1Zwino Johanisi a gonya a tshi bva Gezere a yo vhudza khotsi awe Simoni zwe Kendebiosi a ita. 2Simoni a vhidza vharwa vhawe vhavhili vhahulwane, Judasi na Johanisi, a vha vhudza a ri, “Nṋe na mukomana na vharathu vhanga na vha nnḓu ya khotsi anga ro lwa nndwa dza Israele u bva hanani hashu, na ṋamusi, nahone ndi lunzhi ri tshi zwi kona u tshidza Israele. 3Zwino nṋe ndo no kalaha, hone inwi nga vhuthu ha Mudzimu no no vha vhanna. Zwino dzhiani vhudzulo hanga na ha mukomana na ha vharathu vhanga, ni bve ni yo lwela lushaka lwa hashu. Ngavhe Mudzimu a tshi ni farisa!”
4Zwino Johanisi afho shangoni a ramba vhahali vha zwigidi zwa mahumi mavhili (20 000) na vhanameli vha dzibere, vha bva vha yo lwa na Kendebiosi, vha lala Modeini. 5Vha fhinduwa, vha bva vha ya mudavhini. Henefho vho vha vho livhana na mmbi khulu ya vhahali vha tshimbilaho nga ṋayo, na vhanameli vha bere. Vhukati ha mmbi idzo mbili ho vha hu na luombe. 6Johanisi na vhanna vhe a vha e navho vha imedzana na maswina. Johanisi a tshi vhona uri vhahali vhawe vha ofha u wela luombe, ene a thoma u wela. Vhanna vha tshi mu vhona, vha mu tevhela vha wetshela-vho seli. 7Zwino a fhandekanya vha tshimbilaho nga ṋayo vha bva zwigwada zwivhili a vha ṋea vhanameli vha dzibere vhukati havho, ngauri vhanameli vha bere vha maswina vho vha vho andesa. 8Ha lidzwa phalaphala, Kendebiosi na mmbi yawe vha shakuliswa, vhanzhi vhavho vha huvhadzwa vha rambalala, vhaṅwe vhoṱhe vha shavhela dzhavheloni. 9Zwenezwo Judasi murathu wa Johanisi a huvhadzwa a wa, hone Johanisi a pandamedza Kendebiosi a vhuya a swika Kedironi, muḓi we a vha o u vusa. 10Vhaṅwe vha shavhela dzithawarani mudavhini wa Ashidodo, hone Johanisi a dzi fhisa nga mulilo, ha lovha maswina vhane vha nga swika zwigidi zwivhili (2 000). Ndi hone Johanisi a tshi humela Judia nga mulalo.
U vhulahwa ha Simoni na vharwa vhawe
11Tholemiosi ṅwana wa Abubosi o vha o vhewa u vha muvhusi wa govha ḽa Jerikho. O vha o pfuma siliva na musuku, 12nge a vha e mukwasha wa muphrista muhulwane. 13Hone o vha na vhuhovheleli a linga u langa shango. Ndi zwe a ita vhukwila ha u vhulaha Simoni na vharwa vhawe. 14Huno nga ṅwaha wa ḓana na mahumi maṱanu na mavhili na miṱanu na mivhili (177), nga ṅwedzi wa fumi na muthihi (ndi uri, nga ṅwedzi wa Shebati), Simoni a yo ṱola miḓi ya shango na u i ṋea zwine ya lila, ene na vharwa vhawe Mathathiasi na Judasi vha tsela Jerikho. 15Murwa wa Abubosi a vha ṱanganedza nga u vha hoya kudzhavheloni ku no pfi Doko kwe a vha o ku fhaṱa. A vha itela vhuṱambo vhuhulu, hone ó dzumba vhahali vhawe henefho. 16Zwino musi Simoni na vharwa vhawe vhavhili vho no kambiwa, Tholemiosi na vhahali vhe a vha e navho vha takuwa vha dzhia zwihali vha gidimela kha Simoni nḓuni ya vhuṱambo, vha mu vhulaha na vharwa vhawe vhavhili na vhaṅwe vha vhalanda vhawe. 17Ho vha hu u shandukela muvhuso wawe na u lifhedza zwivhuya nga zwivhi.
18Ndi hone Tholemiosi a tshi ṅwalela khosi luṅwalo lwa u mu ḓivhisa zwe a ita, a tshi humbela uri hu rumelwe mmbi ya u mu farisa na uri shango iḽo ḽi ṋewe ene. 19Tholemiosi a ruma vhanna vhaṅwe vha ya Gezere u yo vhulaha Johanisi. O ṅwala na maṅwalo a iswa ha magota a mmbi a tshi khou vha vhidza uri vha ḓe khae uri a vha ṋee siliva na musuku na zwifhiwa. 20O ita na u ruma vhaṅwe vha yo thuba Jerusalema na thavha ya thembele. 21Hone muṅwe wavho a gidimela phanḓa a ya Gezere u yo sevha Johanisi uri khotsi awe na vhana vha khotsi awe vho lovha, na uri Tholemiosi o no ruma vhanna vha u vhulaha na ene Johanisi. 22Johanisi a tshi zwi pfa a akhamala. Musi vhanna vhaḽa vha tshi swika uri vha mu vhulahe, a ita uri vha fariwe vha vhulahwe, nge a vha o sevhiwa uri vho ḓelani.
23Histori iṅwe ya Johanisi, na nndwa dzawe, na mishumo ya vhuhali ye a shuma, na mitsheṱo ye a vusa, na zwiṅwe zwe a vuledza 24zwithu izwo zwo ṅwalwa kha mafhungo a kale a vhuphrista, u bva tshifhinga tshe a vha muphrista vhudzuloni ha khotsi awe.
