U farwa ha Dimitriosi
1Nga ṅwaha wa ḓana na mahumi maṱanu na mavhili na mivhili (172) khosi Dimitriosi a ramba mmbi yawe a bva a ya Media uri vha mu farise u yo lwa na Thirifoni. 2Arasakese khosi ya Pheresia na Media a pfa upfi Dimitriosi o dia shango ḽawe, a ruma muṅwe wa vhalangammbi vhawe uri vha mu fare a tshi khou tshila. 3Mulangammbi uyo a bva a ya henefho, a kunda mmbi ya Dimitriosi, a mu fara, a mu isa ha Arasakese, uyo a mu hoṋela dzhele.
Vhugala ha Simoni
4Shango ḽo vha ḽo lala misi yoṱhe ya Simoni;
o ṱoḓela lushaka lwawe zwivhuya.
Vhathu vha takadzwa nga maanḓa awe
na vhugala hawe misi yoṱhe a tshi vhusa.
5A hulisa vhugala hawe
nga u thuba vhuimazwikepe ha Jopa,
ha wanala nḓila
ya u ya zwiṱangadzimeni zwa lwanzhe.
6O engedza shango ḽa hawe
a vhusa shango iḽo.
7A thuba maswina manzhi,
a luvhisa Gezere na Bethe Tsuru na vhuimavhahali, a hu kumulula.
Ho vha hu si na ane a nga imedzana nae.
8Vhathu vha lima masimu avho ḽo lala,
vha vhibvisa zwiliṅwa,
miri ya aṅwa mitshelo.
9Vhakalaha vha dzula mavanḓani
vha tshi amba nga zwivhuya fhedzi,
vhaṱhannga vhone vho ḓiṱama nga maṱeleṱele a nndwa.
10Miḓi a i ṱunḓela zwiḽiwa,
a vha ṱama nga zwihali zwa u ḓilamulela.
Bvumo ḽawe ḽa vhuya ḽa swika migumoni ya ḽifhasi.
11O ladza shango,
Vhaisraele vha pembela nga dakalo.
12Muṅwe na muṅwe a dzula fhasi ha munḓirivhe wawe na muhuyu wawe,
hu si na ane a mu dina.
13A hu na swina ḽo salaho shangoni,
mahosi misi iyo o vha o kuyekanywa oṱhe.
14O khwaṱhisa vhoṱhe vha nyadzeaho vhathuni vha hawe,
a lwela mulayo,
a lozwa khundavhalai na vhavhi.
15O ṱama thembele ya vha na vhugala,
a engedza midzio yayo.
Mbumbano na Roma na Sparta
16Musi vhathu vha Roma na Sparta vha tshi pfa upfi Jonathani ha tsheeho, vha pfa vhuṱungu nga maanḓa. 17Hone Vharoma vha tshi pfa upfi mukomana wawe Simoni o vhumbwa muphrista muhulwane vhudzuloni hawe na uri u khou vhusa shango iḽo na miḓi, 18vha mu rumela maḓaba o ṅwalwaho a musinaseṱha ha vha u vusulusa nae vhukonani na mbumbano zwe zwa itwa na vharathu vhawe Judasi na Jonathani. 19Maḓaba ayo a vhalelwa tshivhidzo Jerusalema.
20Ngeyi khophi ya luṅwalo lwo swikiswaho nga Vhasparta lu ri, “Vhavhusi na vhadzulapo vha Sparta vha khou resha Simoni muphrista muhulwane na vhahulwane na vhaphrista na Majuda vhaṅwe vhoṱhe, vha hashu. 21Vhaḓinḓa vhe na vha ruma kha vhathu vha hashu vho ri vhudza nga vhugala haṋu na bvumo, nahone ra pfa ro takala zwe vha ḓa. 22Zwe vha amba ro zwi ṅwala kha nḓivhadzo i no vhalelwa tshivhidzo nga u rali: Numeniosi murwa wa Anthiokhosi na Antipatere murwa wa Jasoni, vhaḓinḓa vha Majuda vho ḓa kha riṋe u vusulusa vhukonani havho na riṋe, 23vhathu vha hashu vha vhofha ḽa u ṱanganedza vhanna avho nga khuliso na u longa khophi ya maipfi avho vhuvhulungamaṅwalo ha nnyi na nnyi, uri vhathu vha Sparta vha vhe na vhuṱanzi hazwo. Simoni muphrista muhulwane o itelwa khophi ya nḓivhadzo iyi.”
24Zwo no ralo Simoni a ruma Numeniosi a ya Roma e na tshiṱangu tsha musuku tshine tsha lemela khilogiramu dza maḓana maṋa na mahumi maṱanu (450 kg) (tshigidi tsha dziminasi), u khwaṱhisedza mbumbano yavho na Vharoma.
Nḓivhadzo ya khuliso
25Vhathu vha tshi pfa zwithu izwo vha ri, “Simoni na vhana vhawe ri nga vha livhuha hani? 26Hufha Simoni na vharathu vhawe na vha nnḓu ya khotsi awe vho ima vho khwaṱha vha shakulisa maswina a Israele, vha pfumbisa mbofholowo yavho.” Ndi hone vha tshi ṅwala luṅwalo kha maḓaba a musinaseṱha, vha a nambatedza kha dziphuphu dze vha imisa Thavhani ya Tsioni. 27Khophi ya luṅwalo lwa hone i ri, “Nga ḓuvha ḽa fumi na vhuṱanu na vhuraru (18) ḽa ṅwedzi wa Eluli, nga ṅwaha wa ḓana na mahumi maṱanu na mavhili na mivhili (172), ndi uri, nga ṅwaha wa vhuraru wa musi Simoni e muphrista muhulwane, 28ho ḓivhadzwa mafhungo aya Asaramele tshivhidzoni tshihulu tsha vhaphrista na vhathu na vhavhusi vha shango:
29“ ‘Ho vha hu tshi anzela u vha na dzinndwa shangoni ḽashu, hone Simoni muphrista, murwa wa Mathathiasi, wa lutsinga lwa Juaribu, na mukomana wawe na vharathu vhawe vho ḓifunga vha lwa na maswina a lushaka lwa havho, u itela uri hukhethwa na mulayo zwi vhulungwe, ngauralo vha ḓisela lushaka lwavho vhugala. 30Jonathani o kuvhanganya lushaka lwa hawe, a vha muphrista muhulwane wavho, a vhuya a yo eḓedzwa na vhokhotsi awe. 31Maswina a Majuda a linga u dia shango ḽavho vha ḽi vilinganya vha ṱangula hukhethwa havho, 32ha takuwa Simoni a lwela lushaka lwa hawe, a fhelelwa nga mali yawe nnzhi a tshi ṱama vhanna vha mmbi ya lushaka lwa hawe a tshi vha ṋea malamba avho. 33A vusa mitsheṱo ya miḓi ya Judia, zwihulwane muḓi wa Bethe Tsuru u re mukanoni, he u rangani ha vha ho vhulungwa zwihali zwa maswina, henefho a vhea mmbi ya vhahali vha Majuda. 34O ita na u fhaṱa mutsheṱo wa Jopa khunzikhunzi ya lwanzhe, na wa Gezere wo ṋekanaho masakha na Ashidodo, he u rangani ha vha hu tshi dzula maswina; miḓini iyo a dzudza Majuda a vha ṋea zwoṱhe zwine zwa ṱoḓea kha u vusulusa miḓi. 35Majuda vha vhona u fulufhedzea ha Simoni na vhugala he a ḓiimisela u ṋea lushaka lwa hawe, vha mu vhumba murangaphanḓa wavho na muphrista muhulwane nga u vhona zwoṱhe zwe a zwi vuledza na u fulufhedzea na u sa vha na tshiṱalula a tshi shumela lushaka lwa hawe. O linga nga nḓila dzoṱhe u hulisa vhathu vha hawe.
36“ ‘Misi yawe musi e murangaphanḓa vho zwi kona u shakulisa vhannḓa vha bva shangoni ḽavho, zwi tshi katela na avho vha re Jerusalema muḓini wa Dafita, vhe vha vha vho ḓifhaṱela vhuimavhahali, vha anzela u bva hone vha kumadza vhupo ha thembele vha tshinya lukuna lwayo zwihulu. 37Henefho vhuimavhahali a vhea vhahali vha Majuda, a khwaṱhisa mitsheṱo yaho uri shango na muḓi zwi tsireledzee, a dovha a lapfisa mitsheṱo ya Jerusalema u ya nṱha. 38Khosi Dimitriosi a fhedza nga u mu ita muphrista muhulwane, 39a mu ita muṅwe wa Khonani dzawe, a mu hulisa zwihulu. 40Vhukuma o vha o no ḓi zwi pfa uri Vharoma vha tshi amba Majuda vho vha vha tshi ri dzikhonani na vhavhumbani na vha havho, na zwauri vho ṱanganedza vhaḓinḓa vha Simoni nga khuliso.
41“ ‘Zwino Majuda na vhaphrista vhavho vha elekanya izwi. Vha ri Simoni u ḓo vha murangaphanḓa wavho tshoṱhe na muphrista muhulwane u swika hu tshi ḓa muporofita wa ngoho. 42U ḓo vha phangami yavho musi vha tshi bva pfumo, a vha mulangi wa thembele, a vhea milayo i elanaho na mishumo yayo na zwi kwamaho shango, na zwihali zwaḽo na vhuimavhahali. 43U ḓo thetsheleswa nga vhoṱhe, mbofho dzoṱhe dzine dza vhoxwa shangoni dzi ḓo ṅwalwa nga dzina ḽawe. U ḓo vha na pfanelo ya u fuka zwifuko zwa muridili wa vhuhosi na madzanga a musuku. 44Arali muthu ufhio na ufhio kana vhaphrista vha tshi nga shandukisa tshifhio kana tshifhio tsha izwo zwo elekanywaho Simoni a songo zwi tenda, zwi ḓo vha zwi siho mulayoni, naho hu u hanedza zwe a amba, kana u kuvhanganya tshivhidzo afho shangoni, kana u fuka zwifuko zwa muridili wa vhuhosi kana ṱhavhiso ya zwa musuku. 45Muthu ane a vhuya a ita zwi fhambanaho na izwo kana a pfuka ifhio na ifhio ya ndaela idzi u ḓo pfiswa vhuṱungu.
46“ ‘Vhathu vhoṱhe vha zwi tendela u ṋea Simoni pfanelo ya u shuma hu tshi tevhedzwa izwo zwo elekanywaho, 47zwino Simoni a zwi ṱanganedza, a tenda u shuma e muphrista muhulwane na murangaphanḓa wa mmbi na muvhusi wa Majuda na wa vhaphrista, na u vha na maanḓa a fhiraho a vhoṱhe.’ ”
48Zwo ḓivhadzwa uri luṅwalo ulu lu fanela u ṅwaliwa nga u tou koriwa kha maḓaba a musinaseṱha, lwa fhahewa fhethu hune lwa vhonala zwavhuḓi muṱani wa thembele, 49na uri khophi dzalwo dzi longwe tshisikuni tsha gwama, hune Simoni na vhana vhawe vha ḓo lu wana.
