1 TIMOTI 4

₁Muya Mukhethwa u tou amba zwi pfalaho u ri: misi ya vhufhelo vhaṅwe Vhakhriste vha vho ḓo landula zwe vha vha vha tshi zwi tenda, vha thetshelesa mimuya i xedzaho vhathu na pfunzo dza thuṅwa dza Saṱhane. ₂Pfunzo dzenedzo dzi zwalwa nga vhadzia-u-zwifha vha muhoyo, vhe mvalo dzavho dza fhisedzwa luswayo lwa Saṱhane. ₃Vha ri muthu a songo dzea vha dovha vha iledza zwiṅwe zwiḽiwa. Hufha Mudzimu izwo zwiḽiwa o zwi sikela uri riṋe vhatendi ro no ḓivhaho ngoho ri zwi ḽe ri tshi mu livhuha. ₄Zwoṱhe zwe Mudzimu a zwi sika ndi zwavhuḓi; a hu na tshine tsha ila arali ri tshi tshi ḽa ri tshi livhuha Mudzimu. ₅Ipfi ḽa Mudzimu na thabelo zwi zwi ita zwikhethwa.

₆Arali na funza Vhakhriste eneo, ndi hone ni tshi ḓo vha mushumeli wavhuḓi wa Khristo Yesu, ni tshi fusha muya waṋu nga mafhungo a Mudzimu e ra tenda na nga pfunzo mbuya ye na ḓiṋekedza yone. ₇Hone ngano hedzo dza vhakegulu dza zwa shango ni dzi ile, tshaṋu ni dzule ni tshi ḓiḓowedza zwa u ofha Mudzimu. ₈U onyolosa muvhili hu na hune ha farisa-vho, hone u luvha Mudzimu hu farisa kha zwoṱhe: zwi ri fulufhedzisa zwa vhutshilo vhuno khathihi na zwa vhutshilo vhu ḓaho. ₉Mafhungo ane ra fanela u a fulufhela ra a ṱanganedza tshoṱhe asia: ₁₀“Ni tshi vhona ri tshi kakarika ro tou futelela, ndi uri ro ṱulutshela Mudzimu a tshilaho a re Mutshidzi wa vhathu vhoṱhe, zwihuluhulu vhatendi.”

₁₁Layani vhathu nga u ralo, ni vha funze zwenezwo. ₁₂Ni vhone uri hu si vhe na ane a ni nyadza nge na vha muṱuku khae; inwi ni tou vha tsumbo kha vhatendi nga zwine na amba na nga kutshilele na lufuno na lutendo na u ila zwa vhuaḓa. ₁₃Ni si litshe u vhalela tshivhidzo Maṅwalo na u vha ṱuṱuwedza na u vha funza, ndi vhuye ndi ḓe. ₁₄Ni songo tamba nga mpho ye Mudzimu a ni ṋea a ni dzumbululela nga ndaedzo yawe musi ni tshi vhewa zwanḓa nga vhalisa vha tshivhidzo. ₁₅Dzulani ni tshi tevhedza hezwo zwithu no tou ḓikumedza zwone, ndi hone muṅwe na muṅwe a tshi ḓo vhona u bvela phanḓa haṋu. ₁₆Ni sedzese zwine na ita, ni si litshe u funza. Ni dzule ni tshi ralo, ndi hone ni tshi ḓo ḓitshidza, na tshidza na vhane na vha funza.