓo kaṱudzwa;

ndimi dzone dzi ḓo fhumula;

nḓivho ya zwiphiri i ḓo fhela.

₉Zwino ri kha ḓi tou ḓivha kupiḓanyana,

na zwine ra porofita ndi kupiḓanyana,

₁₀hone hu tshi ḓa nḓivho yo khunyelelaho

zwi re tshiṱahe zwi ḓo fhela.

₁₁Zwiḽa ndi tshee ṅwana ndo vha ndi tshi amba sa ṅwana,

nda elekanya sa ṅwana,

mihumbulo i ya ṅwana;

zwino ndó no vha munna,

hana ho fhela.

₁₂Zwine ra vhona zwino a zwi vhonalesi;

zwi nga murunzi kha tshivhoni.

Ngavhuya ri ḓo vhona Mudzimu ro tou livhana zwifhaṱuwo.

Zwine nda ḓivha zwino ndi kupiḓanyana;

ngavhuya ndi ḓo zwi ḓivha tshoṱhe

sa zwine Mudzimu a nnḓivha tshoṱhe.

₁₃Zwino-ha zwi sa gumi ndi zwiraru:

Ndi lutendo, na u lavhelela zwi ḓaho, na lufuno;

hone-ha tshi fhiraho zwoṱhe ndi lufuno.