1 VHAMAKHABI 13

₁Musi Simoni a tshi pfa uri Thirifoni u khou kuvhanganya mmbi khulu uri a die shango ḽa Judia a ḽi phusukanye, ₂na u vhona uri vhathu vho farwa nga nyofho, vha khou tetemela, a gonya Jerusalema. Henefho a kuvhanganya vhathu, ₃a vha ṱuṱuwedza nga maipfi aya a ri, “Ni a ḓivha uri nṋe na mukomana na vharathu vhanga na nnḓu ya khotsi anga ro shumela mulayo na hukhethwa, ra ita na u fhira vhukati ha dzinndwa na dzikhombo. ₄Mukomana na vharathu vhanga vhoṱhe vho fela Israele vha tshi fela zwenezwo, ho sala nṋe ndi ndoṱhe. ₅Zwino thi zwi londi uri ndi ḓitshidze musi muvhi, hufha ndi sa fhiri mukomana na vharathu vhanga. ₆Tshithihi tshine nda tama ndi u lifhedzela lushaka lwa hashu na hukhethwa na vhafumakadzi na vhana, ngauri tshakha dzoṱhe dzi a ri vhenga, dzo kuvhanganela u ri lozwa.”

₇Zwino vhathu vha tshi pfa maipfi ayo, muya wavho wa dovha wa vuwa. ₈Vha fhindula nga u ṱavha mukosi vha ri, “Vhone vha murangaphanḓa washu vhudzuloni ha vharathu vhavho Judasi na Jonathani. ₉Vhone nga vha lwe nndwa dzashu, riṋe ri ḓo ita zwoṱhe zwine vha ri vhudza.” ₁₀Ndi hone Simoni a tshi kuvhanganya vhanna vhoṱhe vhane vha kona u lwa, a ṱavhanya a fhedzisa u fhaṱa mitsheṱo ya Jerusalema, a khwaṱhisa muḓi masia oṱhe. ₁₁Simoni a ruma Jonathani murwa wa Abisalomu, a ya Jopa na mmbi khulu; Jonathani a thatha vhathu vha dzulaho fhethu afho a dzula henefho.

₁₂Zwino Thirifoni a bva muḓini wa Tholemai e na mmbi khulu u yo dia shango ḽa Juda, a kone u vhuya na Jonathani e tshivhoxwa. ₁₃Hone Simoni a ṱoka mishasha yawe Adida, u lavhelesana na mudavhi. ₁₄Musi Thirifoni a tshi pfa uri Simoni o dzula vhudzuloni ha murathu wawe Jonathani, na uri u ṱoḓa u lwa nae, a ruma vhaḓinḓa khae vha swikisa mafhungo aya, a ri, ₁₅“Riṋe ro fara murathu wavho Jonathani nga mulandu wa mali ine a fanela u i lifha ya gwama ḽa khosi zwi tshi elana na mishumo ye a i shuma. ₁₆Zwenezwo, arali vha ri rumela thalennde dza ḓana dza siliva, na vharwa vhawe vhavhili vha vha vhahahedzwa u vha na ngoho ya uri musi a tshi vhofhololwa a nga si ri vutshele, ri ḓo mu vhofholola.”

₁₇Naho Simoni o zwi ḓivha uri vha khou mu fhura, a ḓi ri hu waniwe iyo mali na avho vhatukana, a tshi ofha uri vhathu vha nga ḓo mu vutshela ₁₈vha ri Jonathani o lovha nge Simoni a hana u rumela Thirifoni mali na vhatukana. ₁₉Ndi zwe a rumela vhatukana na thalennde dza ḓana. Hone Thirifoni a si tsha ita zwe a fulufhedzisa, a si tsha litsha Jonathani a ṱuwa.

₂₀Thirifoni a sala a tshi tshoṱhela shango a ḽi phusukanya. Vhahali vhawe vha mona nga gondo ḽo livhaho Adora, hone Simoni na mmbi yawe vha tshimbila u livhana nae hoṱhe he a ya. ₂₁Vhanna vhe vha vha vhe vhuimavhahali vha ruma vhaḓinḓa ha Thirifoni, vha tshi khou mu kulumedza uri a vha phalale a tshi ḓa nga nḓila ya phangani, na u vha rumela zwiḽiwa. ₂₂Thirifoni a dzudzanya vhanameli vhawe vha dzibere uri vha ṱuwe, hone vhusiku uho gabugu ya nesa, vha kundwa u ya. A ṱuwa a livha Giliadi. ₂₃Musi a tshi swika Basikama a ita uri Jonathani a vhulahwe a swiṱwe henefho. ₂₄Ndi hone Thirifoni a tshi humela shangoni ḽa hawe.

₂₅Simoni a ruma vhathu vha yo dzhia marambo a murathu wawe Jonathani, a mu swiṱa Modeini, muḓini wa vhokhotsi awe. ₂₆Vhaisraele vhoṱhe vha mu lila nga tshililo ho vuḓwa, vha mu lilela vha fhedza maḓuvha manzhi. ₂₇Zwino Simoni a fhaṱa tshihumbudzo tshaloni tsha khotsi awe na mukomana na vharathu vhawe, tsha penyiswa nga phanḓa na nga murahu tsha lapfela nṱha uri tshi vhonale nangwe muthu e kule. ₂₈A fhaṱa mirango miṱanu na mivhili yo lavhelesanaho, wa khotsi awe, wa mme awe, na miṋa ya mukomana na vharathu vhawe. ₂₉Mirango yeneyo a i fhaṱela maguvha mahulu, nṱha hao a kora tshifuko tsha u pilela nndwani uri tshi dzule tshi tshihumbudzo, tsini na tshipileli itsho a vhea zwikepe zwo korwaho, zwine zwa kona u vhonwa nga vhoṱhe vhane vha tala nga zwikepe lwanzheni. ₃₀Tshalo itsho tsho fhaṱwaho Modeini tshi tshee hone na ṋamusi.

₃₁Thirifoni a itela mutukana khosi Anthiokhosi tshimbevha. A mu vhulaha, ₃₂a ḓidzhiela vhuhosi, a ḓiambadza khare ya vhuhosi ha Asia. Ngauralo a andisa vhuvhi shangoni iḽo. ₃₃Simoni ene a fhaṱa madzhavhelo kha ḽa Juda, a khwaṱhisa mitsheṱo yao nga thawara ndapfu, na mitsheṱo midenya, na dzigethe dza matsimbi, a vhulunga zwiḽiwa madzhavheloni. ₃₄A ita na u ruma vhanna vho nangwaho vha ya ha khosi Dimitriosi a tshi khou humbela uri shango iḽo ḽi vhofhololwe kha mithelo, ngauri tshe Thirifoni a ita ho vha u ṱangula shango. ₃₅Khosi Dimitriosi a tshi fhindula o mu ṅwalela luṅwalo ulu a ri, ₃₆“Nṋe khosi Dimitriosi ndi resha Simoni, muphrista muhulwane, khonani ya mahosi, nda resha na Majuda. ₃₇Ro ṱanganedza khare ya vhuhosi ya musuku na davhi ḽa mutshevho ḽe vha ri rumela. Ri a zwi funa u tshila na inwi ḽó lala na u ṅwalela gota ḽashu u ni vhofholola kha mithelo. ₃₈Zwe ra ni tendela zwone zwi ḓo dzula zwo ralo zwi tshi shuma, na madzhavhelo e na fhaṱa a ḓo ḓi dzula e aṋu. ₃₉Ri ni hangwela vhukhakhi na milandu ye na i ovha u swika zwino, khathihi na muthelo wa khosi une wa vha mulandu waṋu wo thuthiwa. Muthelo ufhio na ufhio we vha Jerusalema vha vha vha tshi bvisiswa a vha tsha ḓo dovha vha bvisiswa. ₄₀Arali muṅwe waṋu o fanela u dzhena mushumoni washu, nga a dzhene.

“Nga hu dzule hu na mulalo kha riṋe na inwi.”

₄₁Nga ṅwaha wa ḓana na mahumi maṱanu na mavhili (170) Vhaisraele vho vha vho rulwa dzhogo ya vhannḓa, ₄₂vhathu vha thoma u ṅwala kha maṅwalo avho na ndangano dzavho hu tshi pfi, “Nga ṅwaha wa u thoma wa Simoni, muphrista muhulwane, muvhusi na murangaphanḓa wa Majuda.”

₄₃Misi yeneyo Simoni a govhela Gezere a u tanga nga vhahali. A ita mutshini wa u govhela, a u sukumedzela tsini ha muḓi, a tshoṱhela iṅwe ya dzithawara a i thuba. ₄₄Vhanna vhe vha vha vhe nṱha ha mutshini wa u govhela vha fhufhela fhasi vha dzhena muḓini, vha vusa vilinga ḽihulu henefho. ₄₅Vhanna vha afho muḓini na vhafumakadzi vhavho na vhana, vha gonya mutsheṱo zwiambaro zwavho zwo kherukana, vha ṱavha mukosi muhulu vha tshi khou luvhelela Simoni uri vha pfumedzane nae. ₄₆Vha ri, “Vha songo ri lifhedzela vhuvhi he ra ita, nga vha ri khathutshele.”

₄₇Simoni a tenda a vha litsha a si tsha lwa navho, a tou vha thatha muḓini a kumulula nnḓu dze dza vha dzi na midzimu ya zwitungulo. Zwo no ralo a dzhena muḓini hu tshi khou imbiwa nyimbo dza thendo. ₄₈A sudzulusa zwoṱhe zwo kumalaho afho muḓini, a vhea vhanna henefho vha tevhedzaho mulayo. A vusa mitsheṱo yawo, a ḓifhaṱela nnḓu.

₄₉Vhanna vho vhewaho vhuimavhahali ha Jerusalema vha dzivhiswa u bvela nnḓa shangoni na u vhuya vha tshi yo ita zwa vhushavhi; vha tambula zwihulu nga nḓala, vhanzhi vhavho vha fa nga nḓala. ₅₀Vha fhedza nga u ṱavhela Simoni mukosi uri ḽi lale, ene a tenda u pfumedzana navho. A vha shakulisa afho vhuimavhahali, a hu kumulula. ₅₁Nga ḓuvha ḽa mahumi mavhili na mararu (23) ḽa ṅwedzi wa vhuvhili, nga ṅwaha wa ḓana na mahumi maṱanu na mavhili na muthihi (171), Majuda vha dzhena vhuimavhahali vha tshi khou pembela, vho fara matavhi a mutshevho, hu tshi lidzwa haripa na tshele na thale hu tshi imbiwa na nyimbo dza zwirendo, ngauri swina ḽihulu ḽa Israele ḽo vha ḽo lozwiwa. ₅₂Simoni a ḓivhadza uri ḓuvha iḽo ḽi vhe ḽa vhuṱambo ṅwaha muṅwe na muṅwe hu pembelwe. A ita na u khwaṱhisa mitsheṱo ya tshivhanga tsha thembele u navha na vhuimavhahali, ene na khonani dzawe vha dzula henefho. ₅₃Simoni a vhona uri murwa wawe Johanisi o no aluwa, ndi munna, a mu ita mulangammbi wa vhahali vhawe vhoṱhe, a tshi dzula Gezere.